ភ្នំពេញ ៖ ថ្មីៗនេះមានបណ្ដាញសារព័ត៌មានក្នុងស្រុកបានលើកកកាយសរសេរចុះផ្សាយអំពីរឿងរ៉ាវជីវិតស្នេហាឯកជនក្រៅសិល្បៈរបស់តារាសម្តែងជំនាន់ដើម និងជាអ្នករៀបចំដឹកនាំកម្មវិធីសិល្បៈតន្ត្រីនៅស្ថានីយទូរទស្សន៍អាស៊ីអាគ្នេយ៍ លោក ចា រិទ្ធី ថា តារាប្រុសរូបនេះធ្លាប់ឆ្លងកាត់ភ្លក់រសជាតិស្នេហាជាមួយនារីវ័យក្មេងកំណាន់ចិត្តមិនក្រោមមួយរយនាក់ឡើយ។ ប៉ុន្តែដំណឹងនេះត្រូវរងការរិះគន់យ៉ាងចាស់ដៃពីមជ្ឈដ្ឋានមហាជន។
អ្នករៀបចំកម្មវិធីប្រគំតន្ត្រីល្បីឈ្មោះជាយូរឆ្នាំ លោក ចា រិទ្ធី ត្រូវបានគេចាត់ទុកជាអ្នកសិល្បៈដែលមានមន្តស្នេហ៍ខ្ពស់មិនធម្មតាឡើយ ព្រោះមាននារីវ័យក្មេងរូបស្រស់មិនតិចនាក់ទេបានលង់ស្នេហ៍ និងស្ម័គ្រចិត្តព្រមប្រគល់ខ្លួនប្រាណឲ្យលោកដោយមិនមានភាពស្ទាក់ស្ទើរក្នុងចិត្តឡើយ។ ក្នុងនោះ បើគិតជាតួលេខនារីវ័យក្មេងៗដែលលោក ចា រិទ្ធី បានស្គាល់ខ្លួនប្រាណមានចំនួនមិនតិចជាង១០០នាក់ទេ។ នេះបើផ្អែកតាមប្រភពចុះផ្សាយរបស់បណ្ដាញសារព័ត៌មានក្នុងស្រុកមួយកាលពីថ្មីៗនេះ។
បន្ទាប់ពីការចុះផ្សាយព័ត៌មានដូចការលើកឡើងខាងនេះ ភ្លាមៗនេះគេសង្កេតឃើញទស្សនិកជន និងអ្នកលេងបណ្ដាញសង្គមហ្វេសប៊ុកមួយចំនួនធំបានសម្តែងអារម្មណ៍ភ្ញាក់ផ្អើលស្ទើរគ្រប់គ្នា ដោយសារតួលេខនៃនារីកំណាន់ចិត្តដែលលោក ចា រិទ្ធី ធ្លាប់ឆ្លងកាត់ស្គាល់ខ្លួនប្រាណត្រូវបានលាតត្រដាងបង្ហាញជាសាធារណៈ។ ស្របពេលជាមួយគ្នានេះ ក៏មានមតិខ្លះបានលើកសរសើរថា លោក ចា រិទ្ធី ជាបុរសមានសំណាងបំផុត ដែលបុរសដទៃទៀតគ្មានសំណាងធ្វើបានដូចលោកឡើយ។ ប៉ុន្តែក្នុងនោះក៏មានមតិខ្លះបានរិះគន់យ៉ាងចាស់ដៃផងដែរចំពោះទង្វើមួយនេះ។
ជាក់ស្ដែងនៅលើគណនីយហ្វេសប៊ុករបស់ស្ត្រីម្នាក់ឈ្មោះ Marady Abeysinghe ថ្មីៗនេះបានសរសេរបង្ហោះសារបញ្ចេញមតិរិះគន់ និងស្នើឲ្យមានករណីបើកសំណុំរឿងស៊ើបអង្កេតលើបញ្ហានេះផង ព្រោះចង់ដឹងថា នារីវ័យក្មេងកំណាន់ចិត្តមិនក្រោម១០០ហ្នឹងវាជារឿងដែលព្នៅទៅធ្លាក់លើដៃគាត់(ចា រិទ្ធី) ឬគាត់ដាក់សំពាធលើព្នៅ?
កម្ពុជាថ្មី ចាប់តាំងពីល្ងាចថ្ងៃទី២៧ ខែតុលា រហូតមកទល់ម៉ោង១០ព្រឹក ថ្ងៃទី២៨ ខែតុលា ឆ្នាំ២០១៥ បានព្យាយាមភ្ជាប់ទំនាក់ទំនងតាមទូរស័ព្ទដើម្បីសុំការបកស្រាយពីសំណាក់តារាប្រុស និងជាអ្នករៀបចំដឹកនាំកម្មវិធីសិល្បៈតន្ត្រីប្រចាំនៅស្ថានីយទូរទស្សន៍អាស៊ីអាគ្នេយ៍លោក ចា រិទ្ធីជាច្រើនលើកច្រើនសាដែរ ប៉ុន្តែពេលទូរស័ព្ទចូលគ្មានអ្នកទទួលឡើយ។ ដូច្នេះយើងរង់ចាំស្វាគមន៍រាល់ការចេញមុខបំភ្លឺបញ្ជាក់ប្រាប់ការពិតពីលោក ចា រិទ្ធី នៅពេលក្រោយ៕ 
ចា រិទ្ធី រងការរិះគន់យ៉ាងចាស់ដៃរឿងមាននារីកំណាន់ចិត្តមិនក្រោម១០០នាក់
0 Comments