កណ្តាល ៖ សាខាកាកបាទក្រហមកម្ពុជាខេត្តកណ្តាល បានរៀបចំពិធីប្រកាសទទួលស្គាល់ជាផ្លូវការប្រធានគណៈកម្មាធិការអនុសាខាកាកបាទក្រហមកម្ពុជាក្រុងតាខ្មៅ នាព្រឹកថ្ងៃទី ១៩ ខែតុលា ឆ្នាំ ២០១៥ នៅសាលប្រជុំទីស្នាក់ការសាខា។ ពិធីនេះ ប្រព្រឹត្តទៅក្រោមអធិបតីភាពលោក ជាវ តាយ ជាប្រធានគណៈកម្មាធិការសាខាកាកបាទក្រហមកម្ពុជាខេត្តកណ្តាល។ អញ្ជើញចូលរួមជាកិត្តិយសមាន សមាជិកគណៈកម្មាធិការសាខា គណៈកម្មាធិការអនុសាខាក្រុង ក្រុមកាកបាទក្រហមសង្កាត់ អ្នកស្ម័គ្រចិត្ត និងយុវជនកាកបាទក្រហម សរុបចំនួន ៩១ នាក់។
លោក ទៀង សុគន្ធ នាយកសាខាកាកបាទក្រហមកម្ពុជាខេត្ត អានសេចក្តីសម្រេចរបស់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ស្តីពីការទទួលស្គាល់ប្រធានគណៈកម្មាធិការអនុសាខាក្រុង-ស្រុក សាខា កាកបាទក្រហមកម្ពុជាខេត្តកណ្តាល។
លោក ហេង ធៀម ប្រធានគណៈកម្មាធិការអនុសាខាកាកបាទក្រហមកម្ពុជាក្រុង ដែលទើបទទួលតំណែងថ្មីបានចាប់អារម្មណ៍ថា កាកបាទក្រហមកម្ពុជា ជាស្ថាប័នមនុស្សធម៌មួយរបស់ជាតិតាំងពីថ្នាក់កណ្ដាល រហូតដល់ថ្នាក់មូលដ្ឋាន ពីមួយឆ្នាំទៅមួយឆ្នាំកាន់តែមានការអភិវឌ្ឍន៍រីកចម្រើនឥត ឈប់ឈរ ហើយការអភិវឌ្ឍន៍នេះ គឺពិតជាអាស្រ័យដោយសារការដឹកនាំដ៏ឈ្លាសវៃរបស់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា។ នៅចំពោះមុខនៃអង្គពិធីតាំងនាមឲ្យសមាជិកសមាជិកាគណៈកម្មាធិការអនុសាខាក្រុង ក្រុមកាកបាទក្រហមសង្កាត់ អ្នកស្ម័គ្រចិត្ត យុវជនកាកបាទក្រហមនៅក្នុងក្រុងទាំងមូល សូមប្ដេជ្ញាចិត្តគាំទ្រ និងអនុវត្តសកម្មភាពមនុស្សធម៌លើគ្រប់វិស័យរបស់កាកបាទក្រហមកម្ពុជា តាមគោលការណ៍គ្រឹះទាំង៧របស់ចលនាកាកបាទក្រហមអន្តរជាតិ។
លោកជាវ តាយ មានប្រសាសន៍ថា ជោគជ័យដែលសាខា-អនុសាខាទទួលបានកន្លងមក បានឆ្លុះបញ្ចាំងឲ្យឃើញពីមាគ៌ាដឹកនាំដ៏ត្រឹមត្រូវរបស់កាកបាទក្រហមកម្ពុជា ក្រោមការដឹកនាំដ៏ឈ្លាសវៃរបស់ សម្ដេចកិត្តិព្រឹទ្ធបណ្ឌិត ប្រធាន និងភាពខ្លាំងនៃយុទ្ធសាស្ត្ររបស់កាកបាទក្រហមកម្ពុជា។ ជាមួយគ្នានេះដែរលោកបានក្រើនរំឮកដល់អនុសាខាក្រុង និងក្រុមកាកបាទក្រហមសង្កាត់ទាំងអស់ត្រូវខិតខំអនុវត្តសកម្មភាពមនុស្សធម៌ឲ្យកាន់តែខ្លាំងក្លាបន្ថែមទៀត។ លោកបន្តថា ដើម្បីឲ្យបេសកកម្មការងារខាងលើកាន់តែមានប្រសិទ្ធភាព យុទ្ធសាស្ត្រ ២០១១–២០២០ បានកំណត់នូវបាវនា ៣ សំខាន់គឺ ១-ធ្វើឲ្យកាន់តែច្រើនជាងមុន ២-ធ្វើឲ្យកាន់តែល្អជាងមុន ៣-ធ្វើឲ្យកាន់តែស៊ីជម្រៅជាងមុន និងទៅឲ្យកាន់តែឆ្ងាយ ជាងមុន។ ក្នុងនោះដែរលោកបានសំណូមពរ សូមរក្សាសាមគ្គីភាពឲ្យបានជិតស្និទ្ធ និងសុខដុមរមនីយកម្មវាងគណៈ កិត្តិយសសាខា អនុសាខា ជាមួយគណៈកម្មាធិការសាខា អនុសាខា និងក្រុមប្រតិបត្តិគ្រប់លំដាប់ថ្នាក់។ បន្តពង្រឹង និងពង្រីក កម្លាំងយុវជន អ្នកស្ម័គ្រចិត្តកាកបាទក្រហមឲ្យទៅជាបណ្ដាញដ៏រឹងមាំ និងជាកម្លាំងចលករ នៃសេវាកម្មមនុស្សធម៌មាននិរន្តរភាព និងប្រកបដោយប្រសិទ្ធភាព។ បន្តពង្រឹងនិងពង្រីក សមាជិកភាព លើកម្ពស់ការកៀងគររកមូលនិធិឲ្យមានការចូលរួម ដោយស្ម័គ្រចិត្ត និងទៅតាមសទ្ធាជ្រះថ្លា ប្រាសចាកពីការចាប់បង្ខំ ការដាក់កំហិត និងត្រូវរក្សាឲ្យមានតម្លាភាព មានគណនេយ្យភាពក្នុងការប្រើប្រាស់មូលនិធិ និងទ្រព្យសម្បត្តិរបស់សាខា-អនុសាខា។
នៅចុងបញ្ចប់នៃកម្មវិធីលោកប្រធានគណៈកម្មាធិការសាខា បានឧបត្ថម្ភថវិកាដល់អ្នកស្ម័គ្រចិត្ត យុវជនកាកបាទក្រហម និងក្រុមកាកបាទក្រហមសង្កាត់ទាំងអស់ សរុបចំនួន ៨២ នាក់ ក្នុងម្នាក់ៗថវិកាចំនួន ២ ម៉ឺនរៀល៕
ពិធីប្រកាសទទួលស្គាល់ជាផ្លូវការប្រធានគណៈកម្មាធិការអនុសាខា កាកបាទក្រហមកម្ពុជាក្រុងតាខ្មៅ
0 Comments