កណ្ដាល ៖ យុវជនម្នាក់បានស្លាប់ភ្លាមៗនៅនឹងកន្លែងកើតហេតុ ខណៈបើកបរម៉ូតូតាមបណ្តោយផ្លូវជាតិលេខ៤ ហើយត្រូវរថយន្តតូរីស ដឹកអ្នកដំណើរ បើកបុកចំពីមុខពេញមួយទំហឹង។ ហេតុការណ៍គ្រោះថ្នាក់ចរាចរណ៍នេះ កើតឡើងនៅវេលាម៉ោង ២៣និង៣០នាទី យប់ថ្ងៃទី ២០ ខែតុលា ឆ្នាំ២០១៥ នៅចំណុចមុខភូមិ កៅឃុំបែកចាន ស្រុកអង្គស្នួល ខេត្តកណ្តាល ផ្លូវជាតិលេខ០៤ចន្លោះគីឡូម៉ែត្រលេខ ២០.២១។
ប៉ូលិសចរាចរណ៍ស្រុកអង្គស្នួលបានឲ្យដឹងថា រថយន្តបង្កហេតុមានម៉ាក ហ៊ីយិនដាយពណ៌ ស្លាទុំ ពាក់ស្លាកលេខ ភ្នំពេញ ៣B-៥១៩០ ជាប្រភេទរថយន្ត តូរីស ៤៥កៅអី ហើយក្រោយកើតហេតុ តៃកុងរថយន្តបង្កបានចុះរត់គេចខ្លួនបាត់។ ចំណែកជនរងគ្រោះដែលបាត់បង់ជីវិតមានឈ្មោះ ម៉ុល ឌៀប ភេទប្រុស អាយុ២២ នៅភូមិ ដូងខ្វិតឃុំ វាលពន់ ស្រុកថ្ពង ខេត្តកំពង់ស្ពឺមុខ របរកម្មករ។
បើតាមសាក្សីក្បែរកន្លែងកើតហេតុបានឲ្យដឹងថា មុនពេលកើតហេតុជនរងគ្រោះបានជិះម៉ូតូម៉ាកសេ១២៥ពណ៌ខ្មៅ ពាក់ស្លាកលេខ កំពង់ស្ពឺ ១D-៦៩៤៨ តាមបណ្តោយផ្លូវជាតិលេខ៤ មានទិសដៅពីកើតទៅលិច លុះមកចំណុចកើតហេតុខាងលើ ក៏មានរថយន្តមួយគ្រឿងម៉ាកហ៊ីយិនដាយ ប្រភេទ តូរីសដឹកអ្នកដំណើរ បានបើកបុកជាមួយម៉ូតូសេ១២៥ ពីមុខពេញមួយទំហឹង បណ្ដាលឲ្យអ្នកបើកបរម៉ូតូស្លាប់ភ្លាមៗនៅនឹងកន្លែងកើតហេតុ ។ រីឯតៃកុងរថយន្តបង្ក ពេលឃើញមានមនុស្សស្លាប់បានចុះពីលើរថយន្តគេចខ្លួនបាត់។
ប៉ូលិសបានបញ្ជាក់ថា ក្រោយពេលកើតហេតុ សមត្ថកិច្ចបានប្រមូលវត្ថុតាងយកមករក្សាទុកនៅអធិការរដ្ឋានដើម្បីអង្កេត កសាងសំណុំរឿងតាមនីតិវិធីច្បាប់ ចំណែកសពជនរងគ្រោះសមត្ថកិច្ចបានប្រគល់ជូនក្រុមគ្រួសារយកទៅធ្វើបុណ្យតាមប្រពៃណី៕
រថយន្តតូរីសដឹកអ្នកដំណើរ បើកបុកម៉ូតូសេ១២៥ ស្លាប់ម្នាក់នៅកន្លែងកើតហេតុ
0 Comments