កំពង់ឆ្នាំង ៖ ស្ត្រីខ្មែរក្រីក្រម្នាក់សុំប្រកាសរកឪពុកម្ដាយទី២ចិត្តធម៌ជួយចិញ្ចឹមកូនប្រុសអាយុជាង៦ខែ ព្រោះតែគ្មានលទ្ធភាពចិញ្ចឹមកូនទៀត និងថ្មីៗនេះត្រូវឪពុកកំណាចដេញកាប់បណ្ដេញចេញមិនឲ្យនៅលើផ្ទះ មកសុំរស់នៅក្រោមផ្ទះអ្នកស្រុកក្នុងភូមិ។ រឿងដែលគួរឲ្យអាណិតទៀតនោះ គឺនាងបានទៅធ្វើការជាអ្នកបម្រើតាមផ្ទះនៅប្រទេសម៉ាឡេស៊ីត្រូវបានបុរសម៉ាឡេស៊ីម្នាក់ចាប់រំលោភ ក្រោយមកបានរៀបការមានចុះអេតាស៊ីវិលស្របច្បាប់ក្នុងប្រទេសម៉ាឡេស៊ី ប៉ុន្តែពេលជិតសម្រាលកូនត្រូវប្ដីបោកប្រាស់ឲ្យត្រឡប់មកស្រុកខ្មែរវិញ ហើយផ្ដាច់ការទំនាក់ទំនងរហូតនាងសំណូមពរដល់ស្ថានទូតខ្មែរនៅប្រទេសម៉ាឡេស៊ី និងអ្នកច្បាប់ជួយរកយុត្តិធម៌ជូននាងផង។
នៅព្រឹកថ្ងៃទី២០ ខែតុលា ឆ្នាំ២០១៥ស្ត្រីដែលមានបញ្ហាខាងលើនេះបានរៀបរាប់ពីជីវិតនាងឲ្យអ្នកយកព័ត៌មានយើងដឹងថា នាងមាន ឈ្មោះ ចាន់ ចំរើន អាយុ២៣ឆ្នាំ នាងមានកូនប្រុសមួយអាយុ៦ខែ រស់នៅភូមិសំរោង សង្កាត់ផ្សារឆ្នាំង ក្រុងកំពង់ឆ្នាំង នាងទើបតែមកពីប្រទេសម៉ាឡេស៊ីបានជិត១ឆ្នាំ។ នៅឆ្នាំ២០១១ នាងបានទៅធ្វើការជាអ្នកបម្រើការងារតាមផ្ទះនៅប្រទេសម៉ាឡេស៊ីជាលើកទី២ តាមរយៈក្រុមហ៊ុន អាយ អាយ អេស បាន៣ឆ្នាំ។
នៅពេលធ្វើការតាមផ្ទះឲ្យគេ នៅស្រុកម៉ាកុតាក់ច្រាស ខេត្តគ័រលំពូ ប្រទេសម៉ាឡេស៊ីត្រូវបុរសម្នាក់ឈ្មោះ សូ ទូ អាយុ៣០ឆ្នាំ ជាកូនម្ចាស់ផ្ទះបានចាប់រំលោភធ្វើបាបនាងគ្រប់បែបយ៉ាង ហើយក្រោយមកគេក៏បានបង្ខំនាងឲ្យរៀបការជាមួយគេ បានចុះអីតាស៊ីវិលស្របច្បាប់ជាមួយគ្នា និងបង្ខំឲ្យនាងជាអ្នកចេញប្រាក់រៀបការខ្លួនឯងអស់ជិត១.០០០ដុល្លា។ បន្ទាប់ពីរូបនាងពពោះជិតគ្រប់ខែប្ដីរបស់នាងមិនឲ្យនាងសម្រាលកូននៅម៉ាឡេស៊ីទេ គឺគេបានលួងលោមនាងឲ្យត្រឡប់មកកើតនៅស្រុកខ្មែរវិញដោយសន្យាថា គេនឹងមករកនាងនៅស្រុកខ្មែរពេលនាងសម្រាលកូនរួច។ ក្នុងពេលនោះគឺប្ដីរបស់នាងបានឲ្យនាងមកស្រុកខ្មែរវិញម្នាក់ឯងតាមច្រកប្រទេសថៃ និងសូម្បីតែលិខិតឆ្លងដែនក៏គេមិនឲ្យនាងដែរ ពេលមកដល់ស្រុកខ្មែរនាងសល់ប្រាក់តែ៦ម៉ឺនរៀលប៉ុណ្ណោះ។
នាងបាននិយាយបន្តទៀតថា ពេលដល់ស្រុកខ្មែររយៈពេល១ខែដំបូង ប្ដីនាងនៅទាក់ទងគ្នាបាននៅឡើយតាមទូរស័ព្ទ ក្រោយពីនាងសម្រាលកូនរួចមកលេខទូរស័ព្ទធ្លាប់ទំនាក់ទំនងគ្នាលែងទាក់ទងបានរហូតមកដល់ពេលនេះ ទើបនាងដឹងខ្លួនថា នាងត្រូវគេបោកប្រាស់។ នាងសំណូមពរអ្នកច្បាប់នៅក្នុងខ្មែរ និងស្ថានទូតខ្មែរនៅប្រទេសម៉ាឡេស៊ីជួយផ្តល់យុត្តិធម៌ជូននាងផង ព្រោះពេលនេះនាងគ្មានលុយកាក់ប្ដឹងផ្ដល់ទេ។
ដោយឡែកមកដល់ថ្ងៃនេះកូនប្រុសនាងសស្អាតមានអាយុជាង៦ខែហើយ នាងគ្មានលទ្ធភាពចិញ្ចឹមកូនទៀតទេ ព្រោះសព្វថ្ងៃនេះនាងក្រីក្រគ្មានមុខរបររកពិតប្រាកដគឺបានតែដើរបេះផ្កាស្នោ និងត្រកួន នៅតាមបឹងយកមកលក់ទិញអង្ករកំប៉ុងច្រកឆ្នាំងបាន១ថ្ងៃរស់១ថ្ងៃតែប៉ុណ្ណោះ។ ពេលនេះនាងគ្មានផ្ទះសម្បែងជ្រកកោនទេ ព្រោះតែថ្មីៗនេះឪពុកកំណាចបានដេញកាប់នាង និងម្តាយនាងមិនឲ្យរស់នៅក្នុងផ្ទះឡើយ សព្វថ្ងៃនាងបានសុំអ្នកភូមិរស់នៅក្រោមផ្ទះរបស់គេ។ នៅពេលនេះនាងសុំប្រកាសប្រគល់កូនប្រុសដាច់ជូនឪពុកម្ដាយទី២ ដែលមានក្តីសន្តោសមេត្តា និងមានព្រហ្មវិហារធម៌ជួយយកកូនប្រុសនាងទៅចិញ្ចឹមយកបុណ្យផងចុះ បើមានក្តីមេត្តានាងស្នើសុំប្រាក់តិចតួចសម្រាប់ដោះស្រាយជីវភាពរស់នៅរបស់ម្តាយ ម្តាយធំ និងជីដូនដែលកំពុងក្រីក្រខ្វះខាត និងមានជំងឺខ្វិន ចំណែករូបនាងចង់ទៅធ្វើជាកម្មករនៅប្រទេសថៃ ដើម្បីរកប្រាក់មកជួយចិញ្ចឹមក្រុមគ្រួសារមាន ម្តាយ ម្តាយធំ និងជីដូន ដែលកំពុងរស់នៅយ៉ាងវេទនា។ ( លេខទូរស័ព្ទសាច់ញាតិនាងក្នុងការទាក់ទងសុំកូន ០៦៧ ៨០ ៧០ ៨០ ប្រព័ន្ធមិត្តហ្វូន )៕
ស្ត្រីខ្មែរម្នាក់ដែលត្រូវគេចាប់រំលោភ ប្រកាសស្វែងរកអ្នកចិត្តធម៌យកកូននាងទៅចិញ្ចឹម
0 Comments