ឥទ្ធិពលរបស់ក្រុមរដ្ឋឥស្លាមISIS លាតសន្ធឹងកាន់តែឆ្ងាយចេញពីទឹកដីដែលខ្លួនគ្រប់គ្រងកាន់កាប់នៅក្នុងប្រទេសស៊ីរីនិងអ៊ីរ៉ាក់ទៅទៀតដោយឈានទៅស្វែងរកការជ្រើសរើសកងកម្លាំងរបស់ខ្លួននៅជុំវិញពិភពលោកក្នុងនោះមានទាំងតំបន់អាស៊ីប៉ាស៊ីហ្វិកផងទៅទៀត។
អ្នកនិពន្ធនៃទីភ្នាក់ងារព័ត៌មានAssociated Press ១០នាក់ដែលស្ថិតនៅក្នុងតំបន់នោះធ្វើការវិភាគពិភាក្សាថាតើចលនាជ្រុលនិយមនេះកំពុងតែមានឥទ្ធិពលទៅលើប្រទេសទាំងនោះបានដោយរបៀបណាទៅ។
*ប្រទេសអូស្ដ្រាលី
ក្រុមរដ្ឋឥស្លាមធ្លាប់មានប្រសិទ្ធភាពយ៉ាងពិសេសក្នុងការជ្រើសរើសក្រុមមនុស្សដែលដើរតាមគន្លងរបស់ខ្លួននៅក្នុងប្រទេសអូស្ដ្រាលី។មានការប៉ាន់ស្មានមួយថាជនជាតិអូស្ដ្រាលី១២០នាក់ត្រូវបានគេជឿថាកំពុងតែវាយប្រយុទ្ធជាមួយចលនានេះព្រមទាំងជាមួយក្រុមសកម្មជនប្រយុទ្ធដទៃផ្សេងទៀតនៅក្នុងប្រទេសស៊ីរីនិងប្រទេសអ៊ីរ៉ាក់ដែលជំនួននេះវាច្រើនសម្បើមទៅហើយដែលអូស្ដ្រាលីមានពលរដ្ឋរបស់ខ្លួនតែត្រឹម២៤លាននាក់នោះ។ នៅមានជនជាតិអូស្ដ្រាលីជាច្រើនថែមទៀតដែលបានដើរតាមគន្លងរបស់ក្រុមISអំពាវនាវឲ្យមានការប្រព្រឹត្ដអំពើហិង្សានៅក្នុងប្រទេសអូស្ដ្រាលីតែម្ដងក្នុងនោះមានក្មេងៗជំទង់មួយក្រុមត្រូវចាប់ខ្លួននាឆ្នាំនេះដោយជាប់ការសង្ស័យថាធ្វើសកម្មភាពលបប្រព្រឹត្ដអំពើអាក្រក់ទៅតាមក្រុមរដ្ឋឥស្លាមដោយបើកការវាយប្រហារទៅលើពិធីប្រារព្ធទិវានៃទាហានជើងចាស់Veteran’s Day។
នៅក្នុងសេចក្ដីបង្គាប់បញ្ជាមួយដើម្បីទប់ស្កាត់លំហូរនៃអ្នកប្រយុទ្ធបរទេសនោះប្រទេសអូស្ដ្រាលីបានកំណត់ថាជាអំពើប្រព្រឹត្ដបទឧក្រិដ្ឋចំពោះពលរដ្ឋរបស់ប្រទេសខ្លួនដែលធ្វើដំណើរទៅកាន់ផ្នែកមួយចំនួននៃទឹកដីរបស់ប្រទេសអ៊ីរ៉ាក់និងស៊ីរីដែលដណ្ដើមគ្រប់គ្រងកាន់កាប់ដោយចលនារបស់រដ្ឋឥស្លាមIS។
រដ្ឋាភិបាលអូស្ដ្រាលីក៏បានទាំងលុបចោលនូវលិខិតឆ្លងដែនរបស់មនុស្សផងទាំងឡាយដែលខ្លួនជឿជាក់ថាគេកំពុងតែមានគម្រោងការទៅចូលរួមប្រយុទ្ធនៅតំបន់មជ្ឈិមបូព៌ានោះ។
ក្រុមអ្នកជំនាញការមិនយល់ស្របអំពីថាតើហេតុអ្វីទើបបានជាក្រុមIS ទទួលជោគជ័យយ៉ាងសម្បើមនៅក្នុងការជ្រើសរើសអ្នកប្រយុទ្ធឬយុទ្ធិកៈនៅក្នុងប្រទេសអូស្ដ្រាលីបានដែលនោះកឺជាជោគជ័យទៅលើពហុវប្បធម៌ជាប្រវត្ដិសាស្ដ្រហើយដែលអូស្ដ្រាលីមានពលរដ្ឋរបស់ខ្លួនកាន់សាសនាមូស្លីមតែត្រឹម២ភាគរយ។អ្នកជំនាញឯកទេសមួយចំនួនលើកឡើងថាការពិបាកធ្វើសមាហរណកម្មនៃជនមូស្លីមអូស្ដ្រាលីមួយចំនួននោះហើយនិងការផ្ដោតទៅលើក្រុមជ្រើសរើសអ្នកប្រយុទ្ធរបស់IS ឲ្យមកកាន់ប្រទេសអូស្ដ្រាលី។រដ្ឋាភិបាលក៏រងបរាជ័យផងដែរក្នុងការតាមដានទៅលើពលរដ្ឋមួយចំនួនរបស់ខ្លួនដែលប្រកាន់រ៉ាឌីកាល់ភាវូបនីយកម្ម។
*ប្រទេសប់ងក្លាដែស
ក្រុមIS បានប្រកាសអះអាងពីការទទួលខុសត្រូវនៅក្នុងការសម្លាប់កាលពីពេលថ្មីៗនៅប្រទេសបង់ក្លាដែសទៅលើពលរដ្ឋអ៊ីតាលីម្នាក់និងពលរដ្ឋជប៉ុនម្នាក់ទៀត។ដោយឡែករដ្ឋាភិបាលប្រទេសនេះបានច្រានចោលការអះអាងថាជាប្រការដែលមិនត្រូវបានធ្វើការផ្ទៀងផ្ទាត់។ជាបន្ថែមទៅទៀតនោះប្រទេសអាស៊ីខាងត្បូងដ៏ក្រីក្រនេះបានឃើញពីការកើនឡើងមួយយ៉ាងច្បាស់ក្នុងអំពើហិង្សាដែលត្រូវបានថ្កោលទោសទៅលើក្រុមឥស្លាមនិយមរ៉ាឌីកាល់ក្នុងនោះមានទាំងការសម្លាប់Bloggers ៤នាក់កាលពីដើមឆ្នាំនេះផង។
ភាគច្រើនបំផុតនៃពលរដ្ឋប់ងក្លាដែសដល់ទៅ១៧២លាននាក់ជាជនមូស្លីម។ខណៈពេលដែលរដ្ឋាភិបាលបង់ក្លាដែសមិនរវល់ទាក់ទងនឹងសាសនាហើយស្ថិតនៅជាកណ្ដាលទៅតាមប្រពៃណីទៅហើយនោះការលេចចេញឡើងនៃក្រុមនយោបាយឥស្លាមនិយមបានបង្កើតឲ្យមាននូវការបែងចែកមួយដ៏ច្បាស់លាស់រវាងក្រុមមូស្លីមនិយមកណ្ដាលនិងក្រុមរា៉ាឌីកាល់ហើយបានរួមចំណែកដល់អស្ថិរភាពនយោបាយ។
នាយករដ្ឋមន្ដ្រីលោកSheik Hasina ធ្លាប់បានបង្ក្រាបទៅលើក្រុមរ៉ាឌីកាល់និយមនិងក្រុមឥស្លាមប្រកាន់តឹង៦ក្រុមទៀតត្រូវរងការហាមប្រាមនៅក្នុងរយៈពេលប៉ុន្មានឆ្នាំកន្លងទៅនេះ។ក្រុមអ្នកវិភាគនិយាយថាក្រុមតូចៗមួយចំនួនដែលនៅសេសសល់វិញក៏បែកខ្ញែកពិបាកគ្រប់គ្រងហើយបានជាប់ទាក់ទងជាមួយនឹងក្រុមជ្រុលនិយមសកលទៅទៀត។
*ប្រទេសឥណ្ឌា
ជនមូស្លីមដែលជាពលរដ្ឋឥណ្ឌាដល់ទៅ១៧២លាននាក់ត្រូវបានគេមើលឃើញថារងការបង្អត់ទទួលរងការខ្វះខាតយ៉ាងខ្លាំងហើយថែមទាំងរងការប្រកាន់សាសន៍ផងទៅទៀតហើយភាពតានតឹងជាមួយពលរដ្ឋដែលកាន់សាសនាហិណ្ឌូភាគច្រើនបានកើតមានឡើងអស់កាលដល់ទៅ៧ទសវត្សរ៍កន្លងមកហើយចាប់តាំងពីការបែងចែកប្រទេសឥណ្ឌានិងប៉ាគីស្ថាននៅឆ្នាំ១៩៤៧បានបណ្ដាលឲ្យមានការផ្ទុះឡើងនូវហិង្សាសហគមន៍ដែលបណ្ដាលឲ្យបាត់បង់ជីវិតមនុស្សប្រមាណ១លាននាក់រួចទៅហើយ។
ប៉ុន្ដែពេលដែលក្រុមមួយចំនួនដូចជាក្រុមMujaheddin ឥណ្ឌាដែលស្និទ្ធនឹងប៉ាគីស្ថានបានរកឃើញជំហរដ៏នឹងធឹងរបស់ខ្លួនមកក្រុមមន្ដ្រីនិងអ្នកវិភាគនិយាយថាជនមូស្លីមឥណ្ឌាគឺជាក្រុមមូស្លីមនិយមកណ្ដាលបែបប្រពៃណីហើយមិនដូចជាក្រុមរដ្ឋឥស្លាមដែលធ្វើការជ្រើសរើសឲ្យធ្វើជាអ្នកប្រយុទ្ធនោះទេ។
សូម្បីតែនៅតំបន់កាស្មៀរដែលមានការងើបបះបោរវាយឆ្មក់ដោយក្រុមសកម្មប្រយុទ្ធមួយនៅឆ្នាំ១៩៨៩ជាការប្រឆាំងតបទៅនឹងការគ្រប់គ្រងដោយឥណ្ឌានៅតំបន់ទឹកដីហីុម៉ាឡាយ៉ាដែលភាគច្រើនជាជនមូស្លីមនោះក្ដីក៏មិនមានសញ្ញាដែលថាមានវត្ដមានរបស់ក្រុមIS ទាំងអស់នៅតំបន់កាស្មៀរ។នេះជាការលើកឡើងដោយអគ្គអធិការប៉ូលិសលោកSyed Javaid Mujtaba Gillani។លោកបានកត់សម្គាល់ថាប៉ូលិសបានសាកសួរយុវវ័យមួយចំនួនដែលលើកគ្រវីទង់IS នៅពេលមានបាតុកម្មប្រឆាំងឥណ្ឌាកាលពីឆ្នាំទៅប៉ុន្ដែមានមួយចំនួនក្នុងចំណោមពួកគេមិនដែលដឹងទេថាIS នោះគឺជាអ្វីឡើយ។លោកបានសន្និដ្ឋានថានេះគឺជារបៀបជន្លជន្លេញដល់បាតុករមួយចំនួនដើម្បីជាការបង្កជាមួយប៉ូលិសនោះហើយ។
គេនៅតែមានការភ័យខ្លាចដែលថាជនមូស្លីមនៃប្រទេសឥណ្ឌាអាចប្រហែលជាក្លាយទៅជារ៉ាឌីកាល់ភាវូបនីយកម្មពិសេសបន្ទាប់ពីក្រុមអាល់កៃដាបើកឲ្យមានមែកធាងសាខារបស់ខ្លួននៅអាស៊ីខាងត្បូងកាលពីឆ្នាំទៅពិសេសនៅក្នុងប្រទេសឥណ្ឌា។
ក្រុមបព្វជិតImams មូស្លីមនៅក្នុងប្រទេសឥណ្ឌាបានជំរុញឲ្យអ្នកដើរតាមខ្លួនឲ្យវាយបកទៅក្រុមរដ្ឋឥស្លាមព្រមទាំងក្រុមរ៉ាឌីកាល់ដទៃទៀតដោយហៅក្រុមទាំងនោះថាជាក្រុមប្រឆាំងនឹងឥស្លាម។
*ប្រទេសឥណ្ឌូនេស៊ី
មានជនឥណ្ឌូនេស៊ីប្រមាណ៦០០នាក់បានទៅចូលរួមជាមួយក្រុមរដ្ឋឥស្លាមISហើយមានជាង៣០នាក់ហើយដែលបានវិលត្រឡប់មកមាតុភូមិរបស់ខ្លួនវិញនេះជាការលើកឡើងដោយនាយប៉ូលិសជាតិឧត្ដមសេនីយ៍Badrodin Haiti។
គេទាំងអស់គ្នានោះត្រូវបានសាកសួរមាន១៥នាក់ត្រូវចាប់ខ្លួនហើយ១២នាក់ទៀតប្រឈមនឹងការផ្ដន្ទាទោសដោយរងការចោទប្រកាន់ពីបទសមគំនិតប្រព្រឹត្ដទុច្ចរិតជាមួយនឹងការជ្រើសរើសក្រុមសកម្មប្រយុទ្ធក្នុងនោះមានទាំងក្រុមរដ្ឋឥស្លាមផងដែរ។
ទឹកប្រាក់មួយចំនួនដែលត្រូវបានប្រើប្រាស់សម្រាប់គាំទ្រដល់សកម្មភាពក្រុមIS នៅក្នុងប្រទេសឥណ្ឌូនេស៊ីត្រូវបានតាមដានទៅដល់ប្រទេសអូស្ដ្រាលីដោយក្រុមមន្ដ្រីសមត្ថកិច្ចនៃប្រទេសទាំងពីរដែលរួមសហការជាមួយគ្នា។
អាជ្ញាធរទួរគីនិងឥណ្ឌូនេស៊ីក៏កំពុងតែរួមសហការដើម្បីតាមដានក្រុមមនុស្សមួយទៀតមានសមាជិក១៦នាក់សុទ្ធសឹងជាពលរដ្ឋឥណ្ឌូនេស៊ីដែលបាត់ដំណឹងពេលដែលក្រុមមនុស្សទាំងនោះទៅធ្វើដំណើរទេសចរណ៍នៅក្រុងអ៊ីស្ដង់ប៊ុល៕
ឥទ្ធិពលរបស់ក្រុមរដ្ឋឥស្លាមISIS ហាក់ដូចជាលាតសន្ធឹងយ៉ាងឆ្ងាយរហូតដល់អាស៊ីប៉ាស៊ីហ្វិក
0 Comments