ក្រុមបាល់ទាត់បឹងកេតអង្គរ ដែលកំពុងឈរកំពូលតារាងពានរង្វាន់មិត្តហ្វូនខេមបូឌានលីក២០១៥ (Metfone Cambodian League 2015) ត្រូវប្រកួតជាមួយក្រុមវេស្ទើនអែហ្វស៊ី ក្នុងជើងទី២ ប្រចាំសប្ដាហ៍ទី ២១ នៅវេលាម៉ោង ៣និង៣០ នាទីរសៀលថ្ងៃអាទិត្យ ទី ១៨ ខែ តុលា ឆ្នាំ ២០១៥ នេះលើទីលានកីឡដ្ឋានកងយោធពលខេមរភូមិន្ទ(ស្ដាតចាស់)។
កាលពីជើងទី១ ក្រុមជើងឯករងឆ្នាំចាស់បឹងកេតអង្គរ បានយកឈ្នះក្រុមម្ចាស់ផ្ទះវេស្ទើនភ្នំពេញ ដោយលទ្ធផល ៩ ទល់ ៥ លើទីលានស្មៅសប្បនិមិត្តលើទឹកដីខណ្ឌសែនសុខ។ ៤ គ្រាប់របស់វេស្ទើនរកបានដោយ Okoro Mathew Osa ២ គ្រាប់ កីឡាករ Mohammed Tijani, Maguire Joshua James និង នុត ស៊ីនួន រកបានម្នាក់១ គ្រាប់ឲ្យវេស្ទើន។ ចំណែក ៩ គ្រាប់របស់បឹងកេតអង្គរ រកបានដោយកីឡាករ ចាន់ វឌ្ឍនាកា ៤ គ្រាប់, ឃួន ឡាប៊ូរ៉ាវី ២, សុខ ផេង, Esoh Omogba និង សុខ សុវណ្ណ ម្នាក់១គ្រាប់។
ពេលនេះសម្រាប់បឹងកេតអង្គរ កំពុងត្រូវការពិន្ទុដើម្បីស្វែងរកកៅអីបន្តឈរកំពូលតារាងពានរង្វាន់ MCL 2015 ក៏ដូចជាស្វែងរកឱកាសទៅចូលរួមប្រកួតក្នុងពានរង្វាន់អន្តរជាតិ Toyota Mekong Championship 2015 ជាមួយក្រុមជើងខ្លាំងមកពីប្រទេសឡាវ និង មីយ៉ាន់ម៉ា។
បឹងកេត ក្រោមការដឹកនាំរបស់លោក ប្រាក់ សុវណ្ណារ៉ា កំពុងឈរលេខ១ បណ្ដោះអាសន្ន ដោយសល់២ប្រកួតក្នុងដៃមុនចប់វគ្គសន្សំពិន្ទុជុំទី២នៃពានរង្វាន់ MCL 2015។ ២០ ប្រកួតមកនេះបឹងកេត ធ្លាប់ឈ្នះបានរហូតដល់ ១៦ លើក ស្មើ ៣ លើកនិងចាញ់ ១ លើកមាន ៥១ ពិន្ទុក្នុងដៃ។ កីឡាករ សំខាន់ៗមួយចំនួនដូចជា រស់ សំអឿន, ស៊ូ យ៉ាទី,ហុង ផេង, ចាន់ វឌ្ឍនាកា, ឃួន ឡាបូរ៉ាវី, សុខ សុវណ្ណ សុទ្ធតែត្រឡប់មកពីជួយក្រុមជម្រើសជាតិកម្ពុជា ក្នុងយុទ្ធនាការប្រកួតជម្រុះពានរង្វាន់បាល់ទាត់ជើងឯកពិភពលោក2018 FIFA World Cup Russia ជុំទី២ ក្នុងពូល E ប្រចាំទ្វីបអាស៊ី ជាមួយសិង្ហបុរី កាលពីពេលថ្មីៗ។
លោក ប្រាក់ សុវណ្ណារ៉ា ធ្លាប់លើកឡើងប្រាប់សារព័ត៌មានក្នុងស្រុកថា លោកចង់ដឹកនាំបឹងកេត ឲ្យបានបាល់ល្អដូចកាលពីឆ្នាំ ២០១២ ពោលគឺលើកពាន MCL។ នៅពេលនេះកីឡាករ ចាន់ វឌ្ឍនាកា របស់បឹងកេតអង្គរ កំពុងឈរកំពូលតារាងក្នុងបញ្ជីកីឡាករដែលអាចរកគ្រាប់បាល់បញ្ជូលទីបានច្រើនជាងគេបណ្ដោះអាសន្ន គិតត្រឹមសប្ដាហ៍ទី ២០ កន្លងទៅនេះដោយរកបាន ៣០ គ្រាប់ម្នាក់ឯង។
ចំណែកក្រុមវេស្ទើនអែហ្វស៊ី វិញក្រោមការដឹកនាំដោយលោក ប៉ែន ផាត អតីតកីឡាករជម្រើសជាតិកម្ពុជា កាលពីទសវត្សទី ៦០ កំពុងតែត្រូវការពិន្ទុជាចាំចាប់ដើម្បីឆ្លងផុតពីតំបន់ដែលត្រូវកាត់ចេញ ត្រង់បាតតារាង។ ២០ ប្រកួតមកនេះវេស្ទើន ធ្លាប់ឈ្នះបានតែ ៤ លើកទេ ហើយធ្លាប់ស្មើគ្នាបាន ១លើកនិងចាញ់រហូតដល់ ១៥ លើកមាន ១៣ ពិន្ទុក្នុងដៃ ឈរចំណាត់ថ្នាក់លេខ ១១ ក្នុងចំណោមក្រុមទាំង១២។ ប្រកួតចុងក្រោយវេស្ទើន បានចាញ់ក្រុមបៀលប្រាយ ២ ទល់ ១។
លោក ប៉ែន ផាត ធ្លាប់លើកឡើងពីចំណុចខ្សោយរបស់កូនក្រុមថា កីឡាករទាំងនោះនៅខ្វះបទពិសោធន៍លើទីលាន និងមានភាគច្រើនជាងកីឡាករវ័យក្មេង បើធៀបនឹងក្រុមដទៃក្នុងពាន MCL 2015 ដូចគ្នា។
កីឡាករជនជាតិនីហ្សេរីយ៉ា Mathew Osa Okoro ជាតារាជើងស៊ុតប្រចាំក្រុមវេស្ទើន ដោយធ្លាប់រកគ្រាប់បាល់បញ្ជូលទីគូប្រកួតបាន ១៣ គ្រាប់ម្នាក់ឯងក្នុងចំណោម ២០ លើកមកនេះ ខណៈមិត្តរួមជាតិ Tijani Mohammed រកបាន ៨ គ្រាប់តាមពីក្រោយ។
រឿងមួយដែលគួរឲ្យចាប់អារម្មណ៍នោះគឺ ទាំងបឹងកេត និង វេស្ទើន ឡើងមកលេងក្នុងពានរង្វាន់ MCL ត្រឹមរដូវកាល ២០១២ ដូចគ្នា ប៉ុន្ដែនៅឆ្នាំនោះដែរ បឹងកេត ដណ្ដើមបានជើងឯក ស្របពេលវេស្ទើន ត្រូវធ្លាក់ទៅលេងក្នុងក្របខណ្ឌក១ វិញ។
បើនិយាយពីប្រវត្តិជួបគ្នាក្នុងពានរង្វាន់ MCL វិញក្រុមទាំង២ធ្លាប់ប៉ះគ្នា ៥ លើកមកហើយ ដោយជ័យជម្នះទាំង៥លើកបានទៅបឹងកេត ទាំងអស់។
នៅថ្ងៃអាទិត្យ ទី ១៨ ខែ តុលា ឆ្នាំ ២០១៥ នេះក្រៅបឹងកេតអង្គរ ជួបក្រុមវេស្ទើន ពានរង្វាន់ MCL 2015 សប្ដាហ៍ទី ២១ នេះក៏មានគូប្រកួត១គូទៀតដែរ ដោយក្រុមខេមបូឌានថាយហ្គឺរ ជួបក្រុមមជ្ឈមណ្ឌលកំចាត់មីនកម្ពុជា (ស៊ីម៉ាក់) នៅវេលាម៉ោង ៣និង៣០ នាទីរសៀលលើទីលានកីឡដ្ឋានវេស្ទើន៕
ល្ងាចថ្ងៃអាទិត្យនេះ បឹងកេត ជួប វេស្ទើន ដើម្បីត្រៀមរក្សាកៅអីកំពូលតារាងមុនបញ្ចប់ MCL 2015
0 Comments