ក្រុមហ៊ុន​អាកាសចរណ៍​នានា បញ្ចៀស​ការ​ហោះហើរ​នៅ​លើ​តំបន់​នៃ​ការធ្លាក់​យន្តហោះរបស់​រុស្ស៊ី នៅក្នុង​ប្រទេស​អេហ្ស៊ីប

ក្រុមហ៊ុន​អាកាសចរណ៍​ធំៗ នៅ​ម​ជ្ឈិម​បូព៌ា និង​អឺរ៉ុប​ជាច្រើន​បាន​និយាយថា ពួកគេ​នឹងធ្វើ​ការហោះហើរ​ព​ង្វាងតំបន់​ដែនអាកាស​របស់​អេ​ហ្សុីប ជា​កន្លែងដែល​យន្តហោះរបស់​ប្រទេស​រុស្ស៊ី បាន​ធ្លាក់​ចុះ កាលពី​ថ្ងៃ​សៅរ៍។

​ក្រុមហ៊ុន​អាកាសចរណ៍​ធំជាងគេ​បំផុត នៅ​​ឈូង​សមុទ្រ អេ​មី​រ៉ា​ត និង​ក្រុមហ៊ុន​បុត្រសម្ព័ន្ធ flydubai របស់ខ្លួន ព្រមទាំង​ក្រុមហ៊ុន​អាកាស​ចរណ៍ អ៊ែរ អ៊ូឌីត បានឱ្យដឹងថា ពួកគេ​បាន ធ្វើការ​ហោះហើរ​ពង្វាង​ជុំវិញ​ឧបទ្វីប ជា​តំបន់ ដែល​យន្តហោះ Metrojet របស់​ប្រទេស​រុស្ស៊ី​បាន​ធ្លាក់ភ្លាមៗ​បន្ទាប់ពី​ហោះ​ចេញពី​ទីក្រុង Sharm el- Sheikh ដោយបាន​សម្លាប់​មនុស្ស​ប្រមាណ ២២៤ នាក់​នៅលើ​យន្ដហោះ​តែម្ដង។

​

​ក្រុមហ៊ុន​អាកាសចរណ៍ Lufthansa និង Air France-KLM ក៏បាន​សម្រេចចិត្ត​បញ្ឈប់​​ការ​ហោះហើរ​នៅលើ​ឧបទ្វីប​នោះដែរ ខណៈ​ពេលដែល​ហានិភ័យ ត្រូវបាន​វាយតម្លៃ បន្ទាប់​ពី​ក្រុម​សកម្មប្រយុទ្ធ ឥស្លាម​ត្រូវបាន​គេ​អះ​អាង​ថា ក្រុម​នេះ​បាន​បាញ់យន្តហោះ​នោះ​ទម្លាក់ ដែល​រហូត​មកដល់នឹង​ពេលនេះ ក្រុង​មូស្គូ​បាន​ច្រានចោល​ការអះអាង​នោះ។

​

​អ្នកនាំពាក្យ​របស់​ក្រុមហ៊ុន​អាកាសចរណ៍ easyJet បានឱ្យដឹងថា មុនពេល​កើតហេតុ​យន្ត​ហោះរបស់ខ្លួន​ត្រូវបាន​ហោះ​ពង្វាង​ភាគ​ខាង​ជើង និង​ភាគ​កណ្តាល​នៃ​តំបន់​ជម្លោះ ស៊ី​ណៃ​រួចទៅហើយ​។ “អ្វីដែល​បាន​ត្រៀម​ទុកជាមុន មុនពេល​កើតហេតុ​កាលពី​ម្សិល​មិញ​​នេះ ក្រុមហ៊ុន​អាកាសចរណ៍ easyJet ក៏ដូច​ជា​ក្រុមហ៊ុន​អាកាសចរណ៍​ចក្រភព​អង់គ្លេស​ផ្សេងទៀត​ដែរ មិនបាន​ហោះហើរ​នៅលើភាគ​ខាងជើង និង​ភាគ​កណ្តាល​ស៊ី​ណៃ ដែលជា​តំបន់​កើត​ឧបទ្ទវ​ហេតុនេះ នោះទេ”​។

​

​យន្តហោះ​របស់​ក្រុមហ៊ុន​អាកាសចរណ៍​អង់​គ្លេស ដែល​ធ្វើការ​ហោះហើរ​ចេញ និង​ចុះចត នៅ​ទីក្រុង Sharm បាន​ស្គាល់ផ្លូវ​វាង​ស្រដៀង​គ្នា​មួយ នៅតាម​បណ្តោយ​ឈូង​សមុទ្រ​ស៊ុយ​អេ បើទោះបីជា ក្រុមហ៊ុន​អាកាសចរណ៍​នេះ មិនបាន​បញ្ជាក់​ពី​វា​ក៏ដោយ​។ អ្នកនាំពាក្យ​របស់​ក្រុមហ៊ុន​អាកាសចរណ៍​ចក្រភព​អង់គ្លេស​ម្នាក់​បាន​និយាយថា​៖ “យើងមិនបាន​ពិភាក្សាគ្នា​អំពី​សេចក្តីលម្អិត​នៃ​ផ្លូវ​ហោះហើរ​ជា​លក្ខណៈ​បុគ្គល​នោះទេ ប៉ុន្តែ​យើង​នឹងមិន​ធ្វើការ​ហោះហើរ​នៅ​ផ្លូវអាកាស​មួយ​ឡើយ ដរាបណា​វា​មិនមាន​សុវត្ថិភាព​ក្នុងការ​ហោះហើរ​។ សុវត្ថិភាព​នៃ​អតិថិជន​របស់​យើង តែងតែ​ជា​អាទិភាព​ទីមួយ ដែល​យើង​ត្រូវយក​ចិ​ត្ដ​ទុកដាក់”​។

​

​ក្រុមហ៊ុន​អាកាសចរណ៍ easyJet បានឱ្យដឹងថា អ្នកដំណើរ​ទាំងឡាយណា ដែល​មិន​ចង់​ហោះហើរ​តាមផ្លូវ​អាកាស ដែល​យើង​ជ្រើសរើស នឹង​ត្រូវ​បាន​ផ្តល់ជូន ទាំង​ជម្រើស​នៃ​ការហោះហើរ​មួយ​ផ្សេងទៀត ឬ​កាត Voucher មាន​ទឹកប្រាក់។ អ្នកនាំពាក្យ​ម្នាក់​បាន​និយាយថា​៖ “​សុវត្ថិភាព​អតិថិជន និង នាវិក​របស់​យើង គឺជា​ចំណុច​អាទិភាព​ខ្ពស់បំផុត​របស់​យើង”។

​

​អនុសាសន៍​ពី​នាយកដ្ឋាន​ដឹកជញ្ជូន កាល​ពី​ខែធ្នូ​ ឆ្នាំ២០១៤ បាន​ប្រាប់​ក្រុមហ៊ុន​អាកាស​ចរណ៍​ទាំងឡាយ ឱ្យ​ព​ង្វាង​ការហោះហើរ ក្នុង​រយៈកម្ពស់ ៧៦២០ម៉ែត្រ នៅ​ភាគ​ខាងជើង​ស៊ី​ណៃ​។ អនុសាសន៍​ដដែល​នេះ ត្រូវបាន​គេ​ចុះ​ផ្សាយ​ម្ដងទៀត នៅខែកញ្ញា​ឆ្នាំនេះ​។

​

​យន្តហោះ Metrojet Airbus A321-200 នេះ ហោះហើរ​បាន​រយៈកម្ពស់ ៩៤៤៨.៨ ម៉ែត្រ មុនពេល​វា បាន​ធ្លាក់ ហើយ​អ្នកជំនាញ​បាន​សង្ស័យថា ពួក​សកម្មប្រយុទ្ធ​នៅ​ស៊ី​ណៃ​ គួរតែ​បាន​ប្រដាប់​ដោយ​អាវុធ ដែលមាន​សមត្ថភាព​បាញ់​​ទម្លាក់​យន្តហោះ​មួយ​នេះ នៅ​រយៈកម្ពស់ ដែល​កំពុង​ហោះហើរ​នោះ​។ ជើងហោះហើរ​របស់​ក្រុមហ៊ុន​អាកាសចរណ៍​ម៉ាឡេស៊ី MH17 បាន​ហោះហើរ​ក្នុង​រយៈកម្ពស់ ១០០៥៨.៤ ម៉ែត្រ មុនពេល​ដែល​វា​ត្រូវបាន​បាញ់​ទម្លាក់ នៅ​ភាគ​ខាងកើត​អ៊ុយ​ក្រែ​ន ក្នុងខែកក្កដា ឆ្នាំ២០១៤។

​

​សមាគម​ដឹកជញ្ជូន​ផ្លូវអាកាស​អន្តរជាតិ​បាន​​អំពាវនាវកាលពី​ឆ្នាំមុន ដើម្បីឱ្យ​ចែករំលែក​ព័ត៌មាន​ឱ្យ​កាន់តែ​ច្បាស់លាស់ រវាង​ក្រុមហ៊ុន​អាកាសចរណ៍​នានា បន្ទាប់ពី​ការធ្លាក់​យន្ដហោះ MH17 របស់​ក្រុមហ៊ុន​អាកាសចរណ៍​ម៉ាឡេស៊ី និង​បាន​អំពាវនាវអំពី​ការគំរាមកំហែង​ដទៃ​ទៀត។ ដំណឹង​នោះ ជា​ញឹកញាប់​ត្រូវបានលាក់​បាំង​សម្ងាត់​ប្រកបដោយ​ក្ដី​ច្រណែន និង​បាន​នាំឱ្យ​ក្រុមហ៊ុន​អាកាសចរណ៍​នានា ទទួលយក​ការសម្រេចចិត្ត​ខុសគ្នា​ថា ដែនអាកាស​មួយណា គួរតែមាន​សុវត្ថិភាព​ក្នុងការ​ហោះហើរ​៕

The Guardian

ដេវីដ

​

ក្រុមហ៊ុន​អាកាសចរណ៍​នានា បញ្ចៀស​ការ​ហោះហើរ​នៅ​លើ​តំបន់​នៃ​ការធ្លាក់​យន្តហោះរបស់​រុស្ស៊ី នៅក្នុង​ប្រទេស​អេហ្ស៊ីប