ពិធីបើកបវេសនកាលនៃឆ្នាំសិក្សាថ្មី២០១៥-២០១៦ បានប្រព្រឹត្តទៅរួចរាល់ហើយ គឺ ចាប់ពីថ្ងៃទី២ ខែវិច្ឆិកា ឆ្នាំ២០១៥ នេះតទៅ ជាពេលចាប់ផ្តើមធ្វើការបង្រៀន និងរៀនគ្រប់សាលារៀនទាំងអស់ទូទាំងព្រះរាជាណាចក្រកម្ពុជា។ ដូចនេះនៅថ្ងៃដំបូងនេះគេឃើញមានសកម្មភាព សំខាន់ៗ របស់គ្រូ និងសិស្សដូចតទៅនេះ៖
សិស្សបានចូលក្នុងបន្ទប់រៀនដែលជាថ្នាក់រៀនថ្មី របស់ខ្លួនក្រោមការដឹកនាំពីគ្រូទទួលបន្ទុកថ្នាក់។ ចំពោះសកម្មភាពនៃគ្រូទទួលបន្ទុកថ្នាក់ដែលបានជួបនឹងសិស្សថ្មីរបស់គាត់នោះគេឃើញមានដូចជា ការហៅឈ្មោះ សិស្សគ្រប់គ្នាឲ្យបានដឹងថា តើមានអវត្តមានសិស្សប៉ុន្មាននាក់ ការប្រជុំសិស្ស និងការកត់ត្រាកាលវិភាគប្រចាំថ្នាក់រៀននីមួយៗ ព្រមទាំងមានបញ្ហាផ្សេងៗ ដូចជាបញ្ហាចែកសៀវភៅ សិក្សាគោលដល់សិស្សគ្រប់គ្នាទៀតផង។
១.ការហៅឈ្មោះសិស្សដែលមាននៅក្នុងបញ្ជីថ្មីនៃសិស្សបានឡើងថ្នាក់។ មានន័យថា សាលារៀនចាប់ផ្តើមស្រង់អវត្តមានសិស្សចាប់ពីពេលនោះហើយ។ ទន្ទឹមនេះដែរបន្ទាប់ពីការហៅឈ្មោះ សិស្សរួចគ្រូទទួលបន្ទុកថ្នាក់បានពិនិត្យអំពីការអង្គុយតាមតុ នៃសិស្សគ្រប់គ្នាដោយមានការរៀបចំឲ្យសិស្សតូចអង្គុយមុខ និងសិស្សធំអង្គុយក្រោយ។ ក្នុងនោះក៏មានការរៀបចំសិស្សពិការភ្នែក ឬសិស្សដែលមានភ្នែកអន់ត្រូវអង្គុយតុខាងមុខផងដែរ។ បន្ទាប់មកទៀតគ្រូបង្រៀន ឬជាគ្រូទទួលបន្ទុកថ្នាក់បានពិនិត្យអំពីគ្រឿងសង្ហារិម និងសម្ភារៈទាំងឡាយក្នុងការរៀបចំតុបតែងតាមជញ្ជាំងបន្ទប់រៀន។ ជាពិសេសបញ្ហាក្តារខៀនតែម្តង ដ្បិតប្រភពនៃការពន្យល់ ឬការផ្តល់ចំណេះដឹងដល់សិស្សទាំងអស់តែងមិនអាចឃ្លាតឆ្ងាយពីក្តារខៀននេះឡើយ។ ដូចនេះបញ្ហាក្តារខៀនល្អ មានការសរសេរបានមើលឃើញច្បាស់នោះក៏ជាប្រភពនៃការបង្កើតនូវគុណភាពសិស្សផងដែរ។
២.ការប្រជុំរបស់គ្រូដល់សិស្សតាមថ្នាក់នីមួយៗ នាព្រឹកនោះគឺ ការអាននិងពន្យល់នូវបទបញ្ជាផ្ទៃក្នុងសាលារៀន ដើម្បីឲ្យសិស្សបានចេះចាំក្នុងការអនុវត្តជាភារកិច្ចរបស់ខ្លួនក្នុងនាមជាសិស្ស។ មានន័យថាបទបញ្ជាផ្ទៃក្នុងរបស់សាលារៀនក៏ប្រៀបប្រដូចទៅនឹងច្បាប់នានាទៅក្នុងសង្គមនោះដែរ។ ពោលគឺ បទបញ្ជាផ្ទៃក្នុងនេះវាជាច្បាប់សម្រាប់សិស្សក្នុងការសិក្សាឲ្យមានប្រសិទ្ធភាព។ ជាពិសេសក្នុងបទបញ្ជាផ្ទៃក្នុងបានបញ្ជាក់អំពីបញ្ហាវិន័យ ការគោរពពេលវេលានៃការរៀន និងអំពីបញ្ហាសីលធម៌ របស់សិស្សក្នុងសាលារៀននោះដែរ។ ក្នុងអំឡុងពេលនៃការសិក្សាប្រសិនបើមានសិស្សណាប្រព្រឹត្តខុសនឹងបទបញ្ជាផ្ទៃក្នុងនោះ វាជាកំហុសរបស់សិស្សផ្ទាល់តែម្តង។ ជាមួយនេះដែរ ក្រោយពីការប្រជុំសិស្សតាមរយៈការបង្ហាញនិងបកស្រាយនូវបទបញ្ជាផ្ទៃក្នុងនេះក៏គ្រូទទួលបន្ទុកថ្នាក់បានបិទនៅតាមបន្ទប់រៀននៅតាមតារាងបទបញ្ជាផ្ទៃក្នុងដើម្បីទុកឲ្យសិស្សបានអានជារៀងរាល់ថ្ងៃទុកជាការក្រើនរំលឹកដាស់តឿនខ្លួនឲ្យក្លាយជាសិស្សល្អ ក្នុងសាលារៀន។
៣.ការកត់កាលវិភាគប្រចាំថ្នាក់រៀន នីមួយៗ។ ក្រោយពីការប្រជុំសិស្សតាមថ្នាក់រៀនរួចមកគ្រូទទួលបន្ទុកថ្នាក់ បានឲ្យសិស្សឡើងគូសតារាងកាលវិភាគ ជាកាលវិភាគប្រចាំសប្តាហ៍ដែលជាថ្ងៃរៀនចាប់ពីថ្ងៃច័ន្ទ រហូតដល់ថ្ងៃសៅរ៍ថា តើថ្ងៃណា និងម៉ោងណាត្រូវរៀនមុខវិជ្ជាអ្វី? ឬសិស្សបានដឹងថា តើមុខវិជ្ជានីមួយៗ មានគ្រូឯកទេសនោះឈ្មោះអ្វី។ សិស្សបានចម្លង ឬកត់ត្រាកាលវិភាគផ្ទាល់ខ្លួនគ្រប់គ្នា ដើម្បីឲ្យមានការរៀបចំការសិក្សាឲ្យបានទៀងទាត់រាល់ថ្ងៃ ដោយចៀសវាងនូវការភាន់ច្រឡំគឺ សំដៅឲ្យសិស្សមានការគោរពពេលវេលាឲ្យបានច្បាស់លាស់និងត្រឹមត្រូវទៀតផង។
៤.បន្ទាប់ពីការកត់កាលវិភាគរួចហើយនោះគ្រូទទួលបន្ទុកថ្នាក់បាននិយាយពីបញ្ហាផ្សេងៗ ដែលក្នុងនោះមានបញ្ហាសាលាចែកសៀវភៅសិក្សាគោលដៅដល់សិស្សគ្រប់កម្រិតថ្នាក់ផងដែរ។ បានសេចក្តីថា ក្រសួងអប់រំយុវជននិងកីឡា បានចែកសៀវភៅអាន(សៀវភៅពុម្ព) ដល់សិស្សគ្រប់គ្នាដែលសិស្សម្នាក់ៗ មិនបាច់ចំណាយប្រាក់ទិញសៀវភៅពុម្ពនោះឡើយ។ ដ្បិតកាលពីចុងឆ្នាំសាលាមានការប្រមូលសៀវភៅពីសិស្សតម្កល់ទុកក្នុងទីចាត់ការដើម្បីថែរក្សាទុកចែកដល់សិស្សក្នុងឱកាសឆ្នាំសិក្សាថ្មី។
ទាំងអស់នេះជាសកម្មភាពតាមសាលារៀនក្នុងថ្ងៃនៃការអនុវត្តការបង្រៀន និងរៀនស្របទៅតាមកាលវិភាគជាក់ស្តែងយ៉ាងខ្ជាប់ខ្ជួនតរៀងទៅ៕
ថ្ងៃដំបូងដែលសិស្ស និងយុវជនបានចូលរៀននៃឆ្នាំសិក្សាថ្មី
0 Comments