ស្ទឹងត្រែង ៖ នៅក្នុងពិធីដោះស្រាយផលប៉ះពាល់ពីទំនប់វារីអគ្គិសនីសេសានក្រោមពីរ នាព្រឹកថ្ងៃទី២៨ ខែវិច្ឆិកា ឆ្នាំ២០១៥នេះ ប្រជាពលរដ្ឋចំនួន១៣៩គ្រួសារ នៅភូមិក្បាលរមាស ស្រុកសេសានខេត្តស្ទឹងត្រែង បាននាំគ្នាតវ៉ានៅចំពោះមុខក្រុមការងារដោះស្រាយផលប៉ះពាល់ថ្នាក់ខេត្តឲ្យរកដីភូមិថ្មីឲ្យពួកគាត់រស់បានដាំដំណាំកើតផង។
ប្រជាពលរដ្ឋទាំង១៣៩គ្រួសារនេះ បានស្នើសុំប្ដូរទីតាំងឲ្យក្រុមដោះស្រាយផលប៉ះពាល់ថ្នាក់ខេត្តកំណត់ធ្វើភូមិនៅជិតគីឡូម៉ែត្រ៥០៣ ចុះមកគីឡូម៉ែត្រ៤៩៩ និង៥០០វិញ ដោយសារទីតាំងថ្មីនេះផ្ទៃដីអំណោយផលអាចដាំដំណាំចិញ្ចឹមជីវិតបាន។
ប្រជាពលរដ្ឋលើកឡើងទៀតថា ម្យ៉ាងទៀតទីតាំងរៀបចំភូមិនៅចំណុច៥០៣ បងប្អូនជនជាតិពិនិត្យមើលទៅតាមជំនឿមិនអំណោយផល ទៅនឹងការរស់នៅ ដោយកន្លែងនោះនៅចំច្រកដែលមានទួលនៅសងខាង បងប្អូនជនជាតិមានជំនឿថា នៅមិនបានសុខទើបសុំការផ្លាស់ប្ដូរ។
លោក ប៊ុន រេត តំណាងក្រុមហ៊ុនបានយល់ព្រមទទួលយកសំណូមពរនេះ តែលោកអះអាងថា ការដោះដូរនេះសំខាន់ទៅលើអាជ្ញាធរខេត្តជាអ្នកកំណត់ទីតាំងឲ្យ ចំណែកក្រុមហ៊ុនរង់ចាំធ្វើជូនទៅតាមសំណូមពរ។
លោក ដួង ពៅ អភិបាលរងខេត្តមានប្រសាសន៍ថា គណៈកម្មការដោះស្រាយផលប៉ះពាល់នឹងពិនិត្យមើលស្ថានភាពជាក់ស្ដែង ពីព្រោះខេត្តចង់ឲ្យបងប្អូនមានទីកន្លែងរស់នៅស្រួលជាងកន្លែងចាស់ មានសេវាគ្រប់យ៉ាងប្រើប្រាស់គ្រប់គ្រាន់ ដោយស្ថានភាពនៅខេត្តស្ទឹងត្រែងរបស់យើង រាជរដ្ឋាភិបាលកំពុងផ្តោតទៅលើការអភិវឌ្ឍគ្រប់បែបយ៉ាង។
លោក កៅ វ៉ាងអ៊ីវ តំណាងក្រុមហ៊ុនដោះស្រាយផលប៉ះពាល់បានបញ្ជាក់ថា ក្រុមហ៊ុនអនុវត្តតាមផែនការខេត្តប្រគល់ឲ្យបើបងប្អូនប្រជាពលរដ្ឋ ចង់បានកន្លែងថ្មីនោះ ក្រុមហ៊ុននឹងធ្វើជូនទៅតាមសំណូមពរ តែសូមឲ្យសម្រេចចិត្តឲ្យបានត្រឹមត្រូវទាំងអស់គ្នា កុំឲ្យមានការផ្លាស់ប្ដូរច្រើន។
សូមបញ្ជាក់ថា ការដោះស្រាយផលប៉ះពាល់ជូនប្រជាពលរដ្ឋក្រុមគណៈកម្មការរៀបចំជូនប្រជាពលរដ្ឋភូមិច្រប់ និងភូមិស្រែស្រណុករួចរាល់ ហើយបច្ចុប្បន្នកំពុងបន្តរៀបចំភូមិក្បាលរមាសនិងភូមិស្រែគរបន្តទៀត៕
ប្រជាពលរដ្ឋភូមិក្បាលរមាសតវ៉ារឿងផ្លាស់ទីលំនៅ
0 Comments