មនុស្សបីនាក់ត្រូវបានសម្លាប់ និងជាច្រើននាក់ទៀតរងរបួសនៅពេលដែលខ្មាន់កាំភ្លើងម្នាក់បានបើកការបាញ់ប្រហារ នៅឯគ្លីនិកមួយកន្លែងក្នុងរដ្ឋ Colorado នៅក្នុងការប្រឈមមុខដាក់គ្នាមួយដែលបានអូសបន្លាយអស់រយៈពេលប្រាំម៉ោងមុនពេលព្រមចុះចាញ់។
តំបន់ Colorado Springs ដែលគ្របដណ្ដប់ដោយព្រិលយ៉ាងក្រាស់គឺស្ថិតនៅក្នុងការឡោមព័ទ្ធនាពេលល្ងាចដោយមានរយៈពេលត្រឹមតែមួយថ្ងៃប៉ុណ្ណោះ បន្ទាប់ពីជនជាតិអាមេរិកាំងរាប់លាននាក់នាំគ្នាប្រារព្ធពិធីបុណ្យ Thanksgiving ហើយហេតុការណ៍ចុងក្រោយនេះបានធ្វើឲ្យសហរដ្ឋអាមេរិកកាន់តែរងសម្ពាធពីបញ្ហាគ្រប់គ្រងកាំភ្លើង។
លោកអភិបាល John Suthers បានធ្វើការកោតសរសើរចំពោះប៉ូលិស ដែលបាននាំខ្មាន់កាំភ្លើងចូលទៅក្នុងមន្ទីរឃុំឃាំង ដោយគ្មានការបង្ហូរឈាមបន្ថែមទៀត។ លោកបាននិយាយថា មន្ត្រីប៉ូលិសម្នាក់បានស្ថិតក្នុងចំណោមអ្នកស្លាប់ ខណៈមនុស្សប្រាំបួននាក់ទៀតក្នុងចំណោមនោះមានប៉ូលិសប្រាំនាក់បានរងរបួស។ ទោះបីជាយ៉ាងណាក៏ដោយ គ្មាននរណាម្នាក់ក្នុងចំណោមអ្នករងរបួសគឺស្ថិតក្នុងស្ថានភាពធ្ងន់ធ្ងរនោះទេ។
ថ្លែងនៅឯកន្លែងកើតហេតុមុនពេលការប្រឈមមុខដាក់គ្នានេះបានបញ្ចប់ អ្នកនាំពាក្យប៉ូលិសលោកស្រី Catherine Buckley បានព្រមានថា ខ្មាន់កាំភ្លើងបានយក “វត្ថុ” និងថង់នៅក្នុងអគារនោះទៅជាមួយគាត់។ ទោះយ៉ាងណាក្តី គេមិនបានដឹងទេថា តើមានមនុស្សប៉ុន្មាននាក់នៅក្នុងគ្លីនិកនោះនៅពេលមានការបាញ់ប្រហារ។
លោកស្រី Buckley បានឲ្យដឹងថា អ្នកបាញ់ប្រហារត្រូវបានប្រដាប់ជាមួយនឹងប្រភេទ “អាវុធវែង” ដូចជាកាំភ្លើង rifle ហើយសាក្សីមួយចំនួនបានរាយការណ៍ថា ពួកគេបានឮស្នូរកាំភ្លើង ស្វ័យប្រវត្តិ។
ជាមួយគ្នានោះដែរ មន្ត្រីសេតវិមានបានឲ្យដឹងថា លោកប្រធានាធិបតី បារ៉ាក់ អូបាម៉ា ត្រូវបាន ជូនដំណឹងពីកើតហេតុនេះដោយទីប្រឹក្សាផ្នែកសន្តិសុខមាតុភូមិរបស់លោកគឺលោកស្រី Lisa Monaco។
លោកស្រី Vicki Cowart ប្រធាន និងជានាយកប្រតិបត្តិនៃគ្លីនិក Rocky Mountains បាននិយាយថា ព័ត៌មានពីដំបូងរបស់នាងគឺថា គ្មាននរណាម្នាក់នៃបុគ្គលិក ឬអ្នកជំងឺរបស់នាងត្រូវបានគេសម្លាប់ ឬរងរបួសឡើយ។
លោកស្រី Cowart បាននិយាយបញ្ជាក់ថា នាងមិនជឿទេថា គ្លីនិកនេះត្រូវបានគេកំណត់គោលដៅជាពិសេស៕
AFP
មនុស្សបីនាក់ស្លាប់ ក្នុងការបាញ់ប្រហារគ្លីនិកមួយ នៅសហរដ្ឋអាមេរិក
0 Comments