ព្រឹត្តិការណ៍​ទី​១ GLF Open ITF Men’Futures២០១៥ បាន​បញ្ចប់​ហើយ

ភ្នំពេញ ៖ ការប្រកួត​កីឡា​វាយ​កូន​បាល់​ក្នុង​ព្រឹត្តិការណ៍​ទី​១ ដែល​មាន​ឈ្មោះថា GLF Open នៃ ITF Men’​Futur​e​s លើក​ទី​៥ ឆ្នាំ​២០១៥ បាន​​បញ្ចប់​ហើយ​នា​វេលា​ថ្ងៃត្រង់​ថ្ងៃទី​២៨ ខែវិច្ឆិកា​នេះ នៅ​ទីលាន​មជ្ឈ​មណ្ឌ​ល​បណ្តុះបណ្តាល​កីឡា​វាយ​កូន​បាល់​កម្ពុជា​។​ ​GLF Open នេះ សម្រាប់​វិញ្ញាសា​វាយ​ជា​ឯក​ត្ត​ជន​នោះ មាន​កីឡាករ​ចូលរួម​ចំនួន​៣២​នាក់​មកពី​កម្ពុជា១ រូប​ ក្រៅពីនោះ​មាន​ជប៉ុន​ កូរ៉េ​ នូវែល​ហ្សេឡង់ ​អា​មេ​រិក ​អាហ្សង់ទីន ចិន​តៃប៉ិ ស្រីលង្កា វៀតណាម ម៉ាឡេស៊ី ហ្វីលីពីន​ អាល្លឺម៉ង់ និង​អ៊ូ​បេ​គីស្ថាន​។​ ​ ​ ​ ​ ​ ​ ​ ​ ​ ​

​ក្នុង​ការ​ប្រកួត​វិញ្ញាសា​ឯកត្តជន​នេះ កីឡាករ​កម្ពុជា​ ម៉ម ផល្គុណ ប្រកួត​ចាញ់​ កីឡាករ​មកពី​ហ្វីលីពីន​នៅ​ជុំ​ទី១​ក្នុង ពិន្ទុ​៣ទល់​៦ និង១ទល់ ៦​។​ កីឡាក រ​Son,Ji Hoon និង កីឡាករ ​Kwon,Soon Woo ដែល​ជា​ជនជាតិ​កូរ៉េ​ទាំងពីរ​នាក់​នោះ បាន​ឡើង​មកដល់​វគ្គ​ផ្តាច់ព្រ័ត្រ​លើ​វិញ្ញាសា​នេះ បន្ទាប់ពី​ពួកគេ​ទាំង​ពីរ​លេង​ឈ្នះ​៤​ប្រកួត​ជាប់ៗ​គ្នា​នោះ។ ក្នុង​ការប្រកួត​ផ្តាច់ព្រ័ត្រ​នេះ កីឡាករ​Kwon,Soon Woo បាន​យ​ក​ឈ្នះ​កីឡាករ​កូរ៉េ​ Son,Ji Hoon ក្នុង​លទ្ធផល​៧-៥ និង ៦-១ ធ្វើ​ឲ្យ​កីឡាករ​កូរ៉េ​ Kwon Soon Woo ក្លា​យ​ជា​ជើងឯក​ឯកត្តជន​ក្នុង​ព្រឹត្តិការណ៍​ទី​១ GLF Open នៃ ITF Men’Futures ឆ្នាំ​២០១៥​នេះ។​ ​ ​ ​ ​ ​ ​

សូម​បញ្ជាក់​ថា កីឡាករ​ Kwon,Soon Woo​ នេះ មាន​អាយុ​១៧​ឆ្នាំ។ ​បច្ចុប្បន្ន​កីឡាករ​រូប​នេះ មាន​ចំ​ណាត់​ថ្នាក់​ពិភពលោក (World Ranking)១០៩២ ខណៈ​ដែល​ពីមុន​គេ​មាន​ចំណាត់ថ្នាក់​ត្រឹម​១០៧១​នោះ។ ចំណែក កីឡាករ​ Son,Ji Hoon វិញ គេ​មាន​ចំណាត់ថ្នាក់​ពិភពលោក​១៦៣៤ ហើយ​ជា​លើក​ដំបូង​របស់​គេ ដែល​បាន​ឡើង​មក​ប្រកួត​នៅក្នុង​វគ្គ​ផ្តាច់ព្រ័ត្រ​នេះ។​ ​ ​ ​ ​ ​ ​ ​ ​ ​

ចំពោះ​ការប្រកួត​វាយ​គូ​បុរស​វិញ ចំណាត់ថ្នាក់​លេខ​១ ក្នុង​ព្រឹត្តិការណ៍ GLF Open​នេះ គឺ​បាន​ទៅលើ​កីឡាករ​ចិន​តៃប៉ិ LEE,Kuan-Yi និង LIU,Shao-Fan ក្រោយពី​ពួកគេ​ទាំងពីរ​បាន​យកឈ្នះ​កីឡាករ​ជន​ជាតិ​កូរ៉េ KWON,Soon Woo​ និង SON Ji Hoon ក្នុង​វគ្គ​ផ្តាច់ព្រ័ត្រ ក្នុង​លទ្ធផល​៦-៣ និង​៦- ៤ នោះ។​នៅក្នុង​វិញ្ញាសា​វាយ​គូ​នេះ កីឡាករ​កម្ពុជា២​រូប​បាន​ចូល​លេង គឺ​កីឡាករ ​ឌឿ​ម សុជា​ភា​រុន និង​កីឡា​ករ​ ឡុង សំនៀង ប៉ុន្តែ​បាន​លេង​ចាញ់​កីឡាករ​អាល្លឺម៉ង់​ដែល​ចាប់​ដៃគូ​ជាមួយ​កីឡាករ ​ស៊ុយអែត​តាំងពី​ជុំ​ដំបូង​ម្ល៉េះ។ ហើយ​កីឡាករ​កម្ពុជា​កូនកាត់​ខ្មែរ​បារាំង ម៉ន ផល្គុណ ដែល​បាន​ចាប់​ដៃគូ​ជាមួយ​ហ្វីលីពីន​នោះ ក៏​លេង​ចាញ់​ក្នុង​វគ្គ​ជម្រុះ​ដំបូង​ដែរ ដោយ​ចាញ់​កីឡាករ​ចិន​តៃប៉ិ​ទាំងពីរ​នាក់។​ ​ ​

គួរ​បញ្ជាក់​ថា បន្ទាប់ពី​បញ្ចប់​ព្រឹត្តិការណ៍​ទី​១ GLF Open នេះ​ទៅ ITF Men’Futures នឹង​បន្ត​ការប្រកួត​ព្រឹត្តិការណ៍​ទី​២មាន​ឈ្មោះថា GLF ចម ប្រសិទ្ធ​Open ដែល​​ចាប់ផ្តើម​​ថ្ងៃ​ទី​២៨ ខែវិច្ឆិកា ដល់ ថ្ងៃទី០៥ ខែ​ធ្នូ៕​

​ ​

​

ព្រឹត្តិការណ៍​ទី​១ GLF Open ITF Men’Futures២០១៥ បាន​បញ្ចប់​ហើយ