ភ្នំពេញ ៖ ដើម្បីអបអរសាទរទិវាជនពិការកម្ពុជាលើកទី១៧ និងទិវាជនពិការអន្តរជាតិលើកទី៣៣ ឆ្នាំ២០១៥នេះ រាជរដ្ឋាភិបាលកម្ពុជាបានធ្វើការណែនាំចាត់តាំង ក្រោមប្រធានបទ «រួមគ្នាបង្កលក្ខណៈងាយស្រួលដល់ជនពិការ ដើម្បីបរិស្ថានគ្មានពិការភាព»។
សារាចរណែនាំ ស្ដីពី ការចាត់តាំងទិវាជនពិការកម្ពុជាលើកទី១៧ និងទិវាជនពិការអន្តរជាតិលើកទី៣៣ ថ្ងៃទី៣ ខែ ធ្នូ ឆ្នាំ២០១៥ ដែលចុះហត្ថលេខាដោយ សម្ដេចអគ្គមហាសេនាបតីតេជោ ហ៊ុន សែន កាលពីថ្ងៃទី២៧ ខែវិច្ឆិកា ឆ្នាំ២០១៥ បានគូសបញ្ជាក់ថា ជារៀងរាល់ឆ្នាំព្រះរាជាណាចក្រកម្ពុជាតែងប្រារព្ធទិវាជនពិការកម្ពុជា និងទិវាជនពិការអន្តរជាតិនៅថ្ងៃទី៣ ខែធ្នូ ដើម្បីរំលឹកដល់ការអនុវត្តច្បាប់ស្ដីពីកិច្ចការពារ និងលើកកម្ពស់សិទ្ធិ និងសេរីភាពជនពិការ ព្រមទាំងបង្ហាញពីការយកចិត្តទុកដាក់ខ្ពស់របស់រាជរដ្ឋាភិបាលលើវិស័យពិការភាព ជាពិសេសសុខមាលភាពបងប្អូនជនពិការកម្ពុជា ស្របតាមអនុសញ្ញាស្ដីពីសិទ្ធិជនពិការ ទសវត្សរ៍ជនពិការឆ្នាំ២០១៣-២០២២យុទ្ធសាស្ត្រអ៊ីឈាន់ (ធ្វើឲ្យសិទ្ធិក្លាយជាការពិត) ក៏ដូចជាផែនការយុទ្ធសាស្ត្រជាតិ ស្ដីពីពិការភាព ២០១៤-២០១៨។
ទិវាជនពិការអន្តរជាតិត្រូវបានប្រារព្ធឡើង ដើម្បីរំលឹកអំពីការតស៊ូទាមទារសិទ្ធិចូលរួមក្នុងសង្គមរបស់ជនពិការ ប្រមាណ ១ប៊ីលាននាក់ ស្មើនឹងចំនួន ១៥% នៃប្រជាជនសរុបក្នុងពិភពលោក ដែលជាជនបាត់បង់កាយសម្បទា កាយវិញ្ញាណ និងសតិបញ្ញា ដែលតែងតែជួបប្រទះឧបសគ្គរារាំងក្នុងជីវិតតាំងពីឆ្នាំ១៩៥០ នៅសហរដ្ឋអាមេរិក និងអឺរ៉ុប សំដៅធ្វើការផ្លាស់ប្ដូរនូវស្ថានភាពរស់នៅរបស់ពួកគេ និងបង្កើនការយល់ដឹងអំពីបញ្ហាពិការភាព ដោយផ្ដោតសំខាន់លើសិទ្ធិជនពិការ ព្រមទាំងធ្វើសមាហរណកម្មជនពិការ ទៅក្នុងសកម្មភាពនយោបាយ សេដ្ឋកិច្ច សង្គម និង វប្បធម៌។
ដោយឡែក ព្រះរាជាណាចក្រកម្ពុជាប្រារព្ធទិវាជនពិការនេះឡើង ដើម្បីរំលឹកអំពីមហាវិនាសកម្មនៃរបបប្រល័យពូជសាសន៍ ប៉ុល ពត ដែលបានបន្សល់ទុកនូវផលវិបាកជាច្រើន ក្នុងនោះរួមមាន ជនពិការ ស្ត្រីមេម៉ាយ កុមារកំព្រា គ្រាប់មីន និងកាកសំណល់ជាតិផ្ទុះសល់ពីសង្គ្រាម។ ក្រៅពីនេះប្រជាជនកម្ពុជា ក៏ប្រឈមនឹងភាពរងគ្រោះមួយចំនួនទៀតដែលនាំឲ្យមានពិការភាពដូចជា គ្រោះថ្នាក់ចរាចរណ៍ គ្រោះថ្នាក់ការងារ ពិការពីកំណើត ចាស់ជរា ជំងឺ និងមូលហេតុផ្សេងៗទៀត។
សារាចរដដែលបានបញ្ជាក់ទៀតថា ក្រសួងព័ត៌មានត្រូវសហការជាមួយក្រុមប្រឹក្សាសកម្មភាពជនពិការ ណែនាំប្រព័ន្ធឃោសនារដ្ឋ និង ឯកជនឲ្យធ្វើការផ្សព្វផ្សាយដល់សង្គមជាតិទាំងមូលឲ្យបានជ្រួតជ្រាបអំពីប្រវត្តិ និងសារៈសំខាន់នៃទិវាជនពិការកម្ពុជា និងទិវាជនពិការអន្តរជាតិ ៣ធ្នូ។ គ្រប់ក្រសួង ស្ថាប័ន រាជធានី ខេត្ត ត្រូវរៀបចំមិទ្ទិញ ពិធីជួបសំណេះសំណាលជាមួយជនពិការ កម្មវិធីកម្សាន្តសប្បាយរបស់ជនពិការ នៅតាមក្រសួង ស្ថាប័ន រាជធានី ខេត្ត គ្រឹះស្ថានសិក្សារដ្ឋ ឯកជន អង្គការមិនមែនរដ្ឋាភិបាល និងនៅតាមមណ្ឌលនានាក្នុងមូលដ្ឋានរៀងៗខ្លួន។ ក្រុមប្រឹក្សាសកម្មភាពជនពិការ ក្រសួងសង្គមកិច្ច អតីតយុទ្ធជន និងយុវនីតិសម្បទា ក្រសួងការងារ និងបណ្ដុះបណ្ដាលវិជ្ជាជីវៈ ក្រសួងសុខាភិបាល ក្រសួងអប់រំ យុវជន និងកីឡា មូលនិធិជនពិការ គណៈកម្មាធិការជាតិរៀបចំបុណ្យជាតិនិងអន្តរជាតិ សាលារាជធានីភ្នំពេញ និងស្ថាប័នពាក់ព័ន្ធ ត្រូវសហការរៀបចំមិទ្ទិញថ្នាក់ជាតិ និងរៀបចំកម្មវិធីកម្សាន្តផ្សេងៗសម្រាប់ជនពិការនៅរាជធានីភ្នំពេញ៕
សម្ដេចតេជោ ៖ ប្រធានបទទិវាជនពិការឆ្នាំនេះគឺ «រួមគ្នាបង្កលក្ខណៈងាយស្រួលដល់ជនពិការ ដើម្បីបរិស្ថានគ្មានពិការភាព»
0 Comments