បាត់ដំបង ៖ ជនសង្ស័យម្នាក់ដែលមានគំនិតប៉ុនប៉ងធ្វើឃាតមនុស្ស ព្រមទាំងបានរត់គេចខ្លួនអស់រយៈពេលជាង៤ឆ្នាំ ទីបំផុតត្រូវចូលអន្ទាក់របស់សមត្ថកិច្ចវិញ តាមអំណាចនៃដីកាបញ្ជាឲ្យចាប់ខ្លួនលេខ ៥០៤ ដបចខ ចុះថ្ងៃទី៩ ខែតុលា ឆ្នាំ២០១២ ដោយចៅក្រមស៊ើបសួរ កឹម រ៉ាវី របស់សាលាដំបូងខេត្តបាត់ដំបង។
គួរបញ្ជាក់ដែរថា កាលពីថ្ងៃទី៨ ខែមេសា ឆ្នាំ២០១១ មានជនសង្ស័យម្នាក់ឈ្មោះ ចាន់ ប្រាជ្ញ ហៅវេត ភេទប្រុស អាយុ២៤ឆ្នាំ រស់នៅភូមិអូរក្រៀត ឃុំគារ ស្រុកមោងឬស្សី ខេត្តបាត់ដំបង បានប្រើប្រាស់កាំបិតខ្វែវ កាប់ទៅលើជនរងគ្រោះឈ្មោះ នល់ នីន ភេទប្រុស អាយុ៣០ឆ្នាំ រស់នៅភូមិរាមគន់ ឃុំគារ ស្រុកមោងឬស្សី ដែលករណីនេះ បានកើតឡើងនៅចំណុចភូមិអូរ ឃុំគារ ដែលបណ្តាលឲ្យជនរងគ្រោះត្រូវរបួសជាច្រើនកាំបិត ស្ទើរស្លាប់ស្ទើររស់ ដោយរហូតមកទល់នឹងពេលនេះជនរងគ្រោះគឺមានសភាពដូចមនុស្សឆ្កួតពាក់កណ្តាល ជាពាក់កណ្តាលទៅហើយ។
លោកគិត ហ៊ាង អធិការនគរបាលស្រុកមោងឬស្សី បានបញ្ជាក់ថា ក្រោយពីទទួលបានដីការបស់តុលាការរួចមក លោកតែងតែដាក់កម្លាំងតាមឃ្លាំមើលជាប្រចាំ រហូតរយៈពេលជាង៤ឆ្នាំទើបមុខសញ្ញារូបនេះបង្ហាញខ្លួនក្នុងភូមិវិញក៏ត្រូវកម្លាំងរបស់លោកឃាត់ខ្លួនបានកាលពីវេលាម៉ោង៧ព្រឹក ថ្ងៃទី២០ ខែវិច្ឆិកា ឆ្នាំ២០១៥ ខណៈដែលមុខសញ្ញានេះបានវិលត្រឡប់ចូលក្នុងភូមិវិញ ដោយតុលាការបានចោទប្រកាន់ពីបទ ហិង្សាដោយចេតនា មានស្ថានទម្ងន់។ បច្ចុប្បន្នសមត្ថកិច្ចកំពុងរៀបចំបញ្ជូនជនសង្ស័យទៅកាន់សាលាដំបូងហើយដើម្បីមានវិធានការតាមផ្លូវច្បាប់៕
ប៉ងធ្វើឃាតមនុស្សរួចគេចខ្លួនជាង៤ឆ្នាំ ក៏ត្រូវប៉ូលិសឃាត់ខ្លួនវិញ
0 Comments