ប៉ូលិស និងទាហានអ៊ីស្រាអែលបាននិយាយថា ជនជាតិប៉ាឡេស្ទីនម្នាក់បានចាក់សម្លាប់មនុស្សពីរនាក់នៅក្នុងអគារការិយាល័យទីក្រុង Tel Aviv មួយហើយមនុស្សបីនាក់ផ្សេងទៀតត្រូវបានសម្លាប់នៅក្នុងការវាយប្រហារនៅតំបន់ West Bank កាលពីថ្ងៃព្រហស្បតិ៍។
នៅក្នុងការវាយប្រហារចុងក្រោយបំផុតនៅជិតប្លុកទីលំនៅ Gush Etzion ក្នុងតំបន់ West Bank មេបញ្ជាការប៉ូលិសម្នាក់បាននិយាយថា ជនជាតិប៉ាឡេស្ទីនម្នាក់បានបើកឡានយឺតៗតាមបណ្តោយចិញ្ចើមផ្លូវដ៏ធំមួយ ហើយបានបាញ់ប្រហារដោយសម្លាប់មនុស្សបីនាក់ និងច្រើននាក់ទៀតរងរបួស។
អ្នកនាំពាក្យប៉ូលិសលោក Micky Rosenfeld បាននិយាយថា រថយន្តរបស់អ្នកវាយប្រហារបានឈប់នៅពេលដែលវាបានបុកជាមួយរថយន្តមួយគ្រឿងផ្សេងទៀតហើយអ្នកបើកបរត្រូវបានចាប់ខ្លួន។
លោកបាននិយាយថា ជនជាតិអាមេរិកម្នាក់គឺស្ថិតក្នុងចំណោមមនុស្សបីនាក់ដែលត្រូវបានសម្លាប់។
អ្នកផ្សេងទៀតគឺជាជនជាតិប៉ាឡេស្ទីន និងជនជាតិអ៊ីស្រាអែល។
ជាមួយគ្នានោះប្រភពពីមន្ទីរពេទ្យបានឲ្យដឹងថា មនុស្សយ៉ាងហោចណាស់ប្រាំពីរនាក់ផ្សេងទៀតបានរងរបួស។ ការវាយប្រហារនេះបានធ្វើឲ្យចំនួនអ្នកស្លាប់ជាជនជាតិអ៊ីស្រាអែល និងជនជាតិផ្សេងទៀតឡើងដល់១៨នាក់រួមជាមួយជនជាតិប៉ាឡេស្ទីន៨០នាក់ នៅក្នុងអំពើហិង្សារយៈពេលប្រាំពីរសប្ដាហ៍ចុងក្រោយនេះ។
បើយោងតាមការបង្ហោះក្នុងហ្វេសប៊ុកដោយគណៈកម្មាធិការអាមេរិក-ជ្វីហ្វបានឲ្យដឹងថា ជនជាតិអាមេរិកដែលបានស្លាប់នោះគឺមានឈ្មោះ Ezra Schwartz អាយុ១៨ឆ្នាំដែលរូបគេកំពុងសិក្សានៅក្នុងប្រទេសអ៊ីស្រាអែល។ Schwartz ត្រូវបានគេនិយាយថា មកពីក្រុង Sharon រដ្ឋ Massachusetts។
ដោយឡែក នៅក្នុងការវាយប្រហារនៅទីក្រុង Tel Aviv អ្នកនាំពាក្យរបស់ប៉ូលិសម្នាក់បាននិយាយថា អ្នកប្រព្រឹត្តដែលបានវាយប្រហារលើអ្នកគោរពបូជាដែលបានប្រមូលផ្តុំគ្នាសម្រាប់ការគោរពពេលរសៀលក្នុងហាងលក់វត្ថុសាសនាជ្វីហ្វត្រូវបានចាប់ខ្លួន។
កាលពីព្រឹកថ្ងៃព្រហស្បតិ៍ យោធាបានឲ្យដឹងថា ក្មេងស្រីប៉ាឡេស្ទីនអាយុ១៥ឆ្នាំចំនួនបីនាក់បានព្យាយាម ដើម្បីជ្រៀតចូលក្នុងប៉ុស្តិ៍យោធាមួយរបស់អ៊ីស្រាអែលនៅតំបន់ West Bank។
ពួកទាហានបានចាប់ខ្លួនពួកគេ ហើយយោធាបាននិយាយថា កាំបិតចំនួនបីដើមត្រូវបានគេរកឃើញថា ជាកម្មសិទ្ធិរបស់ពួកគេ។
ប៉ូលិសបាននិយាយថា ជនជាតិប៉ាឡេស្ទីនចំនួន៤៩នាក់ក្នុងចំណោម៨០នាក់ត្រូវបានសម្លាប់នៅក្នុងរយៈពេលប៉ុន្មានសប្ដាហ៍ថ្មីៗនេះនៅនឹងកន្លែងកើតហេតុនៃការវាយប្រហារលើទឹកដីប្រទេសអ៊ីស្រាអែល ហើយអ្នកខ្លះទៀតត្រូវបានសម្លាប់នៅក្នុងការតវ៉ាហិង្សាក្នុងតំបន់ West Bank និងនៅជិតព្រំដែនតំបន់ហ្កាហ្សា៕
Reuters
មនុស្ស៥នាក់ស្លាប់ ក្នុងការវាយប្រហារដោយពួកប៉ាឡេស្ទីននៅក្រុង Tel Aviv និង West Bank
0 Comments