សៀមរាប ៖ នៅរដ្ឋបាលសាលាខេត្តសៀមរាប កាលពីថ្ងៃទី១៩ ខែ វិច្ឆិកា ឆ្នាំ២០១៥ លោក ប៊ុន ថាប្ញទ្ធិ អភិបាលរងនៃគណៈអភិបាលខេត្តសៀមរាប បាន ជួបធ្វើកិច្ចពិភាក្សាការងារជាមួយ លោក ផាក សែបុក អភិបាលក្រុងយ៉ុងដុង ក្នុងខេត្តចុងជុងបុកដូ នៃសាធារណរដ្ឋ កូរ៉េ និង សហការី ដើម្បីផ្លាស់ប្ដូរបទពិសោធន៍ និង បង្កើតទំនាក់ទំនងកិច្ចសហប្រតិបត្តិការមិត្តភាពអន្តរជាតិ ព្រមទាំងគម្រោងនៃការបណ្តុះបណ្តាលបរទេស ឧបត្ថម្ភគាំទ្រពីទីក្រុងយ៉ុងដុង នៃខេត្តចុងជុងបុកដូ ជូនដល់មន្ត្រីរាជការខេត្តសៀមរាប។
ក្នុងកិច្ចពិភាក្សានោះ លោក ប៊ុន ថាប្ញទ្ធិ ក៏បានជម្រាបដល់គណៈប្រតិភូ អំពីស្ថានភាពភូមិសាស្ត្រ សន្តិសុខសេដ្ឋកិច្ចនិងជីវភាពរស់នៅរបស់ប្រជាពលរដ្ឋខេត្តសៀមរាប។ ខេត្តសៀមរាបមានសក្ដានុពលសេដ្ឋកិច្ចសំខាន់គឺទេសចរណ៍និងកសិកម្ម ដោយខេត្តសម្បូរទៅដោយដីកសិកម្ម និងប្រាង្គប្រាសាទបុរាណល្បីល្បាញលើពិភពលោក ហើយកំពុងក្លាយជាគោលដៅទាក់ទាញភ្ញៀវទេសចរណ៍លើពិភពលោក ចូលមកទស្សនាកម្សាន្ត។ ម្យ៉ាងទៀត ប្រជាពលរដ្ឋខេត្តសៀមរាប បានពឹងផ្អែកទៅលើវិស័យកសិកម្ម និង ទេសចរណ៍ ដែលជាកត្តាសំខាន់ក្នុងការ ទ្រទ្រង់ផ្គត់ផ្គង់សេដ្ឋកិច្ចក្នុងក្រុមគ្រួសារ។ ក្នុងនោះដែរលោកប៊ុនថាប្ញទ្ធិ ក៏បានជម្រាបជូនដល់គណៈប្រតិភូផងដែរអំពីការទំនាក់ទំនង កិច្ចសហប្រតិបត្តិការអន្តរជាតិរបស់ខេត្តសៀមរាប ជាមួយបណ្តាខេត្តនៅក្នុងតំបន់អាស៊ី និង អឺរ៉ុប សំខាន់ជាមួយបណ្តាខេត្ត ក្រុងនៃសាធារណរដ្ឋកូរ៉េ ។ លោកក៏បានលើកផងដែរ អំពីកំណើននៃភ្ញៀវទេសចរ ដែលចូលមកទស្សនាកម្សាន្តនៅខេត្តសៀមរាប ដោយមានភ្ញៀវទេសចរណ៍កូរ៉េ ស្ថិតក្នុងលំដាប់លេខ២ បន្ទាប់ពីទេសចរណ៍ចិន ។ ក្នុងដំណើរទស្សនកិច្ចនៅខេត្តសៀមរាប របស់គណៈប្រតិភូនាពេលនេះ កាន់តែធ្វើឲ្យទំនាក់ទំនងកិច្ចសហប្រតិបត្តិការអន្តរជាតិកាន់តែនៅជិតគ្នាបំផុត សំខាន់ក្នុងការផ្លាស់ប្ដូរនូវបទពិសោធន៍ បណ្ដុះបណ្ដាលនូវចំណេះដឹងពីគ្នាទៅវិញទៅមកផងដែរ។
មានប្រសាសន៍នោះដែរលោក ផាក សែបុក អភិបាលក្រុងយ៉ុងដុង ក៏បានលើកឡើងពីស្ថានភាពភូមិ សាស្ត្រ សេដ្ឋកិច្ច និង ជីវភាពរស់នៅក្នុងក្រុងយ៉ុងដុង ។ លោកបានបន្តទៀតថា ក្រុងយ៉ុងដុង ជាទីកំណើតនៃក្រុម ដន្ត្រីបុរាណរបស់កូរ៉េ ហើយក៏មានប្រជាពលរដ្ឋប្រមាណ ៧២% ប្រកបរបរកសិកម្ម ក្នុងការដាំដុះដំណាំហូបផ្លែ និង ការចិញ្ចឹមត្រី ព្រមទាំងបានធ្វើការនាំចេញទៅតាមបណ្តាប្រទេសមួយចំនួន ហើយក៏ជាទីកន្លែងទទួលស្វាគមន៍ដល់ ភ្ញៀវទេសចរណ៍អន្តរជាតិផងដែរ។ លោក ផាក សែបុក ក៏បានបញ្ជាក់ពីដំណើរទស្សនកិច្ចនៅលើទឹកដីខេត្តប្រវត្តិ សាស្ត្រសៀមរាប ក្នុងការសិក្សាស្វែងយល់ ក្នុងកិច្ចទំនាក់ទំនងសហប្រតិបត្តិការអន្តរជាតិជាមួយខេត្តសៀមរាបក្នុង ការផ្តូចផ្តើមចងនូវសម្ព័ន្ធមេត្រីភាពរវាងក្រុងយ៉ុងដុង និង ខេត្តសៀមរាប។ កត្តាសំខាន់នៃកិច្ចទំនាក់ទំនងនេះ ក្រុង យ៉ុងដុក នៃខេត្ត ចុងជុងបុកដូ មានគម្រោងលើការបណ្តុះបណ្តាលបរទេស ឧបត្ថម្ភគាំទ្រពីទីក្រុងយ៉ុងដុង ជូនដល់ មន្ត្រីរាជការខេត្តសៀមរាប។ ក្នុងនោះដែរលោកនឹងធ្វើការផ្សព្វផ្សាយដល់អ្នកវិនិយោគកូរ៉េ និងប្រជាជនកូរ៉េ ចូលមកធ្វើទេសចរណ៍ និង វិនិយោគនៅកម្ពុជា សំខាន់នៅខេត្តសៀមរាប ដែលជាខេត្តសម្បូរទៅដោយសម្បត្តិវប្បធម៌ប្រវត្តិ សាស្ត្រ មានប្រាង្គប្រាសាទបុរាណល្បីល្បាញទៀតផង៕
កិច្ចផ្ដួចផ្ដើមសម្ព័ន្ធមេត្រីភាពរវាងក្រុងយ៉ុងដុង និង ខេត្តសៀមរាប
0 Comments