ស្ទឹងត្រែង ៖ ជនសង្ស័យម្នាក់ពាក់ព័ន្ធក្នុងករណីជួញដូរ ចែកចាយគ្រឿងញៀនត្រូវបានកម្លាំងអាវុធហត្ថចុះឃាត់ខ្លួនកាលពីវេលាម៉ោង១៩និង៣០នាទីយប់ ថ្ងៃទី១៩ ខែវិច្ឆិកា ឆ្នាំ២០១៥ នៅចំណុចមុខវត្តសៀមប៉ាង ស្ថិតក្នុងភូមិសៀមប៉ាង ឃុំសៀមប៉ាង ស្រុកសៀមប៉ាង ខេត្តស្ទឹងត្រែង។
ប្រធានសន្តិសុខ និងព័ត៌មានអាវុធហត្ថខេត្ត លោកវរសេនីយ៍ឯក ដួង វិចិត្របានឲ្យដឹងថា ជនសង្ស័យ ដែលសមត្ថកិច្ចឃាត់ខ្លួនមានឈ្មោះផេង សាម៉ៃ ហៅង៉ន ភេទប្រុស អាយុ២០ឆ្នាំ ជនជាតិខ្មែរ មុខរបរកសិករ មានទីលំនៅភូមិសាម៉ ឃុំសេកុង ស្រុកសៀមប៉ាង ខេត្តស្ទឹងត្រែង។
លោកវរសេនីយ៍ឯកបានឲ្យដឹងទៀតថា ការឃាត់ខ្លួនជនសង្ស័យខាងលើ គឺស្ថិតក្រោមការស៊ើបអង្កេតរបស់ជំនាញ ក្រោយពីដឹងថា ជនសង្ស័យជាមុខសញ្ញាជួញដូរចែកចាយជួញដូរគ្រឿងញៀន ហើយក្នុងពេលនោះជំនាញក៏រៀបវិធានញុះញង់ឲ្យមានការលក់ ក្រោមការឃ្លាំមើលពីសមត្ថកិច្ច ក្រោយពីជនសង្ស័យបានធ្វើសកម្មភាព។ ក្រោយមកជនសង្ស័យរូបនោះ ក៏ត្រូវបានកម្លាំងអាវុធហត្ថធ្វើការឃាត់ខ្លួនរួមជាមួយគ្រឿងញៀនប្រភេទមេតំហ្វេតាមីន(WY)ចំនួន៤០៤គ្រាប់ និងបញ្ជូនខ្លួនមកកាន់ទីបញ្ជាការអាវុធហត្ថខេត្តធ្វើការសាកសួរ។
ជនសង្ស័យបានឆ្លើយសារភាពចំពោះមុខសមត្ថកិច្ចថា គ្រឿងញៀនពិតជារបស់ខ្លួន ដែលបានទិញពីជនម្នាក់ទៀតមែន។ គ្រឿងញៀននោះ ត្រូវបានធ្វើតេស្តបឋម ដោយមានការចូលរួមពីលោកព្រះរាជអាជ្ញារង រកឃើញថា ពិតជាមានសារធាតុញៀនពិតប្រាកដមែន។
បច្ចុប្បន្នជនសង្ស័យរួមជាមួយវត្ថុតាងថ្នាំញៀន ត្រូវបានរក្សាទុកនៅទីបញ្ជាការកងរាជអាវុធហត្ថខេត្ត ដើម្បីរៀបចំសំណុំរឿងបញ្ជូនខ្លួនទៅកាន់តុលាការចាត់វិធានការតាមផ្លូវច្បាប់៕
អាវុធហត្ថឃាត់ខ្លួនជនសង្ស័យម្នាក់ជាមួយគ្រឿងញៀន៤០៤គ្រាប់
0 Comments