ភ្នំពេញ ៖ ទិវាជាតិអាហារូបត្ថម្ភលើកទី២កម្ពុជាប្រារព្ធក្រោមប្រធានបទ”ការបំបៅកូនដោយទឹកដោះម្តាយគឺជាការវិនិយោគដ៏ប្រសើរបំផុតសម្រាប់ជីវិតកូនអ្នក” កាលពីល្ងាចថ្ងៃទី៦ ខែវិច្ឆិកា ឆ្នាំ២០១៥ ក្នុងគោលបំណងបង្កើនការយល់ដឹងជាសាធារណៈអំពីសារៈសំខាន់ និងគុណប្រយោជន៍របស់ទឹកដោះម្តាយ។
ទិវានេះមានការអញ្ជើញចូលរួមពីសំណាក់ លោកឧបនាយករដ្ឋមន្ត្រី យឹម ឆៃលី ប្រធានក្រុមប្រឹក្សាស្ដារអភិវឌ្ឍន៍វិស័យកសិកម្ម និងជនបទ និងបណ្ដាក្រសួងដៃគូអភិវឌ្ឍអង្គការសង្គមស៊ីវិលរួមទាំងវិស័យឯកជនក៏បានចូលរួមគាំទ្រដល់រាជរដ្ឋាភិបាលក្នុងយុទ្ធនាការលើកកម្ពស់អាហារូបត្ថម្ភនេះដែរ។
លោកស្រីNatascha Paddison ប្រធានស្តីទីអង្គការយូនីសេហ្វប្រចាំកម្ពុជាបានមានប្រសាសន៍ថា ការបំបៅកូនដោយទឹកដោះម្តាយផ្តល់ឲ្យកុមារនូវការចាប់ផ្តើមជីវិតដ៏ល្អបំផុត។ វាជាជ្រុងមួយសម្រាប់ការរស់រានអាហារូបត្ថម្ភ និងសុខភាពល្អរួមទាំងការអភិវឌ្ឍដំណាក់កាលដំបូងរបស់ពួកគេ។
ការទទួលបានការបំបៅដោយទឹកដោះដ៏សមស្របគឺជាសិទ្ធសម្រាប់កុមារគ្រប់រូបដោយពុំមានការរើសអើងថា ពួកគេមកពីទីណាក្រ ឬមាននោះទេ។ ជាការពិតអនុសញ្ញាស្ដីពីសិទ្ធកុមារបញ្ជាក់ថា ការបំបៅកូនដោយទឹកដោះម្តាយគឺជាសមាសភាគមួយដ៏សំខាន់នៃសិទ្ធិរបស់កុមារ ដើម្បីឈានទៅសម្រេចបានស្តង់ដារ សុខភាពដ៏ខ្ពស់បំផុត។ លោកស្រីបានកត់សំគាល់ថា ចាប់តាំងពីឆ្នាំ២០០០ អត្រាម្តាយបំបៅកូនដោយទឹកដោះតែមួយគត់បានធ្លាក់ចុះពី៧៣,៥ភាគរយមកត្រឹម ៦៥ភាគរយនៅកម្ពុជា ហើយស្ថានភាពនេះកាន់តែធ្ងន់ធ្ងរទៅទៀតនៅតាមតំបន់ទីក្រុងដែលមានម្តាយត្រឹមតែ៣៨ភាគរយប៉ុណ្ណោះបានបំបៅដោះដល់កូនរបស់ពួកគេដែលមានអាយុក្រោម៦ខែ។ នេះបញ្ជាក់ថា វឌ្ឍនភាពកំពុងតែត្រលប់ថយក្រោយ និងប៉ះពាល់ដល់ការងារដ៏ធំធេងដែលរដ្ឋាភិបាលកំពុងប្រឹងប្រែងអស់រយៈពេលជិតពីរទសវត្សរ៍មកនេះ។
នាខែឧសភាឆ្នាំនេះ របាយការណ៍រួមរបស់អង្គការទស្សនៈពិភពលោក និងអង្គការហេឡែនឃែលល័រអន្តរជាតិបានបង្ហាញថា ផលិតផលជំនួសទឹកដោះម្តាយអាចរកបាននៅគ្រប់ទីកន្លែងនៅក្នុងខេត្តចំនួន៦ក្នុងប្រទេសកម្ពុជា។ របាយការណ៍បានកំណត់ថា មានផលិតផលជំនួសទឹកដោះម្តាយចំនួន១១០ប្រភេទដាក់តាំងលក់នៅលើទីផ្សារក្នុងបណ្ដាខេត្តទាំងនោះ។ ភស្តុតាងសកលលោកបញ្ជាក់យ៉ាងច្បាស់លាស់ថា កុមារដែលបំបៅដោយទឹកដោះម្តាយតែមួយមុខគត់ ទំនងជាគេចផុតពីការស្លាប់ក្នុងរយៈពេល៦ខែដំបូងនៃជីវិត១៤ដងតិចជាងកុមារដែលមិនបានបំបៅដោយទឹកដោះម្តាយតែមួយមុខគត់ ដូច្នេះយើងត្រូវដោះស្រាយបញ្ហានេះជាបន្ទាន់ដោយការប្រតិបត្តិតាមច្បាប់។ ការបំបៅកូនដោយទឹកដោះម្តាយ កាត់បន្ថយមរណភាពបានយ៉ាងច្រើនពីជំងឺ ចំបងពីរប្រភេទដែលសម្រាប់កុមារគឺរលាកផ្លូវដង្ហើម និងរាករូសស្រួចស្រាល់។
ការចាប់ផ្តើមបំបៅកូនដោយទឹកដោះម្តាយក្នុងអំឡុងមួយម៉ោងដំបូងបន្ទាប់ពីសម្រាលអាចទប់ស្កាត់មរណភាពទារកបានប្រហែល២០ភាគរយ។ ការអនុវត្តផ្តល់អាហារផ្សេងៗមុនពេលបំបៅដោះ ឬមានន័យថា ផ្តល់អាហារផ្សេងៗដល់ទារកជំនួសទឹកដោះម្តាយគឺជាឧបសគ្គមួយដែលរារាំងដល់ការឆាប់ចាប់ផ្តើមបំបៅដោះកូន។ រយៈពេលជាង៤ឆ្នាំកន្លងទៅ ប្រេវ៉ាឡង់នៃទារកទើបនឹងកើតដែលទទួលអាហារផ្សេងៗមុនពេលបំបៅដោះបានកើនឡើងចំនួន៨,៦ភាគរយ។ អត្រានេះក៏បានកើនឡើងជិតពីរដងនៅតាមតំបន់ទីក្រុង រហូតដល់ជាង៥០ភាគរយ ក្នុងឆ្នាំ២០១៤ បើធៀបនឹងឆ្នាំ២០១០មានត្រឹមតែ២៥ភាគរយប៉ុណ្ណោះ។ ការផ្តល់ទឹក ឬអាហារផ្សេងៗ មុនពេលបំបៅដោះដល់ទារកទើបនឹងកើតនាំឲ្យទារកទទួលទឹកដោះម្តាយជាលើកដំបូងយឺតយ៉ាវ និងរារាំងមិនឲ្យកុមារទទួលបានផលប្រយោជន៍ពីការបំបៅកូនដោយទឹកដោះម្តាយ។
លោកឧបនាយករដ្ឋមន្ត្រី យឹម ឆៃលី ប្រធានក្រុមប្រឹក្សាស្ដារអភិវឌ្ឍន៍វិស័យកសិកម្មនិងជនបទបានមានប្រសាសន៍ក្នុងនាមជាសេនាធិការជូនរាជរដ្ឋាភិបាល ក្រុមប្រឹក្សាស្ដារអភិវឌ្ឍន៍វិស័យកសិកម្មនិងជនបទមានភារកិច្ចចំបង៣ធំៗក្នុងការសម្របសម្រួលរៀបចំគោលនយោបាយ យុទ្ធសាស្ត្រ និងអនុវត្តន៍កម្មវិធីទាក់ទងនិងការអភិវឌ្ឍវិស័យកសិកម្ម និងជនបទ នៅកម្ពុជាលើការងារអន្តរវិស័យបី ទី១ សន្តិសុខស្បៀង និងអាហារូបត្ថម្ភ ទី២ ការគាំពារសង្គមសំរាប់ជនក្រីក្រ និងជនងាយរងគ្រោះនិងទី៣ ការងារជំរុញចលនាភូមិមួយផលិតផលមួយដែលភារកិច្ចធំៗទាំង៣ នេះនឹងបន្តកិច្ចសហការយ៉ាងជិតស្និទ្ធជាមួយនឹងក្រសួង ស្ថាប័ន ពាក់ព័ន្ធរដ្ឋបាលថ្នាក់ក្រោមជាតិដៃគូអភិវឌ្ឍ អង្គការសង្គមស៊ីវិល និងផ្នែកឯកជន ដើម្បីធ្វើការសម្របសម្រួលរៀបផែនការសកម្មភាពការងារ ថវិកា ការអនុវត្តគម្រោង និងតាមដាន ពិនិត្យ វាយតម្លៃ ក្នុងគោលបំណងរួមចំណែកលើកកម្ពស់សេវាសង្គម និងការអភិវឌ្ឍសេដ្ឋកិច្ចគ្រួសារ ដើម្បីគុណភាពជីវិត និងការរស់នៅរបស់ប្រជាជននិងធ្វើឲ្យកម្ពុជាសម្រេចបានតាមគោលដៅនៃយុទ្ធសាស្ត្រចតុកោណ ដំណាក់កាលទី៣នៃនីតិកាលទី៥របស់រាជរដ្ឋាភិបាល។
ដោយឡែកនៅក្នុងទិវាជាតិអាហារូបត្ថម្ភលើកទី២កម្ពុជាប្រារព្ធក្រោមប្រធានបទ”ការបំបៅកូនដោយទឹកដោះម្តាយគឺជាការវិនិយោគដ៏ប្រសើរបំផុតសម្រាប់ជីវិតកូនអ្នក” ធ្វើឡើងក្នុងគោលបំណងបង្កើនការយល់ដឹងជាសាធារណៈអំពីសារៈសំខាន់ និងគុណប្រយោជន៍របស់ទឹកដោះម្តាយ។ ដោយសារការបំបៅកូនដោយទឹកដោះម្តាយនេះបានរួមចំណែកផ្តល់នូវអត្ថប្រយោជន៍ជាច្រើនដល់ស្ត្រីជាម្តាយ និងទារកទើបកើត ទាំងផ្នែកសុខភាព បញ្ញា និងស្មារតី ព្រមទាំងផ្តល់ដល់ទារកនូវការចាប់ផ្តើមជីវិតដ៏ល្អសម្រាប់អនាគតរបស់ពួកគេ គ្រួសារគេ និងសង្គមជាតិយើងទាំងមូល៕
ទិវាជាតិអាហារូបត្ថម្ភលើកទី២កម្ពុជាប្រារព្ធក្រោមប្រធានបទ”ការបំបៅកូនដោយទឹកដោះម្តាយគឺជាការវិនិយោគដ៏ប្រសើរបំផុតសម្រាប់ជីវិតកូនអ្នក”
0 Comments