រុស្ស៊ីបានបញ្ចេញប្រតិកម្មដោយកំហឹងបន្ទាប់ពីទស្សនាវដី្តរបស់បារាំងបានចុះផ្សាយគំនូរចំអកនៃយន្តហោះដឹកអ្នកដំណើររបស់រុស្ស៊ីដែលធ្លាក់ក្នុងប្រទេសអេហ្ស៊ីប។ ប្រព័ន្ធផ្សព្វផ្សាយសង្គមនៅក្នុងប្រទេសរុស្ស៊ីបានផ្ទុះកំហឹងដោយសាររូបភាពនេះ ខណៈដែលអ្នកប្រើប្រាស់បានថ្កោលទោសចំពោះការបោះពុម្ពផ្សាយរបស់ទស្សនាវដី្ត Charlie Hebdo។
អ្នកប្រើប្រាស់ Twitter ម្នាក់បានសួរថា ហេតុអ្វីបានជាបុគ្គលិករបស់ទស្សនាវដី្ត Charlie Hebdo មិនបោះពុម្ពរូបថ្លុករបស់សមាជិកខ្លួនដែលត្រូវបានបាញ់សម្លាប់ដោយក្រុមជីហាដនិយមក្នុងទីក្រុងប៉ារីសកាលពីខែមករា។
អ្នកខ្លះទៀតបាននិយាយថា មនុស្សគួរតែចាប់ផ្តើមកុំអើពើចំពោះការបង្កហេតុគួរខ្ពើមទាំងនេះ ខណៈអ្នកបង្កើតរបស់ពួកគេកំពុងព្យាយាមបង្កប្រតិកម្ម។
អ្នកនាំពាក្យវិមានក្រឹមឡាំងលោក Dmitry Peskov បានហៅរូបថ្លុកដែលផ្សព្វផ្សាយដោយទស្សនាវដី្ត Charlie Hebdo នេះថាជា “ការប្រមាថ”។
លោកបាននិយាយថា “មិត្តរួមការងាររបស់ខ្ញុំ និងខ្ញុំបានព្យាយាមរកគំនូរចំអកនៃអ្នកកាសែតនៅក្នុងទស្សនាវដី្ត Charlie Hebdo ដែលត្រូវបានបាញ់សម្លាប់ដោយពួកភេរវករ។ យើងមិនអាចរកឃើញពួកវាបានទេ។ ប៉ុន្តែប្រសិនបើពួកគេត្រូវបានបោះពុម្ពមែននោះ វាក៏នឹងជាការប្រមាថផងដែរ”។
ទោះបីជាយ៉ាងណាក៏ដោយនិពន្ធនាយកទស្សនាវដ្តី Charlie Hebdo លោក Gerard Briard បានប្រាប់វិទ្យុបារាំង RFI ថា “យើងបានអត្ថាធិប្បាយលើព័ត៌មាននេះដូចដែលបណ្ដាញផ្សព្វផ្សាយដទៃទៀតបានធ្វើគ្មានតួអង្គចំអកនៅលើរូបគំនូរទាំងនេះទេ។ យើងគ្រាន់តែផ្ដល់មតិយោបល់លើព្រឹត្តិការណ៍នេះ និងបានបង្ហាញពីទស្សនៈផ្ទាល់ខ្លួនរបស់យើង”។
គួរបញ្ជាក់ថា រូបថ្លុកទីមួយបានបង្ហាញពីផ្នែកខ្លះនៃយន្តហោះ និងអ្នកធ្វើដំណើរកំពុងធ្លាក់ចុះមកដីខណៈពេលដែលសកម្មប្រយុទ្ធក្រុមរដ្ឋឥស្លាមម្នាក់ដែលប្រដាប់ដោយកាំភ្លើងបានអោនចុះដើម្បីគេចពីកម្ទេចកំទីដែលកំពុងធ្លាក់។
នៅខាងក្រោមរូបគំនូរចំអកនេះមានសរសេរថា “ក្រុមរដ្ឋឥស្លាម៖អាកាសចរណ៍របស់ប្រទេសរុស្ស៊ីបានបង្កើនការទម្លាក់គ្រាប់បែករបស់ខ្លួន”។
រូបទីពីរបានបង្ហាញពីលលាដ៍ក្បាលមួយ និងយន្តហោះដែលកំពុងឆេះនៅលើដីដោយមានសរសេរថា “គ្រោះថ្នាក់ដែលមានតម្លៃទាបរបស់ប្រទេសរុស្ស៊ី។ ខ្ញុំគួរតែយកកូកាអ៊ីនទៅតាមអាកាស”។
អ្នកនិពន្ធបានលើកឡើងបែបនេះ គឺចង់សំដៅទៅលើអាកាសយានិកជនជាតិបារាំងពីរនាក់ដែលបានរត់គេចខ្លួនពីសាធារណរដ្ឋដូមីនិក ដើម្បីគេចវេសពីការចាប់ខ្លួនពីបទព្យាយាមដឹកគ្រឿងញៀនចំនួន៦៨០គីឡូក្រាម៕
RT
រុស្ស៊ីខឹងសម្បារបន្ទាប់ពីទស្សនាវដ្តី Charlie Hebdo បោះពុម្ពផ្សាយរូបគំនូរចំអកនៃការធ្លាក់យន្តហោះ
0 Comments