កំពង់ឆ្នាំង ៖ នាព្រឹកថ្ងៃទី២៧ ខែវិច្ឆិកា ឆ្នាំ២០១៥ នៅសាលប្រជុំសាលាខេត្តកំពង់ឆ្នាំង មានបើកកិច្ចប្រជុំផ្សព្វផ្សាយផែនការណែនាំស្ដីពីការរៀបចំកែលំអសោភ័ណភាពដើម្បីត្រៀមលក្ខណៈរៀបចំបុណ្យឆ្លងឆ្នាំសកល និងបុណ្យជ័យជំនះ៧មករា១៩៧៩-៧មករា២០១៥ខាងមុខនេះឲ្យមានលក្ខណៈល្អប្រសើរ។
កិច្ចប្រជុំនេះប្រព្រឹត្តទៅក្រោមអធិបតីភាពលោក ឈួរ ច័ន្ទឌឿន អភិបាលខេត្តកំពង់ឆ្នាំងដោយមានការអញ្ជើញចូលរួមពីលោក លោកស្រី ប្រធានមន្ទីរអង្គភាពជុំវិញខេត្ត និងអភិបាលក្រុង/ស្រុកទាំង៨ចូលរួមផងដែរ។
លោក ឈួរ ច័ន្ទឌឿន អភិបាលខេត្តកំពង់ឆ្នាំងបានមានប្រសាសន៍លើកឡើងថា ដើម្បីឲ្យប្រជាពលរដ្ឋបានសប្បាយរីករាយនៅក្នុងឱកាសបុណ្យឆ្លងឆ្នាំសកល និងបុណ្យជ័យជំនះ៧មករា១៩៧៩-៧មករា២០១៥ គឺត្រូវធ្វើការកែលំអសោភ័ណភាពដោយមានដាក់បណ្ដាពាក្យស្លោកចងទង់ជាតិតាំងភ្លើងពណ៌តាមអង្គភាពទីសាធារណៈគ្រប់ទីកន្លែង ជាពិសេសត្រូវដាក់ភ្លើងពណ៌នៅតាមផ្លូវសាធារណៈឲ្យមានភាពស្រស់បំព្រងក្នុងក្រុងកំពង់ឆ្នាំង និងធ្វើអនាម័យឲ្យមានបរិស្ថានល្អប្រសើរនៅតាមទីសាធារណៈនាៗក្នុងខេត្តត្រៀមរៀបចំគ្រប់ទីកន្លែងសម្រាប់បាញ់កាំជ្រួច រៀបចំតន្ត្រីច្រៀងកម្សាន្ត ,ត្រៀមរៀបចំការប្រកួតបាល់ទាត់ពានរង្វាន់៧មករាប្រចាំខេត្តកំពង់ឆ្នាំង និងត្រូវធានាសុវត្ថិភាពឲ្យបានល្អក្នុងឱកាសបុណ្យឆ្លងឆ្នាំសកល និងបុណ្យជ័យជំនះ៧មករា១៩៧៩-៧មករាឆ្នាំ២០១៥ខាងមុខនេះឲ្យមានសុវត្ថិភាព និងស្ថិរភាពល្អជូនប្រជាពលរដ្ឋដើរលេងកម្សាន្ត ជៀសវាងកើតមានអំពើហិង្សាផ្សេងៗ ជាពិសេសធ្វើយ៉ាងណាកាត់បន្ថយឲ្យបាននូវគ្រោះថ្នាក់ចរាចរណ៍។
លោក ឈួរ ច័ន្ទឌឿន អភិបាលខេត្តកំពង់ឆ្នាំងបានមានប្រសាសន៍ផ្ដាំផ្ញើដល់មន្ទីរអង្គភាពពាក់ព័ន្ធនឹងអភិបាលក្រុង/ស្រុកក្នុងខេត្ត ដើម្បីឲ្យការប្រារព្ធពិធីបុណ្យឆ្លងឆ្នាំសកល និងបុណ្យជ័យជំនះ៧មករា១៩៧៩-៧មករាឆ្នាំ២០១៥ សម្រេចបានជោគជ័យគ្រប់ស្ថាប័នពាក់ព័ន្ធទាំងអស់ ត្រូវត្រៀមលក្ខណៈ និងសហការគ្នាឲ្យបានជិតស្និទ្ធចាប់ផ្ដើមរៀបចំបានក្រោយពេលប្រជុំនេះទៅដល់ពេលប្រារព្ធពិធីទទួលបានប្រសិទ្ធភាពខ្ពស់ធ្វើឲ្យពិធីមានលក្ខណៈល្អប្រសើរតាមផែនការដែលបានគ្រោងទុក៕
ប្រជុំផ្សព្វផ្សាយផែនការរៀបចំកែលំអសោភ័ណភាព និងត្រៀមលក្ខណៈរៀបចំបុណ្យឆ្លងឆ្នាំសកល
0 Comments