ភ្នំពេញ ៖ សមាជិកក្រុមប្រឹក្សាខណ្ឌព្រែកព្នៅ ស្នើឲ្យរដ្ឋបាលខណ្ឌជួយដោះស្រាយផ្លូវចាស់ ដែលមានទទឹងត្រឹម៤ម៉ែត្រ និងបណ្ដោយជាង២០០ម៉ែត្រឲ្យបានផ្លូវទទឹង៨ម៉ែត្រតាមការសំណូមពរដែលប្រជាពលរដ្ឋនៅក្នុងភូមិសំរោង សង្កាត់សំរោងចង់បាន និងទី២សុំផ្អាករណ្ដៅដីនៅក្នុងវត្តប្រសិទ្ធីរីមារាម ក្នុងសង្កាត់ពន្សាំង ដែលជីកលើសពីតម្រូវការ។
ក្នុងការស្នើសុំនេះដែរ សមាជិកក្រុមប្រឹក្សាខណ្ឌបានលើកឡើងនៅក្នុងកិច្ចប្រជុំសាមញ្ញលើកទី១៨ អាណត្តិទី២ របស់ក្រុមប្រឹក្សា នាព្រឹកថ្ងៃទី២៧ ខែវិច្ឆិកា ឆ្នាំ២០១៥នេះ នៅសាលាខណ្ឌព្រែកព្នៅអំពីប្រជាពលរដ្ឋពួកគាត់បានលើកឡើងអំពីផ្លូវចាស់ដែលមានត្រឹមទទឹង៤ម៉ែត្រ និងបណ្ដោយជាង២០០ឲ្យបានផ្លូវទទឹង៨ម៉ែត្រតាមការសំណូមពរដែលប្រជាពលរដ្ឋនៅក្នុងភូមិសំរោង សង្កាត់សំរោង ចង់បាន និងទី២សុំផ្អាករណ្ដៅដីនៅក្នុងវត្តប្រសិទ្ធី រីមារាម ដែលជីកលើសពីតម្រូវការទាំងជម្រៅ និងទំហំចូលដីប្រជាពលរដ្ឋ។
ឆ្លើយតបទៅនឹងសំណើនេះ លោក យ៉ិន អ៊ីម ចៅសង្កាត់សំរោងបានលើកឡើងថា ផ្លូវដែលប្រជាពលរដ្ឋស្នើសុំនោះ បើតាមសេអី ផ្លូវនោះមានតែទទឹង៤ម៉ែត្រ និងបណ្ដោយជាង២០០ម៉ែត្រប៉ុណ្ណោះ តែបើតាមលោកចុះទៅសម្រុះសម្រួលជាមួយម្ចាស់ស្រៈដែលបានទិញពីប្រជាពលរដ្ឋកន្លងទៅនោះ គេព្រមចំណាយឲ្យកាត់ដី២ម៉ែត្ររបស់គេឲ្យបានផ្លូវនោះទៅជាទទឹង៦ម៉ែត្រ តែបើឲ្យគេកាត់ដីរបស់គេ៤ម៉ែត្រនោះ ដើម្បីបានផ្លូវទទឹង៨ម៉ែត្រ គឺគេមិនយល់ព្រមឡើយទៅតាមតម្រូវការរបស់ប្រជាពលរដ្ឋនោះឡើយ។
ក្នុងខណៈនោះដែរ លោកស្រី ឌី សារៀម ចៅសង្កាត់ពន្សាំងក៏បានលើកឡើងដែរថា ស្រៈដែលប្រជាពលរដ្ឋតវ៉ាមិនឲ្យក្រុមហ៊ុនជីកបន្ថែម ព្រោះវាមានជម្រៅ និងទំហំលើសពីការគ្រោងទុកនោះ គឺលោកស្រីបានទៅប្រាប់ម្ចាស់អាជីវកម្មហើយ ដើម្បីកុំឲ្យជីកបន្តទៀត។
នៅក្នុងឱកាសនោះដែរ លោក សុខ សម្បតិ អភិបាល នៃគណៈអភិបាលខណ្ឌព្រែកព្នៅបានមានប្រសាសន៍ថា ការដោះស្រាយផ្លូវក្នុងភូមិសំរោង សង្កាត់សំរោង និងការសុំផ្អាករណ្ដៅដីនៅក្នុងវត្តប្រសិទ្ធីរីមារាម ដែលជីកលើសពីតម្រូវការនោះ លោកមិនទាន់បានទទួលព័ត៌មានពីសង្កាត់ទាំង២នោះឡើយ ហើយចាប់ពីពេលនេះទៅ លោកនឹងជំរុញការងារនេះឲ្យបានឆាប់ តាមដែលអាចធ្វើទៅបាន។
លោកបន្តថា តាមបណ្ដាសង្កាត់ទាំងអស់ ត្រូវតែផ្តល់ព័ត៌មាន បើទោះជារឿងនោះតូចក៏ដោយ ធំក៏ដោយ មិនត្រូវទុក្ខដោះស្រាយតែត្រឹមសង្កាត់ ហើយដោះស្រាយមិនចេញទើបរុញឲ្យខណ្ឌនោះទេ ត្រូវតែរាយការណ៍ទាំងអស់។
ជាចុងក្រោយ លោកក៏បានលើកទិសដៅ និងវិធានការ ដល់អង្គប្រជុំ ត្រូវខិតខំ យកចិត្តទុកដាក់ រួមគិត រួមពិនិត្យ រួមធ្វើឲ្យល្អលើគ្រប់វិស័យក្នុងខណ្ឌរបស់យើងដើម្បីអនុវត្តតាមគោលនយោបាយចតុកោណដំណាក់កាលទី២ និងទី៣របស់រាជរដ្ឋាភិបាល ក្រោមការដឹកនាំរបស់សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលសព្វថ្ងៃនេះ បាននិងកំពុងដឹកនាំនាវាកម្ពុជាលើមាគ៌ាអភិវឌ្ឍន៍រីកចម្រើនលើគ្រប់វិស័យនោះ៕
ក្រុមប្រឹក្សា ស្នើឲ្យរដ្ឋបាលខណ្ឌជួយដោះស្រាយផ្លូវ និងរណ្ដៅដីដែលជីកលើសពីតម្រូវការ
0 Comments