ភ្នំពេញ ៖ លោកជា ចំរើន ដែលគេស្គាល់ថាសកលវិទ្យាធិការ នៃសកលវិទ្យាល័យចំរើនពហុបច្ចេកវិទ្យា និងទើបតែធ្វើលិខិតលាឈប់ពីគណបក្សប្រជាជនកម្ពុជាកាលពីពេលថ្មីៗនេះ បានប្រកាសបើកគណបក្សមួយ ដែលមានឈ្មោះថា«កម្ពុជា សេរីភាព» ហើយលោកជា ចំរើន នឹងប្រកាសជាផ្លូវការនៅក្នុងសន្និសីទសារព័ត៌មាននាវេលាម៉ោង៣រសៀលនេះនៅសណ្ឋាគារសាន់វ៉េ។
សូមបញ្ជាក់ថា លោកជា ចំរើន បានលាលែងពីគណបក្សប្រជាជនកម្ពុជាកាលពីពេលថ្មីៗនេះ ហើយសម្ដេចវិបុលសេនាភក្ដី ក៏បានចុះហត្ថលេខាយល់ព្រមឲ្យលោកជា ចំរើន លាលែងពីគណបក្សផងដែរ។ ទោះជាយ៉ាងណាការលាឈប់ពីគណបក្សប្រជាជនកម្ពុជារបស់លោកជា ចំរើន មិនត្រូវបានបញ្ជាក់មូលហេតុឲ្យបានច្បាស់លាស់ថាបណ្ដាលមកពីបញ្ហាអ្វីនោះទេ គេគ្រាន់តែចាប់អារម្មណ៍សម្ដីរបស់លោកជា ចំរើន ដែលបានសរសេរលើបណ្ដាញហ្វេសប៊ុករបស់ខ្លួនថា ជំងឺដែលពិបាកក្នុងការព្យាបាលបំផុតគឺជំងឺលាបពណ៌គ្នា ជំងឺក្ដិចត្រួយ ជំងឺច្រណែន ជំងឺបង្កើតពាក្យចចាមអារ៉ាម សម្លាប់គេឯង ដែលធ្វើឲ្យខ្មែរបែកបាក់សាមគ្គី ហើយអ្នកឈ្នះគឺបរទេស។
រហូតមកដល់ថ្ងៃប្រកាសបង្កើតគណបក្ស«កម្ពុជា សេរីភាព»នេះ គេមិនដែលឮលោកជា ចំរើន ប្រកាសអំពីការបង្កើតគណបក្សណាមួយនោះទេ ប៉ុន្តែជាញឹកញាប់គេឃើញលោកជា ចំរើន បង្ហោះរូប ដែលអង្គុយទទួលទានអាហារជាមួយកញ្ញាធី សុវណ្ណថា ដែលគេដឹងថាជាអ្នកគាំទ្រគណបក្សសង្គ្រោះជាតិ៕
លោកជា ចំរើន បង្កើតគណបក្សមួយឈ្មោះថា «កម្ពុជា សេរីភាព»
0 Comments