កណ្តាល ៖ បទល្មើសជលផលកើតមាននៅស្រុកលើកដែក ខេត្តកណ្តាលនៅក្នុងតំបន់អតីតឡូត៍ ១០.១១.១២ ជ្រកក្រោមលេសសហគមន៍។
ចំណែកមន្ត្រីជំនាញជលផលសង្កាត់និងផ្នែករដ្ឋបាលជលផលរកាកោងសម្ងំចាំទទួលផលពីបទល្មើសយ៉ាងត្រជាក់ចិត្ត ទោះបីឃើញថា ឧបករណ៍នេសាទត្រីទាំងនោះ ត្រូវបានច្បាប់ហាមឃាត់ក៏ដោយចុះ គឺធ្វើយ៉ាងណាឲ្យតែបានលុយ ចង់មច្ឆាជាតិត្រូវរលាយហិនហោច ក៏មិនខ្ចីខ្វល់ដែរ។
ប្រជាពលរដ្ឋរស់នៅឃុំក្អមសំណរ បានរៀបរាប់ឲ្យដឹងថា របាំងព្រួលយ៉ាងរឹងមាំជាច្រើនកន្លែងនៅក្នុងតំបន់អតីតឡូត៍លេខ១០.១១.១២ មានទ្រង់ទ្រាយដូចគ្នាទៅនឹងអតីតឡូត៍ កាលពីមុនអីចឹង។
និយាយរួម ក្រុមអ្នកប្រព្រឹត្តបទល្មើសជលផលសព្វថ្ងៃនេះ គឺជាមនុស្សដង្ខៅឡូត៍កាលពីមុនទាំងអស់។
ប្រជាពលរដ្ឋរស់នៅស្រុកលើកដែក បានលើកឡើងដូចៗគ្នាថា ប្រមុខរាជរដ្ឋាភិបាលកាត់រំសាយ ឡូត៍នេសាទនៅទូទាំងប្រទេសប្រគល់ឲ្យរាស្ត្រនេសាទត្រីជាលក្ខណៈគ្រួសារដើម្បីដោះស្រាយជីវភាពគ្រួសារ តែលទ្ធផលតំបន់អតីតឡូត៍ ដែលកាត់រំសាយនៅតែធ្លាក់ក្នុងកណ្តាប់ដៃអតីតដង្ខៅឡូត៍ដដែល គ្រាន់តែប្តូររូបភាពមកជ្រកក្រោមដំបូលសហគមន៍ប៉ុណ្ណោះ។
ហេតុនេះធ្វើឲ្យមន្ត្រីជំនាញជលផល គ្រប់លំដាប់ថ្នាក់នៅតែមានឱកាសទទួលលុយពីបទល្មើសជលផលដដែល។ ក្នុងករណីនេះធ្វើឲ្យសមត្ថកិច្ច អាជ្ញាធរដែនដី ពិសេសមន្ត្រីជំនាញ ឃុបឃិតគ្នាទៅជាធ្លុងមួយ នៅពីក្រោយខ្នងបទល្មើសបណ្តែតបណ្តោយ ឲ្យកើតមានបទល្មើសយ៉ាងអានាធិបតេយ្យ ពេញដែនដីខ្លួនគ្រប់គ្រង។
ក្នុងករណីនេះប្រជាពលរដ្ឋ ទទូចស្នើសុំឲ្យសម្តេចនាយករដ្ឋមន្ត្រីហ៊ុន សែន ចាត់វិធានការដុះខាត់មន្ត្រីជំនាញខិលខូចមួយដំបរស្វានេះផង៕
បទល្មើសជលផលកើតឡើងយ៉ាងអានាធិបតេយ្យនៅស្រុកលើកដែក
0 Comments