ផល សោ​ភ័​ណ្ឌ​ និង​ម៉ន សា​ម៉េ​ត​ជួប​ថៃ​នៅ​សង្វៀន​ស្ទឹងមានជ័យ​

អ្នក​ប្រដាល់​ជើង​ខ្លាំង​របស់​កម្ពុជា​២​រូប គឺ​ផល សោ​ភ័​ណ្ឌ ក្លិប​តា​ឡី​ដំរី​មាន​រិ​ទ្ធ និង​ម៉ន​សា​ម៉េ​ត ក្លិប​ការិយាល័យ​ទី​៥ កងទ័ពជើងគោក ត្រូវ​តស៊ូ​ជាមួយ​អ្នក​ប្រដាល់​ថៃ ក្នុង​កម្មវិធី​ប្រដាល់​ខា​រ៉ា​បាវ នា​យប់​ថ្ងៃអាទិត្យ​ទី​២២​វិច្ឆិកា​នេះ នៅ​លើ​សង្វៀន​បាយ័ន​ស្ទឹងមានជ័យ។

ផល សោ​ភ័​ណ្ឌ គេ​នឹង​ត្រូវ​ជួប​អ្នក​ប្រដាល់​ថៃ​ឈ្មោះ​Shaming Death ក្នុង​ទម្ងន់​៦៣,៥០០​គីឡូក្រាម ។ អ្នក​ប្រដាល់​ថៃ​រូប​នេះ មិន​ធ្លាប់​មក​ប្រកួត​ជាមួយ​អ្នក​ប្រដាល់​ខ្មែរ​ទេ​កន្លងមក ។​

Shaming Death អ្នក​ប្រដាល់​ថៃ​រូប​នេះ ជា​អ្នក​ប្រដាល់​មិនធម្មតា​នោះ​ឡើយ។ នេះ​បើតាម​អ្នក​ផ្គូផ្គង​ប្រចាំ​សង្វៀន​បាយ័ន​ស្ទឹងមានជ័យ និយាយ​ឲ្យ​ដឹង។ អ្នក​ប្រដាល់​ថៃ Shaming Death មាន​ប្រវត្តិ​ប្រកួត​និង​បទពិសោធន៍​លើ​រេញ​ច្រើន​គួរសម​ដែរ។

ផល សោ​ភ័​ណ្ឌ ជា​លើក​ទី​១៤ របស់​គេ​ហើយ ដែល​ជួប​ប្រកួត​ជាមួយ​ថៃ​នេះ​។ កាលពី​ថ្ងៃទី​០៧​វិច្ឆិកា​កន្លងមកនេះ សោ​ភ័​ណ្ឌ​បាន​ផ្តួល​អ្នក​ប្រដាល់​ថៃ​ឈ្មោះ Phlav Fai អោយ​សន្លប់​ក្នុង​ទឹក​ទី​២ បន្ទាប់ពី​អ្នក​ប្រដាល់​ថៃ​នោះ ត្រូវ​មួយ​កែង​បត់​ឆ្វេង​របស់​សោ​ភ័​ណ្ឌ​ចំ​គុម្ព​ថ្គាម​នោះ ។ សម្រាប់​លើក​នេះ ពុំ​ដឹងថា​សោ​ភ័​ណ្ឌ​អាច​ជួប​សំណាង​បែបនេះ​ទៀត ឬក៏​អត់​នោះទេ ? ។

ផល សោ​ភ័​ណ្ឌ គេ​មាន​ប្រវត្តិ​ប្រកួត​ចំនួន ៩៤​លើក ឈ្នះ​៨៣​លើក និង​ចាញ់​១១​លើក មិនដែល​ស្មើ ហើយ​ធ្លាប់​ផ្តួល​គូប្រកួត​អោយ​សន្លប់​លើ​រេញ​ចំនួន​២៣​លើក​។ ចាំមើល រវាង​ផល សោ​ភ័​ណ្ឌ និង អ្នក​ប្រដាល់​ថៃ Shaming Death តើន​រណា​ជា​អ្នកឈ្នះ​នោះ ?។

ចំពោះ អ្នក​ប្រដាល់​ម៉ន សា​ម៉េ​ត ម្ចាស់​ខ្សែក្រវាត់​ស្រា​បៀរ​កម្ពុជា​ទម្ងន់​៥៧ គីឡូក្រាម ក្លិប​ការិយាល័យ​ទី​៥ កងទ័ពជើងគោក នឹងត្រូវ​ស្វាគមន៍​អ្នក​ប្រដាល់​ថៃ​ឈ្មោះ​Chhork Mong kon ដោយ​ប្រកួត​ក្នុង​ទម្ងន់​៥៩​គីឡូក្រាម ។

ជា​លើក​ទី​៦ សម្រាប់​ម៉ន សា​ម៉េ​ត​ហើយ ដែល​បាន​ជួប​ប្រកួត​ជាមួយ​ថៃ​នេះ ។ សា​ម៉េ​ត​ជួប​ថៃ​Anuwat Rifoney​លើក​ទី​១​នោះ (១៩​មេសា​២០១៤) គេ​វាយ​ចាញ់​ដោយ​ពិន្ទុ លើក​ទី​២​គេ​វាយ​ចាញ់​ថៃ​Kleng Kit ក្នុង​ទឹក​ទី​៣ លើក​ទី​៣​វាយ​ឈ្នះ​Kung Sayam​ដោយ​ពិន្ទុ លើក​ទី​៤​វាយ​ស្មើ​ជាមួយ​Rung Sen Chhai និង​លើក​ទី​៥ សា​ម៉េ​ត​វាយ​ចាញ់​Super Sam​ដោយ​ពិន្ទុ​។ ដូច្នេះ​លើក​នេះ មិនដឹងថា​សា​ម៉េ​ត​អាច​យកឈ្នះ​Chhork Mongkon ឬក៏​អត់​នោះទេ​? ។ សា​ម៉េ​ត មាន​ប្រវត្តិ​ប្រកួត​១២៣​លើក ក្នុងនោះ​វាយ​ឈ្នះ​៩១​លើក ចាញ់​២៧​លើក និង​ស្មើ​០៤​លើក។

Chhork Mongkon​អ្នក​ប្រដាល់​ថៃ​នេះ មិន​ធ្លាប់​មក​ប្រកួត​នៅ​សង្វៀន​ភ្នំពេញ​ទេ​កន្លងមក ។ អ្នក​ប្រដាល់​ថៃ​រូបនេះ ប្រកួត​ខ្លាំង​គួរសម​ដែរ​មិនជា​អន់​នោះឡើយ ប៉ុន្តែ​យ៉ាងណា​Chhork Mongkon មិនជា​លើ​សា​ម៉េ​ត​ប៉ុន្មាន​ទេ គឺអាច​ស៊ីសង​គ្នា​បាន។

ចាំមើល រវាង​Chhork Mongkon និង ម៉ន សា​ម៉េ​ត តើន​រណា​ជា​អ្នកឈ្នះ​នៅក្នុង​ការជួប​ប្រកួត​គ្នា​នេះ ? ។

ចំពោះ​ការប្រកួត​រវាង​អ្នក​ប្រដាល់​រួម​ជាតិ​វិញ ផង់ សា​មា​ឡេ អ្នក​ប្រដាល់​ស្រករ​ក្រោយ​នៃ​ក្លិប​នាគរាជ​មានជ័យ ត្រូវគេ​ផ្គូ​អោយ​ជួប​ប្រកួត​ជាមួយ​ឡាញ់ ផល្លា អ្នក​ប្រដាល់​ក្លិប​អេ ភូ​ថង​កីឡា ។ ពីរ​នាក់​នេះ ប្រកួត​គ្នា​ក្នុង​ទម្ងន់​៥៧​គីឡូក្រាម ។

​

ឡាញ់ ផល្លា ក៏​ជា​អ្នក​ប្រដាល់​ស្រករ​ក្រោយ​ដែរ ។ ផល្លា ប្រកួត​ចុងក្រោយ​នេះ វាយ ឈ្នះ​អាន សុផល អ្នក​ប្រដាល់​ក្លិប​សុភា​នូ​មានជ័យ​ក្នុង​ទឹក​ទី​១ ។​ឯ ការប្រកួត​ចុងក្រោយ​របស់​ផង់ សា​មា​ឡេ​វិញ គឺ​វាយ​ចាញ់​ចាន់ រ៉ា​ដេ​ត អ្នក​ប្រដាល់​ក្លិប​និរោធ​មានជ័យ​ក្នុង​ទឹក​ទី​៣​។ ផង់ សា​មា​ឡេ តាម​ការរំពឹងទុក​នោះ ទំនងជា​មិនអាច​ប្រកួត​ឈ្នះ​ឡាញ់ ផល្លា នោះ ឡើយ ៕

ផល សោ​ភ័​ណ្ឌ​ និង​ម៉ន សា​ម៉េ​ត​ជួប​ថៃ​នៅ​សង្វៀន​ស្ទឹងមានជ័យ​