លោក Jose Mourinho មានជំនឿចិត្តយ៉ាងមុតមាំថា អវត្តមានរបស់លោកពីទឹកដី Britannia នឹងមិនប៉ះពាល់ដល់ទម្រង់លេងរបស់ក្រម Chelsea ជាដាច់ខាត ខណៈដែលពួកគេចង់បញ្ឈប់ភាពត្រដាបត្រដួសរបស់ខ្លួន នៅការប្រកួតបាល់ទាត់ក្នុងស្រុក Premier League ពេលជួបជាមួយក្រុម Stoke City នៅចុងសប្តាហ៍នេះ។
សូមបញ្ជាក់ថា អ្នកចាត់ការរបស់ក្លិបតោខៀវរូបនេះ នឹងត្រូវបាត់មុខពីក្រុមរបស់គាត់ ខណៈដែលលោកទទួលបានបម្រាមមួយប្រកួត មិនឲ្យចូលក្នុងពហុកីឡដ្ឋាន បន្ទាប់ពីមានការប៉ះទង្គិចរបស់គាត់ជាមួយអាជ្ញាកណ្តាល Jon Moss អំឡុងការប្រកួតចាញ់ កាលពីពេលថ្មីៗនេះ ជាមួយក្រុម West Ham។
បរាជ័យលើកនេះ នឹងដាក់សម្ពាធបន្ថែមទៀត លើគ្រូបង្វឹកសញ្ជាតិព័រទុយហ្គាល់ម្នាក់នេះ បើទោះបីជាមានជ័យជម្នះ កាលពីពាក់កណ្តាលសប្តាហ៍កន្លងទៅ នៅការប្រកួត Champions League លើក្រុម Dynamo Kiev ក៏ដោយ។
ជ័យជម្នះនេះដែរ បានកើតមានឡើង បន្ទាប់ពីលោក Mourinho និងប្រធានក្រុមរបស់ពួកគេ គឺកីឡាករ John Terry ត្រូវបានគេបង្ខំឲ្យច្រានចោល ចំពោះសេចក្តីរាយការណ៍ថា អ្នកចាត់ការម្នាក់នេះ បានបាត់បង់ការគាំទ្រពីក្រុមរបស់គាត់អស់រលីងហើយ។
តែយ៉ាងណាក៏ដោយ នៅពេលនេះ លោក Mourinho គ្រាន់តែសង្ឃឹមថា កីឡាករទាំងអស់នឹងចេះរួបរួមគ្នាឡើងវិញ និងបោះជំហានទៅរកភាពជោគជ័យជាថ្មីម្តងទៀត បើទោះពួកគេឈរ នៅលេខរៀងទី ១៥ នៅលើតារាង Premier League ក៏ដោយ។
លោក Mourinho បាននិយាយថា លោកគិតថា ក្រុមកីឡាករទាំងអស់ដឹងច្បាស់ថា គួរធ្វើបែបណា ពេលគ្មានវត្តមានរបស់លោក ហើយពួកគេនឹងដឹងច្បាស់ថា គួរលេងបែបណាទើបអាចរកបានជ័យជម្នះ។
ខណៈនេះដែរ លោក Mourinho បាននិយាយការពារថា ក្រុមរបស់គាត់កាន់តែលេងបានល្អប្រសើរជាងមុនហើយ ប៉ុន្តែដោយសារចំណាត់ថ្នាក់ក្រុមអន់ខ្លាំងពេក ទើបធ្វើឲ្យមានសម្ពាធខ្លាំងបែបនេះ៕
លោក Jose Mourinho នៅតែមានជំនឿចិត្តលើជោគជ័យរបស់ក្រុម Chelsea
0 Comments