កីឡាករក្រុមស្វាយរៀងអែហ្វស៊ី ដែលកំពុងហ្វឹកហាត់នៅប្រទេសអង់គ្លេស ពោលគឺក្នុងសាលា Brooke House College នឹងទៅទស្សនាការប្រកួតផ្ទាល់លើទីលាន Old Trafford នៅរាត្រីថ្ងៃសៅរ៍ ទី៧ ខែវិច្ឆិកា ឆ្នាំ២០១៥នេះ ក្នុងការប្រកួតរវាងក្រុមម្ចាស់ផ្ទះ Manchester United ជាមួយក្រុម West Bromwich Albion វេលាម៉ោង១០យប់(ម៉ោងនៅកម្ពុជា) ក្នុងវគ្គសន្សំពិន្ទុនៃពានរង្វាន់បាល់ទាត់លីកកំពូលអង់គ្លេស (Barclays Premier League)។
កីឡាករដែលស្វាយរៀងបានបញ្ជូនកីឡាករទាំង៨នាក់ដែលមានឈ្មោះចេញទៅហ្វឹកហាត់លើទឹកដីប្រទេសល្បីខាងបាល់ទាត់នៅតំបន់អឺរ៉ុបមួយនេះមានកីឡាករ អឿន ប៊ីលី, ផន ភារ៉ា, ឡាយ រស្មី, គន្ធា រ៉ាវ៉ាន់, គឹម ហាប់, អោម ឧត្តម, អ៊ុក វ៉ាន់ណេ និងទេព វានាកុមារពិទូរ្យ ក្រោមការដឹកនាំពីសំណាក់លោក សុក វាសនា និងលោក សំអែល ណាសា អតីតកីឡាករជម្រើសជាតិកម្ពុជា។
លោក សុក វាសនា គ្រូបង្វឹកក្រុមយុវជនរបស់ក្លិបស្វាយរៀងអែហ្វស៊ី ដែលកំពុងតែស្នាក់នៅនិងហ្វឹកហាត់នៅប្រទេសអង់គ្លេសរយៈពេលជាង២សប្ដាហ៍បានប្រាប់ថា «ជំទាវ ជុំ ស្រីទូច នាយកក្រុមហ៊ុន RTV Tours បានចេញថ្លៃសំបុត្រចូលទស្សនាឲ្យយើងទាំងអស់គ្នាបានចូលមើលការប្រកួតរបស់ក្រុមលំដាប់ពិភពលោកមួយនេះ»។
លោកបានបន្ថែមទៀតថា ការហ្វឹកហាត់នៅទីនោះមានទាំងហ្វឹកហាត់លើទីលានផង និងហ្វឹកហាត់ជាទ្រឹស្ដីផង ដោយមានបែងចែកកាលវិភាគត្រឹមត្រូវ។ ប៉ុន្តែកូនក្រុមរបស់លោកជួបបញ្ហាមួយចំនួនដូចជា បញ្ហាអាកាសធាតុត្រជាក់ខ្លាំង និងកម្លាំងនៅខ្សោយ។
យោងតាមប្រភពមកពីក្លិបស្វាយរៀងអែហ្វស៊ីបានលើកឡើងថា ក្រុមទាំងមូលនឹងត្រឡប់មកប្រទេសកម្ពុជាវិញនៅថ្ងៃទី១៦ ខែវិច្ឆិកា ឆ្នាំ២០១៥ខាងមុខ បន្ទាប់ពីបញ្ចប់ការហ្វឹកហាត់រួមគ្នានៅទីនោះរយៈពេលជាង២សប្ដាហ៍រួចមក។
ការហ្វឹកហាត់នឹងធ្វើឡើងនៅក្នុងសាលា Brooke House College ដែលមានទីតាំងក្នុងទីក្រុង Leicester ប្រទេសអង់គ្លេស។
សម្រាប់គម្រោងស្នើសុំទៅហ្វឹកហាត់នៅខាងអង់គ្លេស គឺតាមរយៈក្រុមហ៊ុនRTV Tours ដែលមានកូនប្រុសរបស់លោកជំទាវ ស៊ុយ សុផាន់ ឈ្មោះ តាន់ រិទ្ធីវិវឌ្ឍន៍។ រិទ្ធីវិវឌ្ឍន៍ ជាយុវជនថ្នាលស្វាយរៀង ហើយគេកំពុងសិក្សា និងហ្វឹកហាត់នៅទីនោះ ព្រមទាំងហ្វឹកហាត់ផងបានស្នើសុំទៅសាលាដើម្បីនាំមិត្តរួមក្រុមទៅហ្វឹកហាត់តែម្ដង។ នេះជាការបណ្ដុះបណ្ដាលធនធានកីឡាករកម្រិតអន្តរជាតិរបស់ក្លិបស្វាយរៀងអែហ្វស៊ី ក្រោមការជួយជ្រោមជ្រែងយ៉ាងសកម្មពីឯកឧត្ដម ឌី វិជ្ជា ជាប្រធាន ខណៈនៅកម្ពុជាមិនទាន់មានក្លិបណាបញ្ជូនកីឡាករទៅហ្វឹកហាត់នៅតំបន់អឺរ៉ុបឡើយនាពេលកន្លងមក៕
កីឡាករស្វាយរៀង កំពុងហ្វឹកហាត់នៅអង់គ្លេស និងចូលទស្សនាប្រកួតរវាង Man Utd ជាមួយ West Brom នៅរាត្រីថ្ងៃសៅរ៍នេះ
0 Comments