ភ្នំពេញ ៖ កម្លាំងសមត្ថកិច្ចនគរបាលខណ្ឌសែនសុខ បានចាប់ខ្លួនបុរស៤នាក់ក្នុងពេលដាច់ដោយឡែកពីគ្នា ពាក់ព័ន្ធការជួញដូរថ្នាំញៀន និងប្រើប្រាស់អាវុធខុសច្បាប់ កាលពីកាលពីល្ងាចថ្ងៃទី១៧ និងព្រឹកថ្ងៃទី១៨ខែធ្នូ ឆ្នាំ២០១៥ នៅក្នុងសង្កាត់ភ្នំពេញថ្មី និងសង្កាត់ទឹកថ្លា បន្ទាប់ពីឆែកឆេរពួកគេរកឃើញ ថ្នាំញៀន និងឧបករណ៍ប្រើប្រាស់ព្រមទាំងអាវុធខ្លីច្នៃ១ដើមផង។
ក្រុមជនដែលត្រូវបានចាប់ខ្លួនទាំង៤នាក់ ដែលត្រូវបានចាប់ខ្លួនខាងលើមាន២ក្រុម ក្រុមទី១មាន៣នាក់ ចាប់ខ្លួនកាលពីម៉ោង១៦និង៣០នាទីល្ងាចថ្ងៃទី១៧ និងព្រឹកថ្ងៃទី១៨ ខែធ្នូ ឆ្នាំ២០១៥នៅបន្ទប់ផ្ទះជួលជាន់ទី២ភូមិទឹកថ្លា សង្កាត់ទឹកថ្លា រកឃើញថ្នាំញៀនចំនួន១កញ្ចប់ធំ និង៣កញ្ចប់តូច រួមទាំងឧបករណ៍ប្រើប្រាស់មួយចំនួន និងចាប់ខ្លួនមេខ្លោង ម្នាក់ឈ្មោះ ព្រំ ឧកញ៉ា អាយុ៣២ឆ្នាំ គ្មានមុខរបរ មានទីលំនៅភូមិរោងចក្រ សង្កាត់ភ្នំពេញថ្មី និងមកស្នាក់នៅផ្ទះជួលខាងលើ ជាមួយបក្ខពួកគេ២នាក់ទៀតឈ្មោះ លី ពិសល អាយុ៣១ឆ្នាំនិងឈ្មោះ លី ពិសិដ្ឋ អាយុ៣៣ឆ្នាំ។
ក្រុមទី២ ចាប់ខ្លួនបានម្នាក់នៅវេលាម៉ោង១១ព្រឹក នាថ្ងៃទី១៨ ខែធ្នូ ឆ្នាំ២០១៥ នៅតំបន់ផ្សារទីប្រជុំជន នៅភូមិទំនប់ សង្កាត់ភ្នំពេញថ្មី ចាប់ខ្លួនបនម្នាក់ដកហូតថ្នាំញៀនបាន២កញ្ចប់ធំ និង១កញ្ចប់តូចនិងកាំភ្លើងខ្លីកែច្នៃឈមួយដើមបាញ់គ្រាប់កង់ ដែលលាក់ទុកក្នុងកាបូបស្ពាយ ពេលកំពុងជិះម៉ូតូ តាមផ្លូវ មកប៉ះសមត្ថកិច្ចកំពុងយាមល្បាត។
លោក វរសេនីយ៍ឯក ម៉ក់ ហុង អធិការនគរបាលខណ្ឌសែនសុខ បានមានប្រសាសន៍ថា ក្រុមជនជាប់ចោទទាំង៤នាក់ខាងលើ ជាមុខសញ្ញាជួញដូរថ្នាំញៀន និងប្រើប្រាស់អាវុធខុសច្បាប់ ហើយពួកគេ និងត្រូវបញ្ជូនទៅតុលាការផ្ដន្ទាទោសតាមច្បាប់៕
ប៉ូលិសខណ្ឌសែនសុខ បង្ក្រាបមុខសញ្ញា ជួញដូរថ្នាំញៀនបាន៤នាក់ ដកហូតថ្នាំញៀន៦កញ្ចប់ និងអាវុធខ្លីច្នៃមួយដើម
0 Comments