បន្ទាយមានជ័យ ៖ ស្របពេលដែលប្រជាកសិករសម្រុកធ្វើស្រែប្រាំង ជាតម្រូវការចាំបាច់សម្រាប់យកទឹកស្រោចស្រព និងពលរដ្ឋកណ្ដាលទីរួមខេត្តបន្ទាយមានជ័យ ដែលអាស្រ័យលើស្ទឹងសិរីសោភ័ណតែមួយគត់ ដើម្បីប្រើប្រាស់បានក្លាយទៅជាបញ្ហាប្រឈមយ៉ាងសំខាន់សម្រាប់អាជ្ញាធរខេត្តដោះស្រាយរហូតឈានដល់ការបិទទប់ទឹកស្ទឹងសិរីសោភ័ណ។
ឆ្លើយតបនឹងបញ្ហាប្រឈមនេះ កាលពីចុងសប្ដាហ៍កន្លងទៅនេះ លោក លី សារី អភិបាលរងខេត្តបន្ទាយមានជ័យបានដឹកនាំមន្ត្រីជំនាញ និងអាជ្ញាធរក្រុងសង្កាត់ តាមរយៈការចាត់តាំងរបស់អភិបាលខេត្ត និងការបញ្ជាយ៉ាងយកចិត្តទុកដាក់ពីសំណាក់លោកនាយឧត្តមសេនីយ៍ កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន និងជាប្រធានក្រុមការងារថ្នាក់ជាតិចុះជួយខេត្តបន្ទាយមានជ័យលើបញ្ហាកង្វះទឹករបស់ប្រជាកសិករ និងពលរដ្ឋបានពិនិត្យជាក់ស្ដែងលើស្ថានភាពទឹកស្ទឹងសិរីសោភ័ណ ដែលកំពុងតែរីងស្ងួត។
ការចុះពិនិត្យនេះ គឺដើម្បីរាយការណ៍ជូនអភិបាលខេត្ត និងថ្នាក់ជាតិរហូតដល់ឈានដល់ការចាក់ដីបិទទប់ទឹកស្ទឹងខាងលើជាបណ្ដោះអាសន្ន ដើម្បីឲ្យខាងធនធានទឹកលើកគម្រោងធ្វើទ្វារទឹកសម្រាប់ពលរដ្ឋក្នុងក្រុងប្រើប្រាស់។
លោកបន្តទៀតថា ក្រុងសិរីសោភ័ណ និងស្រុកមង្គលបូរី ដែលមានព្រំប្រទល់ជាប់គ្នាបានប្រឈមនិងបញ្ហាកង្វះទឹកប្រើប្រាស់ រយៈពេល២ឆ្នាំមកហើយ គឺឆ្នាំ២០១៤ និង ឆ្នាំ២០១៥។ ដូច្នេះទើបខេត្ត ដាក់វិធានការទប់ទឹកស្ទឹង ដើម្បីប្រជាពលរដ្ឋបានប្រើប្រាស់គ្រប់គ្រាន់នៅរដូវប្រាំងខាងមុខនេះ។
ក្រុមការងារមន្ទីរជំនាញដែលក្នុងនោះមាន លោក ហួត តុងឡាយ តំណាងក្រុមហ៊ុនទឹកស្អាតសិរីសោភ័ណបានលើកឡើងថា ក្នុងមួយថ្ងៃក្រុមហ៊ុនបានផលិតទឹកចេញពីស្ទឹងសិរីសោភ័ណ ដែលជាប្រភពតែមួយសម្រាប់ផ្គត់ផ្គង់ដល់ប្រជាពលរដ្ឋក្នុងទីរួមក្រុងបាន ពី១៥.០០០ទៅ២០.០០០ម៉ែត្រគូប ហើយការទប់ទឹកស្ទឹងពីសំណាក់អាជ្ញាធរខេត្ត លោកសង្ឃឹមថា ឆ្នាំ២០១៦ខាងមុខនេះនឹងមិនខ្វះទឹកប្រើប្រាស់ទេ។
ជាមួយនឹងបញ្ហាខាងលើ ប្រជាពលរដ្ឋក្នុងក្រុងសិរីសោភ័ណ និងប្រជាពលរដ្ឋស្រុកមង្គលបូរី ដែលធ្វើស្រែប្រាំង កំពុងតែទាមទាររៀងខ្លួន ដោយខាងកសិករធ្វើស្រែប្រាំង បើគ្មានទឹកស្រោចស្រព ពួកគាត់នឹងវ័ណ្ឌកគ្មានលុយសងថ្លៃជី និងគ្មានថវិកាផ្គត់ផ្គង់ការរស់នៅដោយសារតែស្រូវខូច។ ចំណែកពលរដ្ឋក្រងសិរីសោភ័ណនិយាយថា បើគ្មានទឹកប្រើប្រាស់ពួកគាត់នឹងលំបាកដូចគ្នា ហើយអាចស្លាប់ ព្រោះទឹកមានសារៈសំខាន់សម្រាប់មនុស្ស។
គួរបញ្ជាក់ផងដែរថា ប្រជាពលរដ្ឋក្រុងសិរីសោភ័ណ រស់ និងអាស្រ័យលើទឹកស្ទឹងសិរីសោភ័ណដែលព័ទ្ធជុំវិញក្រុង៕
កង្វះទឹកស្រោចស្រពស្រែប្រាំង និងការខ្វះទឹក សម្រាប់ប្រើប្រាស់កំពុងជាបញ្ហាប្រឈមរបស់ខេត្តបន្ទាយមានជ័យឈានដល់ការបិទទប់ទឹកស្ទឹង
0 Comments