បាត់ដំបង ៖ យុវជនម្នាក់ដែលជាមុខសញ្ញាចែកចាយគ្រឿងញៀន ត្រូវបានសមត្ថកិច្ច នៃអធិការដ្ឋាននគរបាលស្រុកកំរៀងធ្វើការឃាត់ខ្លួនកាលពីថ្ងៃទី១៨ ខែធ្នូ ឆ្នាំ២០១៥ វេលាម៉ោង១២ថ្ងៃត្រង់ នៅចំណុចភូមិស្វាយធំ ឃុំបឹងរាំង ស្រុកកំរៀង ខេត្តបាត់ដំបង ខណៈដែលមុខសញ្ញារូបនេះកំពុងធ្វើសកម្មភាពចែកចាយគ្រឿងញៀនជាក់ស្ដែង។
គួររំលឹកដែរថា ជនសង្ស័យរូបនេះមានឈ្មោះ ឡេង សម្បត្តិ ភេទប្រុស អាយុ២៩ឆ្នាំ ស្នាក់នៅបណ្ដោះអាសន្នជាមួយបង នៅត្រង់ចំណុចខាងលើ ដោយមានអាសយដ្ឋាននៅភូមិទួលតាឯក សង្កាត់ទួលតាឯក ក្រុងបាត់ដំបង ហើយក៏ជាមុខសញ្ញាដែលទើបនឹងចេញពីគុកប្រមាណជាងមួយខែកន្លងទៅនេះ ពាក់ព័ន្ធនឹងករណីចែកចាយគ្រឿងញៀនបែបនេះដែរ ដូច្នេះមានន័យថាគេមិនបានរាងចាលឡើយ។
តាមការអះអាងពីសមត្ថកិច្ចបានបញ្ជាក់ថា ក្រោយពីទទួលបានព័ត៌មានភ្លាម កម្លាំងបានចេញប្រតិបត្តិការទៅកាន់ចំណុចខាងលើ ដោយបានឃាត់ខ្លួនជនសង្ស័យរូបនេះ ព្រមទាំងបានដកហូតនូវគ្រឿងញៀនប្រភេទម៉ាទឹកកកចំនួនមួយកូនថង់ ស្មើនឹង០,៣៨ក្រាម កាំភ្លើងកែច្នៃមួយដើម ដាវសាំម៉ូរ៉ៃមួយដើម និងលុយចំនួន៤ម៉ឺនរៀល(លុយធ្នាក់)។
ក្រោយពេលឃាត់ខ្លួន ជនសង្ស័យរូបនេះបានសារភាពថា រូបគេពិតជាបានរកស៊ីមុខរបរនេះមែន គឺទាំងមុនជាប់គុក និងក្រោយពេលចេញពីគុកវិញ។ ដោយយោងទៅលើចម្លើយសារភាព សមត្ថកិច្ចបានបញ្ជូនខ្លួនជនសង្ស័យរូបនេះ រួមទាំងវត្ថុតាងទៅកាន់ការិយាល័យជំនាញ នៃស្នងការដ្ឋាននគរបាលខេត្តហើយ ដើម្បីចាត់ការបន្តតាមផ្លូវច្បាប់៕
រួចពីគុកជាងមួយខែរឿងគ្រឿងញៀន ឥឡូវវិលចូលគុកវិញដដែល
0 Comments