Ad Code

ប៉ូលិស​ឃាត់ខ្លួន​ជនជាតិ​អ៊ីតាលី​ម្នាក់​ ពី​បទ​វាយ​កម្ទេច​ទូ​ATM​ព្រោះ​ដក​លុយ​មិនបាន



ភ្នំពេញ​ ៖ ​ជនជាតិ​អ៊ី​តាលី​ម្នាក់ទៀត​ ត្រូវ​បាន​កងកម្លាំង​នគរបាល​ប៉ុស្តិ៍​ផ្សារ​ថ្មី​៣​ ឃាត់ខ្លួន ​បន្ទាប់ពី​ជនបរទេស​រូប​នោះ​បាន​វាយកម្ទេច​ទូ​ATM​របស់​ទូ​ធនាគារ​ABA​ ព្រោះតែ​ខឹង​ដក​លុយ​មិនបាន​ ហើយ​ត្រូវ​លេប​កាត​របស់​ខ្លួន​ចូល​ទៅ​បាត់​នោះ​។

ហេតុការណ៍​នោះ ​បាន​កើតឡើង​នៅ​ថ្ងៃទី​២៩ ខែឧសភា ឆ្នាំ​២០១៨ វេលា​ម៉ោង​១៦​និង៤៥នាទី ដោយកម្លាំង​ប៉ុស្តិ៍​នគរបាល​រដ្ឋបាល​ផ្សារ​ថ្មី​ទី​៣ នៃ​អធិការដ្ឋាន​នគរបាល​ខណ្ឌដូនពេញ បាន​ឃាត់ខ្លួន​ជនសង្ស័យ​ម្នាក់ ពី​បទ​ធ្វើ​ឲ្យ​ខូចខាត​ដោយ​ចេតនា​(​វាយ​កញ្ចក់​ទូ​ATM​ របស់​ធនាគារ​ABA​បណ្តាល​ឲ្យ​បែក​) នៅ​ចំណុច​ផ្លូវ​លេខ​១៧២ កែង​ផ្លូវ​លេខ​៥១ ភូមិ​ទី​១១ សង្កាត់​ផ្សារ​ថ្មី​ទី​៣ ខណ្ឌដូនពេញ​រាជធានី​ភ្នំពេញ។

សមត្ថកិច្ច​ប៉ុស្តិ៍​រដ្ឋបាល​ផ្សារ​ថ្មី​៣ ​នៃ​អធិការ​នគរបាល​ខណ្ឌ​ដូនពេញ​បាន​ឲ្យ​ដឹងថា​ ជនសង្ស័យ​ត្រូវ​ឃាត់ខ្លួន​ឈ្មោះ​PATELLA CHRISTIAN ភេទ​ប្រុស អាយុ​៤០​ឆ្នាំ ជនជាតិ​អ៊ីតាលី មុខរបរ​ទេសចរណ៍​កាន់​លិខិតឆ្លងដែន​លេខ​YA៥៧៩១១៤៨​ស្នាក់នៅ​សណ្ឋាគារ​Saravoan​នៅ​ទីតាំង​លេខ​៤៣​ផ្លូវ​លេខ​១៧៨​ ស​ង្កាត់​ជ័យ​ជ័យជំនះ ​ខណ្ឌដូនពេញ​។



ចំណែក​ជនរងគ្រោះ​ឈ្មោះ ផុន សុភា ភេទ​ប្រុស អាយុ​២៦​ឆ្នាំ​ជនជាតិខ្មែរ មុខរបរ​បុគ្គលិក​ធ​នាគារ​ABA តំណាង​ឲ្យ​ធនាគារ​ABA មាន​ទីលំនៅ​ផ្ទះ​ជួល ផ្លូវលំ​សង្កាត់​ទឹកថ្លា ខណ្ឌ​សែន​សុខ រាជធានី​ភ្នំពេញ​។

ប្រភព​ព័ត៌មាន​ពី​កន្លែង​កើតហេតុ​បាន​ឲ្យ​ដឹងថា ​នៅ​មុន​ពេល​កើតហេតុ​គេ​ឃើញ​ជនបរទេស​ជនជាតិ​អ៊ីតាលី​នោះ​ ពេល​ចេញពី​ផឹក​បាន​ដើរ​សំដៅ​មក​ទូ​ATM(ABA)​ដោយ​ប្រើ​កាត​ធនាគារ​របស់​ថៃ​មក​ស៊ក ​ដើម្បី​ដក​ប្រាក់​តែ​ដក​មិនបាន ហើយ​ទូ​នោះ​មិន​ខ្ជាក់​កាត​មិន​វិញ​ធ្វើ​ឲ្យ​ជនបរទេស​រូប​នោះ​ខឹង​ក៏​វាយ​បំបែក​កញ្ចក់​ទូ​នោះ​តែម្តង​។

ប្រភព​ព័ត៌មាន​បា​នប​ន្ត​ទៀត​ថា ​ក្នុង​ខណៈ​នោះ​ដែរ​ កម្លាំង​សន្តិសុខ​ប្រចាំការ​នៅ​ទូ​ATM​នោះ​ក៏បាន​រាយ​ការណ៍​ប្រាប់​សមត្ថកិច្ច​មូលដ្ឋាន​ឲ្យ​ចុះ​មក​នាំ​ខ្លួន​បញ្ជូន​ទៅ​អធិការដ្ឋាន​នគរបាល​ខណ្ឌដូនពេញ​ដើម្បី​កសាង​សំណុំរឿង​តាម​នីតិ​វិធី៕

 



Source: Kampuchea Thmey Daily

Post a Comment

0 Comments

Close Menu