ភ្នំពេញ ៖ លោក ពេជ្រ កែវមុនី អភិបាលនៃគណៈអភិបាលខណ្ឌមានជ័យ បានដឹកនាំកម្លាំង ចុះរៀបចំសណ្តាប់ធ្នាប់តាមដងផ្លូវក្នុងមូលដ្ឋាន ដើម្បីទប់ស្កាត់ការរំលោភយកចិញ្ចើមផ្លូវយកទៅធ្វើជាកន្លែងលក់ដូរ។
ជាក់ស្តែងនៅព្រឹកថ្ងៃទី៣១ ខែឧសភា នេះ លោកអភិបាលខណ្ឌបានចុះរៀបចំសណ្តាប់ធ្នាប់តាមបណ្តោយផ្លូវជាតិលេខ១ ចាប់ពីរង្វង់មូលក្បាលថ្នល់ ដល់មុខសាលាខេត្តកណ្តាល ក្នុងទឹកដីសង្កាត់ចាក់អង្រែលើ និងសង្កាត់ចាក់អង្រែក្រោម ដោយរួមទាំងលើកតម្រង់ក្បាលនាគចែកទ្រូងផ្លូវ ដែលត្រូវបានរថយន្តធុនធំបើកបំបុកឲ្យខ្ទាតរប៉ាត់រប៉ាយលើទ្រូងផ្លូវ ដែលងាយនឹងគ្រោះថ្នាក់ពេលដែលអ្នកធ្វើដំណើរជិះទៅបុក។លោក ពេជ្រ កែវមុនី បានធ្វើការណែនាំដល់បងប្អូនប្រជាពលរដ្ឋដែលរស់នៅតាមសង្ខាងផ្លូវ សូមចូលរួមថែរក្សាបរិស្ថាន ដោយមិនត្រូវយកសំរាមដាក់គរមុខផ្ទះមុនពេលដែលរថយន្តដឹកសំរាមមិនទាន់មកដល់ឡើយ គឺវាអាចប៉ើងរប៉ាត់រប៉ាយពេញលើផ្លូវ។ ដូច្នេះគួរតែរង់ចាំរថយន្តដឹកសំរាមមកដល់ចាំយកចេញទៅឲ្យកម្មករប្រមូលសំរាមលើកដាក់ក្នុងរថយន្ត។
ចំពោះការរំលោភយកចិញ្ចើមផ្លូវដាក់លក់អីវ៉ាន់នោះ គឺលោកអភិបាលបញ្ឈប់ការណែនាំទៀតហើយ ដោយតម្រូវឲ្យកម្លាំងសន្តិសុខសាលាខណ្ឌលើកយកទៅសាលាខណ្ឌ និងឲ្យធ្វើកិច្ចសន្យាត្រឹមត្រូវមុនពេលប្រគល់ឲ្យវិញ។ ប៉ុន្តែបើមិនព្រមស្តាប់តាមការណែនាំ ឬនៅបន្តការដាក់លក់លើចិញ្ចើមផ្លូវសាលាខណ្ឌនឹងរឹបអូសយកទៅរក្សាទុក ដោយមិនប្រគល់ឲ្យវិញ រួមទាំងសំយាបផ្ទះដែលបំពានសង់លយមកលើផ្លូវទៀតនោះ។ក្នុងឱកាសនោះដែរ លោក ពេជ្រ កែវមុនី ក៏បានសំណូមពរដល់បងប្អូនប្រជាពលរដ្ឋ ត្រូវនាំគ្នារក្សាទុកចិញ្ចើមផ្លូវមុខផ្ទះកុំរំលោភបំពានឲ្យសោះ ព្រោះចិញ្ចើមផ្លូវសម្រាប់ទុកអ្នកថ្មើរជើងបានធ្វើដំណើរចៀសវាង ពួកគាត់ធ្វើដំណើរលើទ្រូងផ្លូវងាយនឹងគ្រោះថ្នាក់ដល់អាយុជីវិត៕
Source: Kampuchea Thmey Daily
0 Comments