ភាពស្ងប់ស្ងាត់ បានវិលត្រឡប់ទៅតំបន់ហ្គាហ្សាស្ទ្រីប និងសហគមន៍អ៊ីស្រាអែល ដែលនៅក្បែរនោះវិញ កាលពីថ្ងៃពុធ បន្ទាប់ពីការផ្ទុះអំពើហិង្សាអាក្រក់បំផុតចាប់តាំងពីសង្គ្រាមឆ្នាំ២០១៤ បានធ្វើឲ្យមានការព្រួយបារម្ភអំពីជម្លោះមួយទៀត នៅក្នុងតំបន់ដែលមានពលរដ្ឋប៉ាឡេស្ទីនឈឺចាប់។
នៅឯអង្គការសហប្រជាជាតិ, បេសកជនប្រចាំតំបន់មជ្ឈឹមបូព៌ាលោក Nickolay Mladenov បានព្រមានក្រុមប្រឹក្សាសន្តិសុខថា ការកើនឡើងនេះបង្ហាញថា យើងជិតទៅដល់សង្គ្រាមហើយ។
ការបាញ់តបតគ្នាកាលពីថ្ងៃអង្គារនិងឈានដល់ព្រឹកថ្ងៃពុធបានចាប់ផ្តើមជាមួយនឹងការវាយប្រហារដោយគ្រាប់រ៉ុក្កែតនិងកាំភ្លើងត្បាល់ចូលទៅក្នុងទឹកដីអ៊ីស្រាអែលចេញពីតំបន់ហ្គាហ្សា។
អ៊ីស្រាអែលនិយាយថា ខ្លួនបានតម្រង់គោលដៅទៅលើទីតាំងសកម្មប្រយុទ្ធចំនួន៦៥កន្លែងនៅក្នុងតំបន់ហ្គាហ្សាស្ទ្រីប។ អ៊ីស្រាអែលក៏បាននិយាយផងដែរថា រ៉ុក្កែតនិងកាំភ្លើងត្បាល់ប្រហែល១០០គ្រាប់ដែលបាញ់ចេញពីតំបន់ហ្គាហ្សាគឺបានផ្ទុះនៅក្នុងប្រទេសអ៊ីស្រាអែលឬត្រូវបានស្ទាក់ចាប់ដោយប្រព័ន្ធការពារអាកាស។
កាលពីថ្ងៃអង្គារ អ្នកនាំពាក្យក្រុមឥស្លាមជីហាដបាននិយាយថា បទឈប់បាញ់គ្នាមួយត្រូវបានឈានដល់ហើយនៅថ្ងៃពុធ មន្ត្រីជាន់ខ្ពស់ក្រុមហាម៉ាស់លោក Khalil al-Hayya ក៏បាននិយាយអំពីកិច្ចព្រមព្រៀងមួយផងដែរ។
បើទោះបីជាមន្ត្រីអ៊ីស្រាអែលបានបដិសេធថា មិនមែនជាផ្នែកមួយនៃបទឈប់បាញ់នោះក៏ដោយ ភាពស្ងប់ស្ងាត់នៅតែមានកាលពីថ្ងៃពុធ។
អំពើហិង្សាកាលពីថ្ងៃអង្គារបានកើតឡើងបន្ទាប់ពីមានភាពចលាចលសម្លាប់មនុស្សជាច្រើនសប្តាហ៍នៅតាមបណ្តោយព្រំដែនរវាងអ៊ីស្រាអែលនិងតំបន់ប៉ាឡេស្ទីន។
នៅក្នុងសេចក្តីថ្លែងការណ៍រួមដ៏កម្រមួយ ក្រុមហាម៉ាស់និងក្រុមឥស្លាមជីហាដបានប្រកាសទទួលខុសត្រូវចំពោះការវាយប្រហាររ៉ុក្កែតនិងកាំភ្លើងត្បាល់ដោយនិយាយថា វាគឺជាការសងសឹកចំពោះការវាយប្រហាររបស់អ៊ីស្រាអែលដែលកំណត់គោលដៅលើទីតាំងរបស់ពួកគេ។
សមាជិក៣នាក់របស់ក្រុមជីហាដឥស្លាមត្រូវបានសម្លាប់នៅក្នុងការវាយប្រហាររបស់អ៊ីស្រាអែលកាលពីថ្ងៃអាទិត្យហើយក្រុមនេះបានប្តេជ្ញាសងសឹក។
គួរបញ្ជាក់ថា ជីហាដឥស្លាមគឺជាក្រុមប្រដាប់អាវុធធំលំដាប់ទី២នៅតំបន់ហ្គាហ្សាបន្ទាប់ពីក្រុមហាម៉ាស់៕ AFP
Source: Kampuchea Thmey Daily
0 Comments