តំណាង​ក្លិប​បឹងកេត ឆ្លើយតប​ជុំវិញ​នឹង​ការ​ចាកចេញ​របស់​កម្លាំង​សំខាន់ៗ​មួយចំនួន​កាលពីពេល​ថ្មីៗ

ក្លិប​បឹងកេត ម្ចាស់​ជើងឯក​ពានរង្វាន់​លី​គ​កំពូល​កម្ពុជា ៣​សម័យកាល មាន​កីឡាករ​សំខាន់ៗ​មួយចំនួន​ចាកចេញ​ហើយ​មាន​កីឡាករ​មួយ​ចំនួន​ទៀត​ក៏​មាន​បញ្ហា​សុខភាព កាលពី​ពេល​ថ្មីៗ ខណៈ​ក្រុម​មួយ​នេះ​ត្រូវការ​ប្រកួត​ដើម្បី​ការពារ​តំណែង​ជើងឯក​លី​គ​កំពូល​កម្ពុជា​រដូវ​កាល​ឆ្នាំ​២០១៨​នេះ​ផងដែរ​។

កីឡាករ​ដែល​ចាក​ចេញពី​ក្លិប​មាន សុខ សុវណ្ណ ខ្សែការពារ​ដែល​រួមរស់​ជាមួយ​ក្លិប​រយៈពេល​ជាង​៥​ឆ្នាំ បាន​ចូលរួម​ជាមួយ​ក្រុម​ចំណូល​ថ្មី​វិសាខា ខណៈ​ខ្សែប្រយុទ្ធ​ជើងចាស់ ឃួន ឡា​បូ​រ៉ាវី បានសម្រេច​ចេញទៅ​ចូលរួម​ជាមួយ​ក្លិប​Surat Thani FC សមាជិក​ពានរង្វាន់​លី​គ​លំដាប់​ទី​៣​របស់​ប្រទេស​ថៃ នៅក្នុង​ជើង​ទី​២​។ ចំណែក​អ្នកចាំទី​ដៃ​ស្អិត ស៊ូ យ៉ា​ទី កំពុង​មាន​បញ្ហា​ភ្លាត់​សាច់ដុំ​ភ្លៅ ដែល​អាច​ត្រូវ​សម្រាក​ព្យាបាល​១​ខែ​ ឬ​ ច្រើន​ជាង​នេះទៅ​ទៀត​។



លោក បែ មករា អ្នកចាត់ការ​ទូទៅ​រប​ស់​ក្រុម​បឹងកេត​អែ​ហ្វ​ស៊ី បាន​ប្រាប់​អ្នកសារព័ត៌មាន​ក្នុងស្រុក​ថា ​លោក​កំពុង​សម្លឹង​រក​កីឡាករ​ថ្មីៗ​បន្ថែម​ ដើម្បី​ជំនួស​កៅអី​ដែល​ទំនេរ​នេះ​។ ប៉ុន្តែ​នៅ​មិនទាន់​រកបាន​កីឡាករ​ជំ​នួន​នៅឡើយ​។ ចំណែក​រឿង​កីឡាករ ចាន់ វឌ្ឍនាកា វិញ​រូបគេ​នឹង​បន្តដំណើរ​ជាមួយ​ក្លិប​បឹងកេត ប្រសិនបើ​គេ​មិន​ចេញទៅ​បន្ត​អាជីព​នៅ​ក្រៅ​ប្រទេស​។ ប៉ុន្តែ​ពេលនេះ​នៅ​មិន​ទាន់​មាន​ការពិភាក្សា​ណាមួយ​នៅឡើយ​នោះទេ​។

​យ៉ាង​ណា​ក្តី​បឹងកេត ត្រូវការ​ជ័យជម្នះ​ស្ទើរតែ​គ្រប់ការ​ប្រកួត​ដើម្បី​ប្រជែង​ជាមួយ​ក្រុម​កំពូល​តារាង​ណាហ្គា​វើ​ល​ និង ​ក្រុម​មួយចំនួនទៀត​ដើម្បី​ឈរ​កំពូល​តារាង​រក្សា​តំណែង​ជើងឯក​ក្នុង​លី​គ​កំពូល​កម្ពុជា​។ ឆ្លងកាត់​៧​ប្រកួត​មកនេះ​បឹង​កេត ឈ្នះ​បាន​៥​លើក​និង​ស្មើ​២​លើក ឈរ​លេខ​២​ក្នុង​តារាង​រួម​ដែល​មាន​១២​ក្រុម​មាន​១៧​ពិន្ទុ​ក្នុង​ដៃ ដោយ​ចាញ់​ក្រុម​កំពូល​តារាង​ណាហ្គា​វើ​ល​២​ពិន្ទុ​។ ប្រកួត​បន្ទាប់​បឹងកេត ត្រូវ​ប៉ះ​ក្រុម​អង្គ​រថា​យ​ហ្គឺ​រ នៅលើ​ទីលាន​មជ្ឈមណ្ឌល​ហ្វឹកហ្វឺន​កីឡា​កងយោធពល​ខេមរភូមិន្ទ (​ស្តា​ត​ចាស់​) វេលា​ម៉ោង​៣​រសៀល​ថ្ងៃ​សៅរ៍ ទី​២ ខែមិថុនា ឆ្នាំ​២០១៨​។



ក្លិប​បឹងកេត កាលពីដើម​ខែឧសភា កន្លងទៅ​បានសម្រេច​ផ្លាស់ប្តូរ​ក្បាលម៉ាស៊ីន ក្រោយ លោក ស៊ីវ ថា ដែល​ជា​ប្រធាន​ក្លិប​ចាស់​បានសម្រេច​ដើរចេញ​កាលពី​ដើមឆ្នាំ​កន្លង​ទៅ​ហើយ ជំនួស​វិញ​ដោយ​លោកស្រី ពុធ ធីតា ដែល​មាន​ម្តាយបង្កើត​របស់​កុម​រា Dome ដែល​ក្លិប​ធ្លាប់​បញ្ជូន​ទៅ​ហ្វឹកហាត់​នៅ​ក្លិប FC Barcelona កាលពីដើមឆ្នាំ​២០១៨​ថ្មីៗ​នេះ។

​ក្លិប​បឹងកេត ឡើង​មកលេង​ពានរង្វាន់​លី​គ​កំពូល​កម្ពុជា នៅ​ឆ្នាំ​២០១២ ហើយ​ធ្លាប់​ឈ្នះ​ជើងឯក​ចំនួន​៣​លើក​គឺ​នៅ​ឆ្នាំ​២០១២,២០១៦ និង​២០១៧ ខណៈ​នៅ​ឆ្នាំ​២០១៣ និង​២០១៤ ត្រឹម​ឈរជើង​ឯក​រង​។ នៅ​ឆ្នាំ​២០១៧ ក្រុម​នេះ​ឈ្នះ​ពានរង្វាន់ CNCC Cup 2017 ផងដែរ​។ ចំណែក​ពានរង្វាន់​នៅ​ក្រៅ​ស្រុក​វិញ​ ក្រុម​ដែល​មាន​ប្រភព​មកពី​ខេត្តកំពង់ចាម មួយ​នេះ​ធ្លាប់​ចេញទៅ​ប្រកួត​វគ្គ​ជម្រុះ​តាម​ពូ​ល​ពានរង្វាន់ AFC President's Cup នៅ​ឆ្នាំ​២០១៣ ធ្លាប់​ឡើង​ដល់​វគ្គ​ផ្ដាច់ព្រ័ត្រ​ពានរង្វាន់ Toyota Mekong Club Championship 2015 តែ​ចាញ់​ក្រុម Buriram United របស់​ថៃ និង​ប្រកួត​ក្នុង​ពានរង្វាន់​នៅ​ឆ្នាំ​២០១៦ និង​២០១៧ ផង​ដែរ​។ នៅ​ឆ្នាំ​២០១៧​និង​២០១៨ ក្រុម​នេះ​មានឈ្មោះ​ចេញទៅ​លេង​ពានរង្វាន់​លំដាប់​ទី​២​ប្រចាំ​ទ្វីបអាស៊ី AF Cup ផង​ដែរ​តែ​ធ្លាក់​ត្រឹមវគ្គ​ជម្រុះ​តាម​ពូល​ដូចគ្នា៕

Source: Kampuchea Thmey Daily