ហ៊ឹម​ សារ៉ាន់ ចាញ់​អាមេរិក ខ​ណៈ ឌុ​ម​ កែវ​ដា​ ស្មើ ហើយ​ ម៉ន​ សា​ម៉េ​ត ​ឈ្នះ​ថៃ

​អ្នក​ប្រដាល់​ជើងចាស់ ហ៊ឹម សារ៉ាន់ នៃ​សមាគម​កីឡាប្រដាល់​ក្រសួងការពារជាតិ បាន​ប្រកួត​ចាញ់អ្នក​ប្រដាល់​ជើង​ថ្មី​ជនជាតិ​អាមេរិក​ Justin ដោយ​ពិន្ទុ ក្នុង​ការជួប​ប្រកួត​គ្នាកាលពី​ព្រឹក​ថ្ងៃអាទិត្យ ទី​២៧ ឧសភា ២០១៨ នៅលើ​សង្វៀន Boostrong Fighter On Fire របស់ SEA-TV ។​ ហ៊ឹម សារ៉ាន ប្រហែលជា​អស់ដៃគូ​ប្រកួត​ហើយ ក្រោយពី​វាយ​ចាញ់ Justin ដែល​ទើប​ឡើងប្រកួត​បាន​ ១៩ លើក​នោះ ខ​ណៈ​ដែល​ខ្លួន​មាន​ជើងចាស់​មាន​កំណត់​ត្រា​ប្រកួត​ចំនួន ៨៦ លើក​នោះ។​ ការដាក់​ឲ្យ​ សារ៉ាន់ ​ប្រកួត​លើក​នេះ គឺ​ចង់​ឲ្យ ​សារ៉ាន់ ​ស្តារ​មុខមាត់​ឡើងវិញ តែ​បែរជា​កាន់តែ​អន់​ជាង​មុន វាយ​មិន​ឈ្នះជើង​ថ្មី​បែបនេះ​សោះ។ឌុ​ម កែវ​ដា អ្នក​ប្រដាល់​ក្លិប​មកុដ​រាជសីហ៍ យីអ៊ុន​របស់គេ​ក៏​នៅ​មិនទាន់​ឡើង​នៅឡើយ​ដែរ ដោយការឡើង​ប្រកួត​លើក​នេះ បាន​ត្រឹម​ស្មើជាមួយ​អ្នក​ប្រដាល់​ថៃ Phayak lek បន្ទាប់ពី​ប្រកួត​គ្នា​ ៥ ទឹក​ពេញ​នោះ។ ពីរ​នាក់នេះប្រកួត​គ្នា​ក្នុង​ប្រភេទ​ទម្ងន់ ​៦៣,៥០០ ​គីឡូក្រាម។​ ដោយ​ជួប​បរាជ័យញឹកញាប់​ពេក​នោះ កែវ​ដា ​ត្រូវ​អ្នក​ផ្គូផ្គង​រារែក​ចិត្តក្នុងការ​ផ្ដល់ឱកាស​ឲ្យ​ប្រកួត​ជាមួយបរទេស។​ យ៉ាងណាលើក​នេះ ​កែវ​ដា ខិតខំ​ប្រឹង​បាន​ស្មើ​ជាមួយ​ថៃ​ដែរ។​ Phayaklek គេ​ជា​អ្នកប្រដាល់​មួយរូបដែល​មិន​ខ្សោយ​ឡើយ គេ​ធ្លាប់​មក​ប្រកួត​នៅ​ស្រុក​ខ្មែរ​ញឹកញាប់​ដែរ ហើយភាគច្រើន​បានទទួល​ជ័យជំនះ។​ម៉ន សា​ម៉េ​ត អ្នក​ប្រដាល់​ជើងចាស់​ក្លិប​ការិយាល័យ​ទី​៥ កងទ័ពជើងគោក បាន​វាយ​ឈ្នះអ្នក​ប្រដាល់ថៃ​ជើងចាស់ ​Phun Savath ដោយ​ពិន្ទុ ក្នុង​ការជួប​ប្រកួតទម្ងន់​ ៥៧ ​គីឡូក្រាម។ អ្នក​ប្រដាល់ថៃរូបនេះធ្លាប់​មក​ប្រកួត​នៅ​កម្ពុជា​ច្រើនដង​ហើយ។​ ខ្លា​ចាស់ Phun Savath គឺជា​អ្នក​ប្រដាល់ជើង​ខ្លាំង​មួយរូប​ដែល​ធ្លាប់​បំបាក់​ជើង​ខ្លាំង​កម្ពុជា​បាន​មិនតិច​នាក់​នោះទេ តែ​គេ​បាត់​មុខ​ពីសង្វៀន​ស្រុក​ខ្មែរ​មួយរយៈ​ហើយ។ ​អ្នក​ប្រដាល់​ជើងចាស់​រូបនេះ​ ប្រកួត​ដោយ​ប្រើ​កលល្បិចច្រើនជាង​ប្រើ​កម្លាំង។ ​យ៉ាងណា មក​លើក​នេះ Phun Savath ហាក់ដូចជា​វាយ​ខ្សោយជាងលើក​មុនៗ។•​ពុទ្ធ ឆាយ​រិទ្ធី ចាញ់ Kreang Krai ទឹក​១ ខ​ណៈ ចេង គា ឈ្នះ​បារាំង ដោយ​ពិន្ទុ​
​ពុទ្ធ ឆាយ​រិទ្ធី អ្នក​ប្រដាល់​កម្ពុជា​នៃ​ក្លិប​ពុទ្ធ​សេរី​វង្ស​កីឡា ដែល​ត្រូវបាន​គេ​ផ្តល់​ឱកាស​អោយជួប​សាកកណ្តាប់ដៃ​ជាមួយ​អ្នក​ប្រដាល់​ថៃ Kreang Krai កាលពី​យប់​ថ្ងៃទី​២៦ ​ឧសភា នៅ​សង្វៀន Ganzberg Top Fighter របស់​ SEATV​ នោះ បាន​ជួប​សំណាង​មិនល្អ ដោយ​ត្រូវ Kreang Krai ទាត់​ឲ្យខូច​ជើង​ក្នុង​ទឹក​ទី​១ ​ប៉ុណ្ណោះ។ Kreang Krai គេ​ប្រើ​ជើងឆ្វេងទាត់​ត្រូវចំ​គន្លាក់​ជង្គង់​ស្តាំ​របស់​ ពុទ្ធ ឆាយ​រិទ្ធី ធ្វើ​ឲ្យ​ ឆាយ​រិទ្ធី​ ដួល​អុកគូទ​លើ​រេញ​ក្រោក​លែងរួច​តែម្តង។ នេះ​ជាការ​ជួបគ្នា​លើក​ទី​១ ​រវាង ពុទ្ធ ឆាយ​រិទ្ធី និង Kreang Krai នេះ។ចេង គា អ្នក​ប្រដាល់ក្លិប​សាល​វ័​ន្ត​កីឡា បាន​ប្រកួត​ឈ្នះអ្នក​ប្រដាល់​ជនជាតិ​បារាំង Duverly ដោយពិន្ទុ បន្ទាប់ពី​វាយ​គ្នា ​៥​ ទឹក​ពេញ​នោះ។ ពួកគេ​ទាំងពីរ​នាក់​នេះនឹង​ប្រកួត​គ្នា​ក្នុង​ទម្ងន់ ​៦៥ គីឡូក្រាម។​ ចេង គា ជា​អ្នក​ប្រដាល់​ដែល​មិនមាន​ឈ្មោះ​ល្បី​នោះទេ តែ​គេ​ជា​អ្នក​ប្រដាល់​ចាស់វស្សាម្នាក់ ដែលមាន​ស្នៀត​ប្រដាល់​ល្អ ពិសេស​មាន​កណ្តាប់ដៃ​ល្អ ហើយ​សំខាន់​ជាងនេះទៀតគឺមាន​ចិត្ត​ប្រដាល់​ធំ និងស៊ូ​ចំពោះ​ការប្រកួត។ ​Duverly ជា​ជើង​ថ្មីដែល​ហ្វឹក​ហាត់នៅប្រទេស​ថៃ។ គេ​មាន​កំណត់ត្រា​ប្រកួត​ចំនួន​៣៧លើក ឈ្នះ​២៥​លើក និង​ចាញ់​១២​លើក មិនដែល​ស្មើ។

វៀត ប៊ុន​ឌឿ​ន អ្នក​ប្រដាល់​សមាគម​កីឡាប្រដាល់​ក្រសួងការពារជាតិ បាន​ផ្តួល​ លិញ ភារ​ម្យ អ្នកប្រដាល់​ក្លិប​ភារ​ម្យ​គុន​ខ្មែរ អោយ​សន្លប់​ក្នុង​ទឹក​ទី​៣ ក្រោយពី​គេ​បាន​វាយ​កែង​ចំ​មុខ ​ភារ​ម្យ​ នោះ​៕

•​មាស ច័ន្ទ​មាន ស្មើ Sen Khum ឯ ខាំ ខ្លា​នាង ឈ្នះ Kout Sakorn
​អ្នក​ប្រដាល់​ជើង​ខ្លាំង​កម្ពុជា​ពីរ​នាក់ នឹង​ឡើង​ប្រកួត​ជាមួយ​អ្នក​ប្រដាល់​បរទេស​នៅក្នុង​កម្មវិធី​ប្រកួតប្រដាល់​ជាល​ក្ខ​ណៈ​មិត្តភាព​អន្តរជាតិ​ Carabao នៅលើ​សង្វៀន​ SEATV ថ្ងៃទី​២៦ ​ឧសភា ២០១៨ ​នោះ គឺ​ម្នា​ក់បាន​ត្រឹម​ស្មើ និង​ម្នាក់​ឈ្នះ​ថៃ។​ ក្នុងនោះ មាស ច័ន្ទ​មាន អ្នក​ប្រដាល់​ក្លិបកងពលធំ​អន្តរាគមន៍​លេខ​២ ប្រកួត​ស្មើ​ជាមួយអ្នក​ប្រដាល់​ថៃ​ Sen Khum ក្នុង​ជួបគ្នា​ទម្ងន់ ៦៣,៥០០​ គ​.​ក្រ។ អ្នក​ប្រដាល់​ថៃ Sen Khum ដែល​មក​ប្រកួត​ជាមួយ ​មាស ច័ន្ទ​មាន​ នោះគេ​ត្រូវ​ មាស ច័ន្ទ​មាន វាយអោយ​សន្លប់​ក្នុង​ទឹក​ទី​៤ កាលពី​ថ្ងៃទី​០៥​ ឧសភា​ ២០១៨ កន្លងមកនេះ ឥឡូវ​គេ​មក​សងសឹកវិញ​។ ប៉ុន្តែ​បាន​ត្រឹម​ស្មើ​ពិន្ទុ​ប៉ុណ្ណោះ។
​
​ចំពោះ ​ខាំ ខ្លា​នាង អ្នក​ប្រដាល់​ក្លិប​រ៉ា​ហាប់​ស្វាយប៉ាក បាន​វាយ​ឈ្នះ​អ្នក​ប្រដាល់​ថៃ Kout Sa korn ដោយ​ពិន្ទុ បន្ទាប់ពី​ប្រកួត​គ្នា​ ៥​ ទឹក​ពេញ​នោះ។​ ពីរ​នាក់​នេះប្រកួត​គ្នា​ក្នុង​ប្រភេទ​ទម្ងន់ ​៥១ ​គីឡូក្រាម។

​ចំពោះ​ការប្រកួត​រវាង​អ្នក​ប្រដាល់​រួម​ជាតិ​វិញ កំពែង ខ្មៅ អ្នក​ប្រដាល់​សមាគម​កីឡាប្រដាល់ក្រសួងកសិកម្ម បាន​វាយ​ឈ្នះ រ៉ែ​ម រាជ អ្នក​ប្រដាល់​ក្លិប​អង្គរ​មានជ័យ ខេត្តសៀមរាប ដោយ​ពិន្ទុ។ រីឯ ម៉ន វ៉ា​ន្នី អ្នក​ប្រដាល់​ក្លិប​ការិយាល័យ​ទី​៥ កងទ័ពជើងគោក វាយ​ស្មើ​ជាមួយ រិ​ទ្ធ ប្រាក់​ប៊ិន អ្នក​ប្រដាល់​ក្លិប​កងពលតូច​លេខ ​៧០៕​

Source: Kampuchea Thmey Daily