ព្រះសីហនុ ៖ ក្រុមសិស្សសាលាចំនួន ៤ នាក់ ត្រូវបានសមត្ថកិច្ចប៉ូលិស នៃស្នងការដ្ឋាននគរបាលខេត្តព្រះសីហនុ តាមចាប់ខ្លួនបានជាបន្តបន្ទាប់ ក្រោយពេលពួកគេបានធ្វើសកម្មភាពឆក់កាបូបលុយជនជាតិចិនម្នាក់បានសម្រេច ហើយព្យាយាមរត់គេចខ្លួនបានរយៈពេល ២ ថ្ងៃរួចមក។
ពាក់ព័ន្ធការចាប់ខ្លួនក្រុមសិស្សសាលាខាងលើនេះ សមត្ថកិច្ចប៉ូលិសបានឲ្យដឹងថា កាលពីថ្ងៃទី២៤ ខែឧសភា ឆ្នាំ២០១៨ កន្លងទៅនេះ វេលាម៉ោង ២០ យប់ ជនសង្ស័យចំនួន ២ នាក់ ក្នុងចំណោមបក្ខពួក ៤ នាក់ បានជិះម៉ូតូមួយគ្រឿងធ្វើសកម្មភាពឆក់កាបូបបុរសជនជាតិចិនម្នាក់ឈ្មោះ HONG ZHIXIONG ភេទប្រុស អាយុ៣៤ឆ្នាំ ជនជាតិចិន មុខរបរជាអាជីវករ លិខិតឆ្លងដែនលេខ E៦៦៩៧៧១២៧ មានទីលំនៅ ក្រុម២៦ ភូមិ៣ សង្កាត់លេខ៣ ក្រុង-ខេត្តព្រះសីហនុ ខណៈពេលដែលជនរងគ្រោះកំពុងឈរនៅលើចិញ្ចើមថ្នល់ ត្រង់ចំណុចតំបន់ឧតុនិយម ស្ថិតនៅភូមិ៣ សង្កាត់លេខ៣ ក្រុង-ខេត្តព្រះសីហនុ បានសម្រេច រួចហើយរត់គេចខ្លួនបានដោយសុវត្ថិភាព។ ជនរងគ្រោះក្រោយពីមានបញ្ហានេះភ្លាម ក៏បានរត់ទៅប្តឹងសមត្ថកិច្ចប៉ូលិសដើម្បីឲ្យជួយអន្តរាគមន៍តាមចាប់ជនល្មើស ដោយជនរងគ្រោះបានបញ្ជាក់ថា សម្ភារៈដែលបាត់បង់ក្នុងអំពើឆក់នោះ មានលុយជិត ១០.០០០ ដុល្លារ (មួយម៉ឺនដុល្លារ) និងសម្ភារៈផ្សេងៗមួយចំនួនទៀត។
សមត្ថកិច្ចប៉ូលិសស្នងការដ្ឋាននគរបាលខេត្ត ក្រោយទទួលបានព័ត៌មាននេះភ្លាម ក៏បានបើកការស៊ើបអង្កេតចុះធ្វើការស្រាវជ្រាវភ្លាមៗផងដែរ ជាលទ្ធផលរយៈពេលពីរថ្ងៃក្រោយ សមត្ថកិច្ចក៏បានកំណត់មុខសញ្ញាច្បាស់លាស់ ឈានដល់ការចាប់ឃាត់ខ្លួនបានជាបន្តបន្ទាប់តែម្តង ដោយក្នុងនោះចាប់បានទាំងជនដៃដល់ចំនួន ២ នាក់ និងជនជាប់ពាក់ព័ន្ធសមគំនិតចំនួន ២ នាក់។
ក្រុមជនជាប់ពាក់ព័ន្ធនឹងអំពើឆក់ខាងលើនេះមាន ១-ឈ្មោះ ខៃ ស៊ីង ភេទប្រុស អាយុ១៦ឆ្នាំ ជាសិស្ស មានទីលំនៅ ក្រុម១១ ភូមិ៣ សង្កាត់លេខ៣ ក្រុង-ខេត្តព្រះសីហនុ (ជនដៃដល់)។ ២-ឈ្មោះ ស្រេង ដេវីត ភេទប្រុស អាយុ១៩ឆ្នាំ ជា និស្សិត មានទីលំនៅ ក្រុម៨ ភូមិ៣ សង្កាត់លេខ៣ ក្រុង-ខេត្តព្រះសីហនុ (ជនដៃដល់ ជិះពីក្រោយ)។ ៣-ឈ្មោះ មាស សម្បត្តិរតនា ភេទប្រុស អាយុ១៥ឆ្នាំ ជាសិស្ស មានទីលំនៅ ភូមិ៣ សង្កាត់លេខ១ ក្រុង-ខេត្តព្រះសីហនុ (សមគំនិត)។ ៤-ឈ្មោះ ចេន ស៊ីវនេង ភេទប្រុស អាយុ១៥ឆ្នាំ សិស្ស មានទីលំនៅ ក្រុមទី១ ភូមិ១ សង្កាត់លេខ៣ ក្រុង-ខេត្តព្រះសីហនុ (សមគំនិត )។
ក្រោយពេលចាប់ខ្លួនសមត្ថកិច្ចប៉ូលិសបានធ្វើការដកហូតនូវវត្ថុតាងរួមមាន កាបូបពណ៌ខ្មៅ ១ (ជារបស់ជនរងគ្រោះ), លិខិតឆ្លងដែន ១ ច្បាប់, កាត ៥ សន្លឹក, លុយ ១.២០០ ដុល្លារ (មួយពាន់ពីររយដុល្លារ),ទូរស័ព្ទដៃ ១ គ្រឿង ម៉ាក IPHONE7 ពណ៌ផ្កាឈូក, ម៉ូតូ ១ គ្រឿង ម៉ាកហុងដា សេ១២៥ ស៊េរីឆ្នាំ២០១៦ ពណ៌ខ្មៅ ស្លាកលេខ ព្រះសីហនុ ១F-១១៥៤ មានលេខតួ និងលេខម៉ាស៊ីន ៩៤៧៥៤៣០ (មធ្យោបាយធ្វើសកម្មភាព) និងម៉ូតូហុងដា សេ១២៥ ស៊េរីឆ្នាំ ២០១៨ ពណ៌ខ្មៅ គ្មានស្លាកលេខ មានលេខតួ និងលេខម៉ាស៊ីន ៥២៧៣៩៧៤ (ជាផលនៃអំពើទុច្ចរិតយកលុយដែលឆក់បានទៅទិញម៉ូតូ) ។
បច្ចុប្បន្នជនសង្ស័យខាងលើនេះ ត្រូវបានការិយាល័យនគរបាលព្រហ្មទណ្ឌកំពុងកសាងសំណុំរឿងតាមនីតិវិធី ដើម្បីបញ្ជូនខ្លួនទៅសាលាដំបូងចាត់ការតាមនីតិវិធីនៃផ្លូវច្បាប់៕
Source: Kampuchea Thmey Daily
0 Comments