ផល សោភ័ណ្ឌ អ្នកប្រដាល់ក្លិបតាឡីដំរីមានរិទ្ធ បានក្លាយជាម្ចាស់ជើងឯក Carabao ទម្ងន់ ៦៣,៥០០ គីឡូក្រាម បន្ទាប់ពីគេបានប្រកួតឈ្នះ ឡៅ ចិត្រា អ្នកប្រដាល់ក្លិបកងពលតូចទ័ពឆ័ត្រយោង៩១១ ដោយពិន្ទុជាឯកច្ឆន្ទ នៅក្នុងវគ្គផ្ដាច់ព្រ័ត្រ កាលពីយប់ថ្ងៃអាទិត្យ ទី២៧ ឧសភា ២០១៨ នៅលើសង្វៀនបាយ័នស្ទឹងមានជ័យនោះ។ ផល សោភ័ណ្ឌ បើកុំតែក្នុងបីទឹកចុងក្រោយ គេវាយល្អនិងមានប្រៀបឈ្នះលើ ឡៅ ចិត្រា នោះក៏ប្រហែលជាពិបាកនឹងបានឈ្នះដែរ ព្រោះក្នុងពីរទឹកដំបូងគេចាញ់ប្រៀបឈ្នះរបស់ ចិត្រា នោះ។
តែយ៉ាងណាពីទឹកទី៣ ទៅទៅដល់ទឹកទី៥ ផល សោភ័ណ្ឌ គេជាអ្នកមានប្រៀបឈ្នះលើ ឡៅ ចិត្រា។ ដូច្នេះហើយទើប សោភ័ណ្ឌ បានទទួលជ័យជំនះលើ ឡៅ ចិត្រា ដោយពិន្ទុ ក្រោយពីបញ្ចប់ការប្រកួតទឹកទី៥ ដែលជាទឹកចុងក្រោយ និងជាទឹកនាំជ័យជំនះអោយរូបគេនោះ។
គួរបញ្ជាក់ថា គ្រាន់តែប្រកាសចៅក្រម ៣ រូបដំបូង ក្នុងចំណោមចៅក្រម ៥ រូប បានផ្តល់ពិន្ទុអោយ ផល សោភ័ណ្ឌ ឈ្នះបាត់ទៅហើយ ហើយទោះជានៅសល់ចៅក្រម ២ រូបទៀត គេមិនប្រកាសក្តីក៏គេដឹងថាចៅក្រមពីររូបនោះសុទ្ធតែឲ្យ ផល សោភ័ណ្ឌ ឈ្នះដែរ ដូច្នេះ ផល សោភ័ណ្ឌ គេឈ្នះ ឡៅ ចិត្រា ដាច់តែម្តង។
ផល សោភ័ណ្ឌ ក្លាយជាជើងឯក Kubota ទម្ងន់ ៦៣,៥០០ គីឡូក្រាមនេះ បានទទួលប្រាក់រង្វាន់ ២៤ លានរៀល ស្មើនឹង ៦.០០០ ដុល្លារអាម៉េរិក។ ឯ ឡៅ ចិត្រា ដែលបានចំណាត់ថ្នាក់លេខ២ នោះបានទទួលប្រាក់រង្វាន់ចំនួន ១២ លានរៀល ស្មើនឹង ៣.០០០ ដុល្លារអាម៉េរិក និងចំណាត់ថ្នាក់លេខ៣ បានទៅលើថៃ Lekpetch ទទួលបានប្រាក់រង្វាន់ ៤ លានរៀល ស្មើ ១.០០០ ដុល្លារអាម៉េរិក ហើយ ចាន់ ប៊ុនលាភ ក្លិបនិរោធមានជ័យ ដែលបានលេខ៤នោះ ទទួលបានប្រាក់រង្វាន់ ១លាន ៦សែនរៀល ស្មើនឹង ៤០០ ដុល្លារអាម៉េរិក។
ការប្រកួតជាលក្ខណៈមិត្តភាពអន្តរជាតិមួយគូទៀតនោះ គឺ សុខ សាវិន (វឿន សាវិន) អ្នកប្រដាល់ក្លិបអេលីតគុនខ្មែរ គេបានផ្តួលអ្នកប្រដាល់ថៃ Petch Ngenthong អោយសន្លប់ក្នុងទឹកទី២ ប៉ុណ្ណោះ។ គួរបញ្ជាក់ថា ព្រឹត្តិការណ៍កំពូលជើងឯក Carabao វគ្គ៤ ទម្ងន់ ៦៣,៥០០ គីឡូក្រាមនេះ បានចាប់ផ្តើមឡើងកាលពីថ្ងៃទី១១ កុម្ភៈ ២០១៨ ដែលមានអ្នកប្រដាល់ចំនួន៨រូប គឺខ្មែរ៤រូប ថៃ៣រូប និងឡាវ១រូប ចូលរួមប្រកួត៕•ព្រឿង សុជាតិ ឈ្នះ Khumpichit ខណៈ អ៊ូច ចាន់រិទ្ធ ចាញ់ Kirkkark
អ្នកប្រដាល់ជើងខ្លាំងស្រករក្រោយ ព្រឿង សុជាតិ មកពីក្លិបកងពលធំអន្តរាគមន៍លេខ២ បានវាយឈ្នះអ្នកប្រដាល់ថៃ Khumpichit Payaknoronghin ដោយពិន្ទុបន្ទាប់ពីប្រកួតគ្នា៥ទឹកពេញ នៅលើសង្វៀនបាយ័នបឹងស្នោ កាលពីរសៀលថ្ងៃទី២៧ ឧសភា ២០១៨។ ព្រឿង សុជាតិ វាយឈ្នះ Khumpichit ដោយពិន្ទុប្រផុតប្រផើយតែប៉ុណ្ណោះ ព្រោះ Khumpichit គេព្យាយាមវាយបកសងទៅលើ ព្រឿង សុជាតិ ខ្លាំងក្លាណាស់ដែរ តែដោយសារគេវាយខុសគោលដៅ និងមិនចំណុចនោះ ទើបធ្វើអោយគេចាញ់ពិន្ទុ សុជាតិ។
ចំពោះ អ៊ូច ចាន់រិទ្ធ អ្នកប្រដាល់ក្លិបថ្មគោលពោធិសែនជ័យ បានវាយចាញ់អ្នកប្រដាល់ថៃ Kirkkark Keatshungrith ក្នុងទឹកទី៤។ អ៊ូច ចាន់រិទ្ធ គេចុះអន់ខ្សោយកម្លាំងតាំងពីចុងទឹក៣មកម្ល៉េះ ដែលធ្វើអោយអ្នកប្រដាល់ថៃ Kirkkark យកឈ្នះដោយធូរពេលមកដល់ដើមទឹកទី៤នោះ។ ពួកគេទាំងពីរជួបប្រកួតគ្នាក្នុងទម្ងន់ ៥៧ គីឡូក្រាម។
ចំពោះការប្រកួតរវាងអ្នកប្រដាល់រួមជាតិវិញ ង៉ែត វុធ អ្នកប្រដាល់ក្លិបកងពលតូចទ័ពឆ័ត្រយោង៩១១ បានវាយចាញ់ ចាន់ វ៉ារិទ្ធ អ្នកប្រដាល់ក្លិបនិរោធមានជ័យ ដោយពិន្ទុក្នុងការជួបប្រកួតគ្នាក្នុងទម្ងន់ ៦០ គីឡូក្រាម។ អេ ភក្តី អ្នកប្រដាល់ក្លិបអេភូថងកីឡា ត្រូវ ចាន់ តុល អ្នកប្រដាល់ក្លិបរស្មីភូមិគាបខេត្តបន្ទាយមានជ័យ វាយអោយសន្លប់ក្នុងទឹកទី១។ ចំណែក ពេញ វិច្ឆិកា អ្នកប្រដាល់ក្លិបកុមារទេពមានរិទ្ធ បានផ្តួល នួន ឈុនណា អ្នកប្រដាល់ក្លិបអាណាចក្រគុនខ្មែរ ឲ្យបោះបង់ចោលការប្រកួតក្នុងទឹកទី៤៕Source: Kampuchea Thmey Daily
0 Comments