ភ្នំពេញ៖ លោក Amaud DARC នាយកសភាពាណិជ្ជកម្មសហភាពអឺរ៉ុបប្រចាំព្រះរាជាណាចក្រកម្ពុជា បានកោតសរសើរចំពោះការអភិវឌ្ឍលើគ្រប់វិស័យ ក្រោមការដឹកនាំរបស់រាជរដ្ឋាភិបាល ហើយគោលដៅរបស់សភាពាណិជ្ជកម្មអឺរ៉ុបនៅកម្ពុជា គឺជាអ្នកសម្របសម្រួលផ្សារភ្ជាប់ទំនាក់ទំនង នៃកិច្ចសហប្រតិបត្តិការលើការវិនិយោគ និងការធ្វើពាណិជ្ជកម្មរវាងវិស័យឯកជន និងរាជរដ្ឋាភិបាលកម្ពុជា និងសហភាពអឺរ៉ុប។
ការលើកឡើងរបស់លោក Amaud DARC បានធ្វើឡើងក្នុងជំនួបពិភាក្សាការងារទាក់ទងទៅនឹងប្រធានបទសំខាន់ៗដូចជា ការកែច្នៃម្ហូបអាហារកសិកម្ម ការធ្វើកសិកម្មនិងធាតុចូល និងការដាំដុះដំណាំលើដីសម្បទានសេដ្ឋកិច្ច ជាមួយលោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ កាលពីរសៀលថ្ងៃសុក្រ ១១កើត ខែជេស្ឋ សំរឹទ្ធិស័ក ព.ស ២៥៦២ ត្រូវនឹងថ្ងៃទី២៥ ខែឧសភា គ.ស ២០១៨ នៅទីស្តីការក្រសួង។
នាឱកាសនោះ លោករដ្ឋមន្ត្រីបានជម្រាបជូនប្រតិភូដោយសង្ខេប អំពីការរីកចម្រើនវិស័យកសិកម្មជាអាទិ៍ផលិតកម្មដំណាំស្រូវ ដំឡូងមី និងស្វាយចន្ទី ដែលក្រសួងបានចាត់ទុកថា ជាផលិតកម្មមានអាទិភាពក្នុងការនាំចេញ។ ទោះជាយ៉ាងណា ជារួមទិន្នផលនៃផលិតកម្មទាំងនោះនៅមានកម្រិត ធៀបទៅនឹងបណ្តាប្រទេសជិតខាង ដែលទាមទារត្រូវអនុវត្តនូវយន្តូបនីយកម្មកសិកម្ម ការកំណត់តំបន់ដាំដុះ ការប្រើប្រាស់ពូជ និងបច្ចេកវិទ្យាទំនើប ដើម្បីបង្កើនផលិតភាពផលិតកម្ម កាត់បន្ថយថ្លៃដើម និងកម្លាំងពលកម្មសមស្របទៅនឹងកំណើនសេដ្ឋកិច្ចជាតិដែលមានការកើនឡើងគួរឲ្យកត់សម្គាល់។ បច្ចុប្បន្នចំពោះវិស័យកសិឧស្សាហកម្ម (ការកែច្នៃ) រាល់ផលិតកម្មទាំងអស់នោះគឺនៅមានកម្រិត ប៉ុន្តែរាជរដ្ឋាភិបាលបាននិងកំពុងកសាងហេដ្ឋារចនាសម្ព័ន្ធសំខាន់ៗ ដើម្បីជួយគាំទ្រ និងធ្វើការទាក់ទាញដល់ដៃគូអភិវឌ្ឍន៍ និងវិស័យឯកជនមកធ្វើការវិនិយោគ ដើម្បីបង្កើនតម្លៃបន្ថែមឆ្លើយតបតាមស្តង់ដារ ធានាបានទាំងគុណភាព និងសុវត្ថិភាពនៃទីផ្សារនាំចេញ។
នាឱកាសនេះលោក Amaud DARC បានកោតសរសើរចំពោះការអភិវឌ្ឍលើគ្រប់វិស័យ ក្រោមការដឹកនាំរបស់រាជរដ្ឋាភិបាល និងបានជម្រាបជូនលោករដ្ឋមន្ត្រីពីគោលដៅរបស់សភាពាណិជ្ជកម្មអឺរ៉ុបនៅកម្ពុជា គឺជាអ្នកសម្របសម្រួលផ្សារភ្ជាប់ទំនាក់ទំនងនៃកិច្ចសហប្រតិបត្តិការលើការវិនិយោគ និងការធ្វើពាណិជ្ជកម្មរវាងវិស័យឯកជន និងរាជរដ្ឋាភិបាលកម្ពុជា និងសហភាពអឺរ៉ុប។ បច្ចុប្បន្ន តាមរយៈសភាពាណិជ្ជកម្មអឺរ៉ុបនេះមាន ៣៥០ ក្រុមហ៊ុន បានមកធ្វើការវិនិយោគលើគ្រប់វិស័យក្នុងព្រះរាជាណាចក្រកម្ពុជា និងមានគណៈកម្មការជំនាញពាក់ព័ន្ធចំនួន ១០ ដើម្បីសហការបង្កើនបរិយាកាសក្នុងការធ្វើពាណិជ្ជកម្ម និងការវិនិយោគឲ្យកាន់តែល្អប្រសើរនៅកម្ពុជា។ នាឱកាសនេះលោក Amaud DARC បានអញ្ជើញលោករដ្ឋមន្ត្រីផ្តល់កិត្តិយសធ្វើជាគណៈធិបតីក្នុងវេទិកាសាធារណៈនាពេលអនាគត ហើយតាមសំណើនេះ លោករដ្ឋមន្ត្រីបានឯកភាពចូលរួមតាមការអញ្ជើញ។
ឆ្លើយតបនឹងកាលើកឡើងរបស់ភាគីសហភាពអឺរ៉ុប លោករដ្ឋមន្ត្រីបានជម្រាបជូនគណៈប្រតិភូថា តាមរយៈការខិតខំប្រឹងប្រែងរបស់សភាពាណិជ្ជកម្មអឺរ៉ុប បានធ្វើឲ្យចំណងសាមគ្គីភាព មិត្តភាព និងកិច្ចសហប្រតិបត្តិការរវាងសហភាពអឺរ៉ុប និងកម្ពុជាកាន់តែរឹងមាំនិងល្អប្រសើរថែមទៀត ជាពិសេសការធ្វើពាណិជ្ជកម្ម និងការវិនិយោគលើវិស័យកសិកម្មនាពេលអនាគត។ ក្រសួងកសិកម្ម រុក្ខាប្រមាញ់ និងនេសាទ គាំទ្រនិងផ្តល់កិច្ចសហប្រតិបត្តិការឲ្យអស់លទ្ធភាព៕
Source: Kampuchea Thmey Daily
0 Comments