ភ្នំពេញ ៖ ជំនាញកងរាជអាវុធហត្ថខណ្ឌព្រែកព្នៅ ដោយបានការអនុញ្ញាតពីឯកឧត្តមមេបញ្ជាការរងទទួលការងារនីតិវិធី បានឃាត់ខ្លួនជនសង្ស័យម្នាក់ពីបទឆបោក (លក់ដីអត់មានដីអោយ) នាថ្ងៃទី២៦ ខែឧសភា គ.ស ២០១៨ នៅកងរាជអាវុធហត្ថខណ្ឌព្រែកព្នៅ ដោយយោងតាមពាក្យបណ្តឹងចុះថ្ងៃទី០៨ ខែឧសភា ឆ្នាំ២០១៨ របស់ជនរងគ្រោះឈ្មោះ កុយ វិសុទ្ធ ភេទប្រុស អាយុ៥៦ឆ្នាំ ជនជាតិខ្មែរ មុខរបរជាងគំនូរ រស់នៅភូមិត្រពាំងឈូក សង្កាត់ទឹកថ្លា ខណ្ឌសែនសុខ រាជធានីភ្នំពេញ។
កងរាជអាវុធហត្ថខណ្ឌបានឲ្យដឹងថា ជនសង្ស័យឈ្មោះ ឡៃ ឡេក ភេទប្រុស អាយុ៤០ឆ្នាំ ជនជាតិខ្មែរ មុខរបរពុះដីឡូតិ៍ រស់នៅភូមិត្រពាំងរនាម សង្កាត់ពន្សាំង ខណ្ឌព្រែកព្នៅ រាជធានីភ្នំពេញ ត្រូវកម្លាំងកងរាជអាវុធហត្ថខណ្ឌឃាត់ខ្លួនពីបទឆបោក។
តាមការស្តាប់ចម្លើយរបស់ជនសង្ស័យបានសារភាពថា កាលពីថ្ងៃទី២៧ ខែតុលា ឆ្នាំ២០១៧ ខ្លួនពិតជាបានលក់ដីឡូតិ៍មួយកន្លែងទំហំ ៥x២០ ម៉ែត្រ ក្នុងតម្លៃ ៦៧០០ ដុល្លារ ដែលមានទីតាំងនៅភូមិរំលេច ឃុំទួលព្រិច ស្រុកអង្គស្នួល ខេត្តកណ្ដាល ទៅអោយជនរងគ្រោះឈ្មោះ កុយ វិសុទ្ធ ហើយក៏ទទួលប្រាក់កក់ចំនួន ៣៥០០ ដុល្លារពីជនរងគ្រោះពិតប្រាកដមែន ហើយប្រាក់នៅសល់ត្រូវប្រគល់នៅថ្ងៃទី១២ ខែមករា ឆ្នាំ២០១៨ ពេលដែលរត់ប្លង់ផ្ទេរកម្មសិទ្ធរួចរាល់។ តែដល់ថ្ងៃកំណត់ខ្លួនគ្មានប្លង់ប្រគល់ទៅអោយជនរងគ្រោះទេ ហើយលុយដែលជនរងគ្រោះកក់នោះខ្លួនបានយកទៅចាយវាប្រើប្រាស់អស់ហើយ ហើយមកដល់ថ្ងៃទី២៦ ខែឧសភា ឆ្នាំ២០១៨ ត្រូវកងរាជអាវុធហត្ថខណ្ឌព្រែកព្នៅឃាត់ខ្លួនតែម្តង។
បច្ចុប្បន្នកងរាជអាវុធហត្ថខណ្ឌបានបញ្ជូនជនសង្ស័យទៅការិយាល័យប្រឆាំងបទល្មើសព្រហ្មទណ្ឌកងរាជអាវុធហត្ថរាជធានីភ្នំពេញ ដើម្បីចាត់ការតាមនីតិវិធីនៃច្បាប់៕
Source: Kampuchea Thmey Daily
0 Comments