ពានរង្វាន់បាល់ទាត់លីគកំពូលកម្ពុជា Metfone Cambodian League 2018 នឹងបន្តការប្រកួតចំនួន២គូទៀតប្រចាំសប្តាហ៍ទី៧ រៀងៗខ្លួន នៅល្ងាចថ្ងៃអាទិត្យ ទី២៧ ខែឧសភា ឆ្នាំ២០១៨ ដោយក្រុមអគ្គស្នងការដ្ឋាននគរបាលជាតិ (ប៉ូលីស) ប៉ះក្រុមវិសាខា ខណៈក្រុមភ្នំពេញក្រោន ត្រូវទទួលក្រុមអាស៊ីអឺរ៉ុប។
*អគ្គស្នងការដ្ឋាននគរបាលជាតិ ប៉ះវិសាខា
ក្រុមប៉ូលិស ត្រូវទទួលក្រុមវិសាខា នៅវេលាម៉ោង៣រសៀលលើទីលានកីឡដ្ឋាន AEU Sport Park។ ក្រុមប៉ូលិសកំពុងឈរលេខ៥ ក្នុងចំណោមក្លិបទាំង១២ បន្ទាប់ពីឈ្នះបាន៣លើក ស្មើគ្នា១លើកនិងចាញ់២លើក។ លោក នុត សូនី គ្រូបង្វឹកក្រុមនេះរំពឹងថា កូនក្រុមនឹងធ្វើបានល្អបន្ថែមទៀតក្នុងប្រកួតនៅពេលខាងមុខៗ ស្របពេលមានកីឡាករស្ទើរតែពាក់កណ្ដាលក្រុម ទើបតែបញ្ចប់បំពេញកាតព្វកិច្ចនៅសាលាបណ្ឌិតសភានគរបាលជាតិ។
ចំណែកក្រុមវិសាខា វិញជ័យជម្នះនៅក្នុងប្រកួតនេះពិតជាមានសារៈសំខាន់មែនទែន ដោយសារត្រូវការពិន្ទុបន្ថែមដើម្បីប្រជែងជាមួយក្រុមណាហ្គាវើល និងក្រុមបឹងកេត នៅតំបន់កំពូលតារាង។ ទោះបីជាក្រុមនេះជាសមាជិកថ្មីនៅលីគកំពូលកម្ពុជា មែនប៉ុន្តែលោក ហុក សុជីវ័ន្ត ជាគ្រូបង្វឹកបានបង្ហាញភាពខ្លាំងជាបន្តបន្ទាប់ដាក់ក្រុមជើងចាស់។ យ៉ាងណាក្រុមនេះជាបេក្ខភាពមិនអាចមើលរំលងបានក្នុងការប្រជែងយកជើងឯកផងដែរ។
*ភ្នំពេញក្រោន ប៉ះអាស៊ីអឺរ៉ុប
ក្រុមបាល់ទាត់ភ្នំពេញក្រោន ត្រូវទទួលក្រុមអាស៊ីអឺរ៉ុប នៅវេលាម៉ោង៦ល្ងាចលើទីលានកីឡដ្ឋាន RSN Stadium ម្តុំកាំកូស៊ីធី។ ក្រុមពេញក្រោន ក្រោមការដឹកនាំពីសំណាក់លោក Sean Sainsbury ជាគ្រូបង្វឹកកំពុងតែឈរចំណាត់ថ្នាក់លេខ៤បណ្តោះអាសន្នក្នុងចំណោមក្រុមទាំង១២ ខណៈក្រុមនេះជាម្ចាស់ជើងឯក៦សម័យកាលក្នុងពានរង្វាន់នេះផងដែរ។ កីឡាករសំខាន់ៗមួយចំនួនកំពុងមានបញ្ហារបួសខណៈគ្រូបង្វឹកកំពុងតែផ្លាស់ប្តូរប្រព័ន្ធលេងមួយចំនួនឲ្យស្របនឹងកីឡាករក្មេងៗក្នុងក្រុម។
ចំពោះក្រុមអាស៊ីអឺរ៉ុបវិញកំពុងដឹកនាំដោយលោក សុក វាសនា ដោយពេលនេះកំពុងឈរចំណាត់ថ្នាក់លេខ៨បណ្តោះអាសន្នក្នុងតារាងរួមដែលមានក្រុមចំនួន១២ ក្រោយប្រកួតបាន៦លើក ឈ្នះបាន២លើក ស្មើគ្នា២លើក និងចាញ់២លើក មាន៧ពិន្ទុក្នុងដៃ។ ពានរង្វាន់សំខាន់ៗដែលអាស៊ីអឺរ៉ុប ត្រូវចូលរួមប្រកួតនៅរដូវកាលនេះមានពានរង្វាន់ជើងឯកលីគកំពូលកម្ពុជា ពានរង្វាន់សម្តេចតេជោ ហ៊ុន សែន និងពានរង្វាន់ជើងឯកសាកលវិទ្យាល័យថ្នាក់ជាតិ ផងដែរ៕
Source: Kampuchea Thmey Daily
0 Comments