ក្រុមបង្កើតរដ្ឋឥស្លាម នៅប្រទេសអ៊ីរ៉ាក់ និងស៊ីរី ដែលហៅកាត់ថា ISIS នោះ កំពុងតែដាក់បម្រាមចំពោះការប្រើប្រាស់អ៊ីធឺណិតជាលក្ខណៈឯកជននៅក្នុងទឹកដី ដែលខ្លួនដណ្ដើមបាននៅប្រទេសស៊ីរី គឺនៅទីក្រុង Raqa ដោយចាប់បង្ខំអ្នករស់នៅក្នុងទីក្រុងនោះ ព្រមទាំងក្រុមអ្នកប្រយុទ្ធរបស់ខ្លួនឲ្យប្រើប្រាស់តែអ៊ីធឺណិតនៅតាមហាងកាហ្វេតែប៉ុណ្ណោះ ដែលគេអាចគ្រប់គ្រងបាន នេះជាការលើកឡើងរបស់ក្រុមសកម្មជន។
ក្រុមសកម្មជនដែលត្រូវបានគេស្គាល់ថា ជាក្រុមការងារសិទ្ធិមនុស្សរបស់ស៊ីរី រួមជាមួយនឹងក្រុមសកម្មជននៅក្រុង Raqa ក៏ត្រូវបានកំណត់ឲ្យប្រើប្រាស់អ៊ីធឺណិតដូចរបបអ្នកស្រុកទូទៅផងដែរ។
ក្រុមសកម្មជនបានប៉ុស្ដិ៍តាមអនឡាញនូវរូបភាពនៃសន្លឹកប័ណ្ណបម្រាមដែលគេកំពុងតែចែកចាយនៅក្នុងទីក្រុង ដោយព្រមានចំពោះអ្នកចែកចាយអ៊ីធឺណិត ដោយដាក់ឱសានវាទរយៈពេល៤ថ្ងៃ ឲ្យកាត់ផ្ដាច់ wifi ឯកជនទាំងអស់។
យើងតាមបម្រាមនោះ គឺជាកាតព្វកិច្ចចាប់បង្ខំដល់គ្រប់អ្នកផ្ដល់សេវាអ៊ីធឺណិតទាំងអស់ ឲ្យរុះរើប្រព័ន្ធ wifi ទាំងស្រុង សូម្បីតែកងទាហានរបស់ក្រុមរដ្ឋឥស្លាមខ្លួនឯង ក៏មិនអាចប្រើប្រាស់ប្រព័ន្ធអ៊ីធឺណិតនោះផងដែរ។
ជាមួយគ្នានោះផងដែរ ក្រុម IS ក៏កំពុងតែព្យាយាមកាត់ផ្ដាច់ទំនាក់ទំនងរវាងអ្នកប្រយុទ្ធស៊ីរី ដែលមិនមែនស្ថិតនៅក្នុងកងកម្លាំងរបស់ IS មិនឲ្យទាក់ទងទៅដល់គ្រួសាររបស់ពួកគេថែមទៅទៀត ដោយខ្លាចក្រែងថា មនុស្សទាំងនោះព្យាយាមវិលត្រឡប់ទៅផ្ទះរបស់គេវិញ។
ខណៈពេលដែលបម្រាមប្រើប្រាស់អ៊ីនធឺណិតត្រូវបានប្រកាសនោះ ការវាយប្រហារតាមអាកាសរបស់បណ្ដាប្រទេសចម្រុះ ដែលនាំមុខដោយសហរដ្ឋអាមេរិក ក៏កំពុងតែបង្កើនឡើង។ អាមេរិក និងបណ្ដាប្រទេសដែលជាសម្ព័ន្ធមិត្ដបានបើកការវាយប្រហារតាមអាកាសចំនួន៩លើកនៅប្រទេសស៊ីរី និង១៤លើកនៅប្រទេសអ៊ីរ៉ាក់។ ការវាយប្រហារនោះគឺចំណុចគោលដៅតាមបណ្ដាកងឯកភាព ព្រមទាំងទីតាំងប្រយុទ្ធទាំងឡាយដែលស្ថិតនៅក្បែរក្រុង Aleppo, Hasakah និង Kobane ព្រមទាំងចម្ការមីនទាំងឡាយដែលស្ថិតនៅក្បែរក្រុង Raqa នោះផងទៀត។
បណ្ដាប្រទេសចម្រុះដែលកំពុងដឹកនាំការវាយប្រហារតាមអាកាសនៅប្រទេសអីុរ៉ាក់ រួមមាន សហរដ្ឋអាមេរិក អូស្ដ្រាលី បែលហ្ស៊ិក កាណាដា ដាណឺម៉ាក បារាំង ហុល្លង់ និងចក្រភពអង់គ្លេស។
ដោយឡែកបណ្ដាប្រទេសចម្រុះដែលដឹកនាំការវាយប្រហារតាមអាកាសនៅក្នុងប្រទេសស៊ីរីវិញ រួមមាន សហរដ្ឋអាមេរិក បារ៉ែន ហ្សកដានី អារ៉ាប៊ីសាអ៊ូឌីត និងអារ៉ាប់រួមអេមីរ៉ាត់៕
AFP/Al Arabiya News
ISISហាមការប្រើប្រាស់អ៊ីនធឺណិតជាឯកជន នៅក្នុងក្រុង Raqa
0 Comments