លោកClaudio Ranieri បានកំណត់ចក្ខុវិស័យរបស់លោករួចជាស្រេចចំពោះកន្លែងលេងនៅការប្រកួត Europa League ខណៈដែលរូបលោកចាប់ផ្តើមយុទ្ធនាការក្នុងរដូវកាលទី១របស់លោកក្នុងនាមជាអ្នកចាត់ការរបស់ក្លិប Leicester City។
គ្រូបង្វឹកសញ្ជាតិអ៊ីតាលីម្នាក់នេះ ដែលវិលត្រឡប់មកកាន់ក្របខណ្ឌកំពូលបាល់ទាត់អង់គ្លេស Premier League ជាលើកដំបូងក្នុងរយៈពេល១១ឆ្នាំកន្លងមកនេះ ក្រោយពីត្រូវបានគេបណ្តេញចេញពីតំណែងគ្រូបង្វឹករបស់ក្រុមតោខៀវ Chelsea នោះ មានជំនឿចិត្តខ្លាំងណាស់ថា ក្រុមថ្មីរបស់លោកមួយនេះ ច្បាស់ណាស់ថា នឹងមានឱកាសយ៉ាងហោចណាស់ក៏តំណែងសម្រាប់កន្លែងលេងនៅការប្រកួត Europa League នារដូវកាលក្រោយដែរ។
នៅពេលសួរថា តើក្រុម Leicester ដែលត្រឹមជាប់លេខ១៤កាលពីរដូវកាលមុន ក្រោមការដឹកនាំរបស់លោក Nigel Pearson បន្ទាប់ពីមិនមានរកបានជ័យជម្នះជាហូរហែរយៈពេល២ខែផ្តាច់ព្រ័ត្រនៃរដូវកាលនោះ អាចនឹងប្រកួតប្រជែងដណ្តើមបានកន្លែងលេងនៅការប្រកួតបាល់ទាត់អឺរ៉ុបដែរឬអត់? លោក Ranieri បានឆ្លើយដោយគ្មានភាពស្ទាក់ស្ទើរថា លោកពិតជាមានសុទិដ្ឋិនិយមខ្លាំងណាស់។
លោកបាននិយាយថា លោកគិតថា លោកគឺជាមនុស្សម្នាក់ដែលមានមហិច្ឆតាខ្ពស់ ហើយនៅពេលដែលលោកបាននិយាយគ្នាជាមួយមនុស្សនៅក្នុងក្លិប លោកអាចយល់បានថាពួកគេមាននូវគម្រោងការច្បាស់លាស់ និងមានកម្មវិធីល្អ ដែលលោកអាចទទួលយកបាន ដើម្បីបោះជំហានឆ្ពោះទៅរកភាពជោគជ័យទាំងអស់គ្នា។
សូមបញ្ជាក់ថា លោក Ranieri វ័យ៦៣ឆ្នាំ ដែលបានចុះហត្ថលេខាលើកិច្ចព្រមព្រៀងរយៈពេល៣ឆ្នាំក្នុងតម្លៃ១.៥លានផោនក្នុង១ឆ្នាំជាមួយក្លិបនៅក្នុងទឹកដី King Power គ្រប់គ្រងការប្រកួតលើកដំបូងរបស់លោក នៅការប្រកួតលក្ខណៈមិត្តភាពជាមួយក្រុម Lincoln City នៅថ្ងៃអង្គារ៕
លោកClaudio Ranieri មានសុទិដ្ឋិនិយមចំពោះរជ្ជកាលដំបូង ជាមួយក្លិប Leicester City
0 Comments