អ្នកបំផ្ទុះគ្រាប់បែកអត្តឃាតម្នាក់ ដែលគេសង្ស័យថា ជាក្រុមរដ្ឋឥស្លាមបានសម្លាប់មនុស្សយ៉ាងហោចណាស់៣០នាក់ ដែលភាគច្រើនជានិស្សិតវ័យក្មេងនៅក្នុងការវាយប្រហារលើទីក្រុងទួរគី មួយស្ថិតនៅជិតព្រំដែនស៊ីរី កាលពីថ្ងៃចន្ទ។
សពត្រូវបានគេដាក់នៅក្រោមដើមឈើបន្ទាប់ពីការផ្ទុះនៅខាងក្រៅមជ្ឈមណ្ឌលវប្បធម៌មួយនៅក្នុងទីក្រុង Suruc ដែលភាគច្រើនជាជនជាតិឃឺដនៅភាគអាគ្នេយ៍ប្រទេសទួរគី មានចម្ងាយប្រមាណ១០គីឡូម៉ែត្រពីទីក្រុងស៊ីរី Kobani ដែលជាកន្លែងក្រុមឃឺដកំពុងប្រយុទ្ធជាមួយក្រុមរដ្ឋឥស្លាម។
ការផ្ទុះនេះបានវាយប្រហារក្រុមនិស្សិត ដែលភាគច្រើនមានអាយុរៀននៅសាកលវិទ្យាល័យមកពីក្រុមសកម្មជនមួយ នៅពេលពួកគេបានជួបជុំគ្នាដើម្បីធ្វើសេចក្តីថ្លែងការណ៍មួយទៅកាន់អ្នកកាសែតក្នុងស្រុកអំពីការធ្វើដំណើរមួយដែលពួកគេបានរៀបចំផែនការដើម្បីជួយកសាង Kobani ឡើងវិញ។
សម្ព័ន្ធមិត្តអង្គការណាតូរបស់ប្រទេសទួរគីកំពុងស្វែងរកការត្រួតពិនិត្យយ៉ាងតឹងរឹុងនៅច្រកព្រំដែនជាមួយប្រទេសស៊ីរី ដែលស្ថិតតាមបណ្តោយទឹកដីដែលកាន់កាប់ដោយក្រុមរដ្ឋឥស្លាម។ ប៉ុន្តែការត្រួតពិនិត្យគឺជាការលំបាកដោយសារតែជនភៀសខ្លួនស៊ីរីប្រមាណ ១.៨ លាននាក់ ឥឡូវនេះកំពុងស្ថិតនៅខាងប្រទេសទួរគី។
សហរដ្ឋអាមេរិក ដែលមានមូលដ្ឋានអាកាសមួយនៅតំបន់ Incirlik ក្នុងភាគខាងត្បូងប្រទេសទួរគី បានហៅការបំផ្ទុះគ្រាប់បែកនេះថា ជា«ការវាយប្រហារភេរវកម្មដ៏សាហាវយង់ឃ្នងមួយ»។
នាយករដ្ឋមន្ត្រីលោក Ahmet Davutoglu បាននិយាយប្រាប់សន្និសីទសារព័ត៌មានមួយនៅទីក្រុងអង់ការ៉ាថា មនុស្ស ៣០នាក់ត្រូវបានសម្លាប់។
កាសែត Hurriyet បានឲ្យដឹងថា អ្នកវាយប្រហារ គឺជាស្ត្រីម្នាក់អាយុ១៨ឆ្នាំ ប៉ុន្តែមិនមានការអះអាងនោះទេ។ រូបភាពវីដេអូបានបង្ហាញថា បុរស និងស្ត្រីវ័យក្មេងជាច្រើនកំពុងឈរនៅពីក្រោយផ្ទាំងបដាគាំទ្រ Kobani ដោយអ្នកខ្លះកាន់ទង់ពណ៌ក្រហមតូចមួយ។ភ្លាមៗនោះ ស្រាប់តែមានការផ្ទុះដ៏ធំចេញពីក្នុងហ្វូងមនុស្សនោះ។
ការវាយប្រហារក្នុងទីក្រុង Suruc បានកើតឡើងប៉ុន្មានសប្តាហ៍ បន្ទាប់ពីប្រទេសទួរគី បានដាក់ពង្រាយកងទ័ព និងឧបករណ៍បន្ថែមទៀតនៅតាមផ្នែកខ្លះនៃព្រំដែនរបស់ខ្លួនជាមួយប្រទេសស៊ីរី ដោយមានការព្រួយបារម្ភអំពីហានិភ័យនៃផលប៉ះពាល់នៅពេលការវាយប្រយុទ្ធគ្នារវាងកងកម្លាំងឃឺដ ដែលជាក្រុមពួកឧទ្ទាមនិងកងទ័ពរដ្ឋាភិបាលស៊ីរី ព្រមទាំងពួកសកម្មប្រយុទ្ធរដ្ឋឥស្លាមកំពុងឆាបឆេះ។
នៅក្នុងរយៈពេលខ្លីបន្ទាប់ពីនោះ ការផ្ទុះមួយក៏បានកើតឡើងផងដែរក្នុងទីក្រុង Kobani ដែលក្រុមអ្នកឃ្លាំមើលមួយបានស្តីបន្ទោសលើការបំផ្ទុះគ្រាប់បែកក្នុងរថយន្ត។ អ្នកនាំពាក្យរបស់កងកម្លាំងឃឺដស៊ីរីដែលគេស្គាល់ថា YPG នោះបាននិយាយថា អ្នកប្រយុទ្ធចំនួនពីរនាក់បានស្លាប់។
មេដឹកនាំរបស់ប្រទេសទួរគីបាននិយាយថា ពួកគេមិនមានគម្រោងណាមួយចំពោះការលុកលុយផ្នែកយោធាជាឯកតោភាគីចូលក្នុងប្រទេសស៊ីរីនោះទេ ប៉ុន្តែក៏បាននិយាយផងដែរថា ពួកគេនឹងធ្វើអ្វីដែលចាំបាច់ក្នុងការការពារព្រំដែនរបស់ខ្លួន៕
Reuters
ទួរគី ប្តេជ្ញារឹតបន្តឹងផ្នែកសន្តិសុខ បន្ទាប់ពីមានការវាយប្រហារដោយគ្រាប់បែក នៅក្បែរព្រំដែន
0 Comments