ភ្នំពេញ៖ តារាសម្តែង និងជាប្រធានសមាគមសិល្បករខ្មែរ អ្នកនាង ចន ច័ន្ទលក្ខិណា បានបញ្ចេញសារប្រតិកម្មហាក់មានការអន់ចិត្តខ្លាំងចំពោះកម្មវិធីមួយ ដែលបានផ្ញើលិខិតមកខាងសមាគមរបស់ខ្លួន ដើម្បីស្នើឲ្យមានការចូលរួមពីសំណាក់សិល្បករ-សិល្បការិនី ក្នុងការអបអរពិធីថ្នាក់ជាតិមួយ។ ប៉ុន្តែជាលទ្ធផលបានធ្វើឲ្យនាង និងក្រុមតារាសិល្បៈទាំងនោះអស់សង្ឃឹមខ្លាំង។
អ្នកនាង ចន ច័ន្ទលក្ខិណា បានសរសេររៀបរាប់ថា មិនមែនជារឿងងាយស្រួលទេដែលសមាគមខំប្រមូលអ្នកសិល្បៈជួបជុំគ្នាម្តងៗអោយចូលរួម ដោយគ្មានប្រយោជន៍ចំពោះពួកគាត់ ដោយគិតថាដើម្បីមុខមាត់ប្រទេសជាតិ។ មិនបានទទួលកម្រៃក៏គ្នាសុខចិត្ត ចំណាយពេលវេលាក៏គ្នាព្រម ដាច់បាយក៏គ្នាមិនរអ៊ូ ហាលក្តៅក៏គ្នាមិនត្អូញ ចូលបន្ទប់ទឹករួមមនុស្សរាប់ម៉ឺននាក់ក៏គ្នាទ្រាំ។
ប្រធានសមាគមរូបនេះនិយាយទៀតថា តែសូមផ្តល់តម្លៃដល់ពួកគាត់ផង កុំយកចិត្តតែអ្នកល្បីពេក អ្នកល្បីខ្លះគេមិនយល់មុខកម្មវិធីជាតិមិនជាតិនោះទេ បើគ្មានលុយគឺគេមិនទៅ អយុត្តិធម៌សម្រាប់គ្នាអ្នកសិល្បៈតូចតាចណាស់ អ្នកមិនអោយតម្លៃពួកគាត់តែខ្ញុំអោយតម្លៃពួកគាត់ ទោះពួកគាត់ជាអ្នកសិល្បៈមិនល្បីក៏ដោយ តែសម្រាប់ខ្ញុំពួកគាត់គឺល្បីៗក្នុងចិត្តខ្ញុំ ក្នុងនាមអ្នកសិល្បៈមានបេះដូងជាតិ និង ជួយសង្គមដោយពិតប្រាកដ។
អ្នកនាង ចន ច័ន្ទលក្ខិណា បន្តថា ពួកគាត់ជាសរសៃឈាមរបស់សមាគមសិល្បករខ្មែរ ដែលមានខ្ញុំជាប្រធាន តែការដែលពួកគាត់ចូលរួមនេះ មិនមែនខ្ញុំប្រើអំណាចជាប្រធានសមាគមទៅបង្ខំអោយគាត់ចូលរួមទេ គឺការអញ្ជើញគាត់ដោយមនោសញ្ចេតនាស្រលាញ់រាប់អានគ្នាដោយទឹកចិត្តជាយូរឆ្នាំ រួមទាំងសេចក្តីស្មោះស្ម័គ្រជួយគ្នាទៅវិញទៅមក ក្នុងនាមរៀមច្បង និងសិស្សប្អូន ដោយមិនមានការរើសអើង និងបែងចែកវណ្ណៈរវាងពួកគាត់ និងរៀមច្បងម្នាក់នេះ តាំងពីមុននឹងខ្ញុំចូលមកកាន់តំណែងជាប្រធានទៅទៀត។
តារាសម្តែងដែលនៅតែរក្សាបានប្រជាប្រិយភាពអ្នកនាង ចន ច័ន្ទលក្ខិណា បានបញ្ជាក់បន្ថែមថា សមាគមសិល្បករខ្មែរ មិនមែនសម្រាប់ស្ថាប័នផ្សេងៗចង់បោកប្រើដើម្បីទាមទារប្រយោជន៍នោះទេ សូមផ្តល់តម្លៃដល់សមាជិកសមាជិការបស់សមាគមផង។
ការបញ្ចេញមតិរបស់ប្រធានសមាគមសិល្បករខ្មែរ អ្នកនាង ចន ច័ន្ទលក្ខិណា ខាងលើនេះ ស្របពេលដែលតំណាងរបស់ខ្លួន ដែលដឹកនាំក្រុមអ្នកសិល្បៈទៅចូលរួមកម្មវិធីថ្នាក់ជាតិមួយបានបញ្ចេញសារត្អូញត្អែរថា ម្សិលមិញពិតជាហួសចិត្តណាស់ ចេញលិខិតអញ្ជើញក្រុមរបស់ខ្ញុំឲ្យទៅចូលរួមកម្មវិធីដ៏ធំមួយ ក្រោមអធិបតីភាព សម្តេចតេជោ ចូលរួមផងដែរ គាត់ថាមិនបាច់មានប័ណ្ណចូលរួមក៏គេឲ្យចូលដែរ ហើយកន្លែងអង្គុយនៅក្រោមវេទិកាសម្តេចតែម្តង កន្លែងហ្នឹងជាកន្លែង VIP។ ដល់ពេលខ្ញុំទៅមុនម៉ោងដើម្បីរៀបចំកន្លែងឲ្យបងប្អូនសិល្បករយើងអង្គុយ អ្នកយាមថាចូលអត់បានទេបើអត់មានប័ណ្ណ។
ប្រភពបានបន្តទៀតថា ខ្ញុំក៏តេទៅគាត់ដើម្បីយកប័ណ្ណមកឲ្យខ្ញុំ ដល់ពេលបានប័ណ្ណឲ្យខ្ញុំគាត់ឲ្យតែ ២០ សន្លឹកទេ ខ្ញុំប្រាប់គាត់ថា ក្រុមខ្ញុំមក ៤០ នាក់ ទើបគាត់ឲ្យ ២០ សន្លឹកទៀត ហើយទៅរកកន្លែងអង្គុយ។ ក្រុមយុវជនគេថា បើបងមានប័ណ្ណ VIP ទើបអាចអង្គុយកន្លែងហ្នឹងបាន។ ខ្ញុំតេសួរគាត់ៗថាទៅអង្គុយទៅគេមិនមែនមកចូលរួមទាំងអស់គ្នាទេ ខ្ញុំថា យីបងឯងចេះឲ្យទៅអង្គុយៗយ៉ាងម៉េចបើម្ចាស់កៅអីគេមកដែរ គេដេញចេញមិនខ្មាសគេទេអី? គាត់ថាចាំខ្ញុំទៅរៀបចំកន្លែងឲ្យក្រុមបងអង្គុយ។ ដល់ពេលរៀបចំកន្លែងឲ្យអង្គុយឲ្យទៅអង្គុយកន្លែងធម្មតាវិញ ហ្នឹងសំណាងហើយដែលប្រធានខ្ញុំទាំង ២ គាត់អត់បានមកចូលរួម បើគាត់បានមកចូលរួមវិញដឹងតែត្រូវមាត់បាត់ ព្រោះខ្ញុំជាអ្នកសម្របសម្រួលការងារហ្នឹងផង៕
Source: Kampuchea Thmey Daily
0 Comments