ភ្នំពេញ ៖ គណៈកម្មការកណ្តាលឥស្លាមប្រទេសថៃ លោក សូរិន ប៉ាឡារ៉េ ជាអគ្គលេខាធិការ ក្នុងនាមគណៈកម្មការកណ្តាលឥស្លាមថៃ និងជួសមុខឲ្យខុទ្ទការល័យសៃខុល ឥស្លាម ព្រមទាំងវិទ្យាស្ថានស្តង់ដារហាឡាលប្រទេសថៃ ទាំងអស់សូមគោរពថ្លែងអំណរគុណយ៉ាងជ្រាលជ្រៅ ជូន ចំពោះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលបានផ្តល់កិត្តិយសដ៏ខ្ពង់ខ្ពស់អញ្ជើញយើងខ្ញុំ ចូលរួមក្នុងពិធីពិសារអាហារស្រាយបួសរបស់សាសនិកឥស្លាមកម្ពុជា កាលពីថ្ងៃទី២៩ ខែឧសភា ឆ្នាំ ២០១៨ ដែលរៀបចំដោយ រាជរដ្ឋាភិបាលកម្ពុជា។
លិខិតអគុណសម្ដេចនាយករដ្ឋមន្ដ្រីនេះ បានប្រព្រឹត្តិទៅកាលពីថ្ងៃព្រហស្បតិ៍ ២រោចខែជេស្ឋ ឆ្នាំចសំរឹទ្ធិស័ក ព.ស២៥៦២ ត្រូវនិងថ្ងៃទី៣១ ឧសភា ឆ្នាំ២០១៨។
ខ្លឹមសារលិខិតនោះបានសរសេរថា ក្នុងនាមគណៈកម្មការកណ្តាលឥស្លាមប្រទេសថៃ យើងខ្ញុំក៏សូមអបអរសាទរចំពោះរាជរដ្ឋាភិបាលកម្ពុជា ក្នុងការរៀបចំពិធីដ៏មានសារៈសំខាន់នេះឡើង ហើយជាក់ស្តែង តាមការកត់សម្គាល់ នេះជាពិធីពិសារអាហារស្រាយបួសដ៏ធំធេងជាងគេបង្អស់ ដែលរៀបចំឡើង ដោយប្រមុខរាជ រដ្ឋាភិបាលកម្ពុជា បានយ៉ាងល្អប្រសើរ ដោយប្រទេសដែលមិនមែនមុស្លិមមួយ នោះកំពុងយកគំរូតាមផងដែរ។
ពួកគេពិតជាមានក្តីរំភើប ពេលដែលបានលឺប្រសាសន៍របស់សម្តេចអគ្គមហាសេនាបតីតេជោហ៊ុន សែន បានលើកឡើងថា បន្ទាប់ពីរាជរដ្ឋាភិបាលកម្ពុជាបានបញ្ចូល លោកគ្រូ អ្នកគ្រូខ្មែរឥស្លាម ចំនួន១៥០០នាក់ទៅក្នុងក្របខណ្ឌមន្ត្រីរាជការ គឺឃើញថា វិស័យអប់រំរបស់សហគមន៍ ខ្មែរអ៊ីស្លាម មានការរីកចម្រើន យ៉ាងខ្លាំងហើយជាពិសេស រាជរដ្ឋាភិបាលកម្ពុជាបានដោះស្រាយវិបត្តិហិរញ្ញវត្ថុ ដែលរៃអង្គាសពីសហគមន៍ និងគ្រួសារ ដើម្បីផ្គត់ផ្គង់ ដល់លោកគ្រូ អ្នកគ្រូ ទាំង អស់នោះ ឥឡូវ បានធូស្រាលមួយកម្រិតធំ ផ្នែកហិរញ្ញវត្ថុនេះ។ បងប្អូនបានកត់សម្គាល់ឃើញថា សិស្សនិស្សិតខ្មែរអ៊ីស្លាម ក៏ទទួលបានការអប់រំក្នុងកម្រិតឧត្តមសិក្សាជាច្រើនបន្តបន្ទាប់។ ក្រុមតំណាងក៏សូមអំពាវនាវដល់ពួកគាត់ ឲ្យមានការខិតខំប្រឹងប្រែងសិក្សាមិនមែនតែចំណេះដឹងផ្នែកសាសនាប៉ុណ្ណោះទេ គឺត្រូវដើរទន្ទឹមនឹងបច្ចេកវិទ្យា ជំនាញ ដើម្បីស្វែងរកការងារ ធ្វើបានល្អប្រសើរ សម្រាប់លើកកំពស់ជីវភាពរស់នៅរបស់ពួកគេ ផងដែរ។
ជាក់ស្តែង ដោយមានការជ្រោមជ្រែងដ៏ខ្ពង់ខ្ពស់របស់សម្តេច គឺសហគមន៍ ខ្មែរអ៊ីស្លាមក្នុងប្រទេសរបស់សម្តេច ពិតជារីកចម្រើនទៅមុខជាបន្តបន្ទាប់ ទទួលបាននូវគោលដៅអភិវឌ្ឍន៍ ប្រកបដោយចីរភាព។ យើងខ្ញុំសូមបួងសួងពីអល់ឡោះជាម្ចាស់ សូមប្រសិទ្ធពរជ័យ ជូនចំពោះរដ្ឋាភិបាលរបស់សម្តេច និង ប្រជាជនកម្ពុជាទាំងមូល ឲ្យទទួលបានតែសេចក្ដីសុខសន្ដិភាពរីកចម្រើនជារៀងដ៏រាប។ ជាថ្មីម្តងទៀត យើងសូមជូនពរឲ្យព្រះរាជាណាចក្រកម្ពុជា ទាំងមូល នឹងត្រូវបានអង្គការសហប្រតិបត្តិការឥស្លាម OIC ទទួលស្គាល់ជាសមាជិតសង្កេតការណ៍នៅក្នុងពេលឆាប់ៗនេះ៕
Source: Kampuchea Thmey Daily
0 Comments