ភ្នំពេញ ៖ អគ្គលេខាធិការរបស់អង្គការសហប្រតិបត្តិការឥស្លាម (OIC) បានសម្ដែងការគាំទ្រ និងកោតសរសើរកម្ពុជាក្រោមការដឹកនាំរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលបានរៀបចំ កម្មវិធី ជួបជុំ ជាមួយថ្នាក់ដឹកនាំជាន់ខ្ពស់ ពិសាអាហារស្រាយបួសរ៉ាម៉ាឌន របស់សាសនិក អ៊ីស្លាមកម្ពុជា។ សារលិខិតគាំទ្រ របស់អគ្គលេខាធិការនៃអង្គការសហប្រតិបត្តិការឥស្លាមOICប្រទេសអារ៉ាបីសាអូឌីតបានសរសេរចុះនៅក្នុងគេហទំព័រ វើបសាយផ្លូវការSang កាលពីថ្ងៃព្រហស្បតិ៍ ២រោច ខែជេស្ឋ ឆ្នាំចសំរឹទ្ធិស័ក ព.ស២៥៦២ ត្រូវនឹងថ្ងៃទី៣១ ខែឧសភា ឆ្នាំ២០១៨។
យោងតាមគេហទំព័រ ដែលបានចុះផ្សព្វផ្សាយ ផ្លូវការនៃប្រទេសអារ៉ាប៊ីសាអូឌីតSabq នោះថា ខ្ញុំជាអគ្គលេខាធិការ នៃអង្គការសហប្រតិបត្ដិការ(OIC) បណ្ឌិត យូសូហ្វ អាល់អូសៃមីន ប្រទេសអារ៉ាបីសាអូឌីត ខ្ញុំសូមគាំទ្រទាំងស្រុងចំពោះកម្មវិធីជំនួបជាមួយថ្នាក់ដឹកនាំជាន់ខ្ពស់តាមរយៈ ពិសារអាហារស្រាយបួសរ៉ាម៉ាឌន របស់សហគមន៍ខ្មែរអ៊ីស្លាម កាលពីរាត្រីថ្ងៃទី២៩ ឧសភា ២០១៨ ដែលរៀបចំឡើង ដោយប្រមុខរាជរដ្ឋាភិបាលកម្ពុជា ជានិមិត្តរូបនៃការគោរពរបស់ប្រទេសកម្ពុជាចំពោះភាពសម្បូរបែបនៃវប្បធម៌ទូទៅ ដែលរស់នៅប្រកបដោយសុខដុមរមនា និងការអត់ឱន និងការឲ្យតម្លៃខ្ពស់ពីរដ្ឋាភិបាលសម្រាប់សហគមន៍មូស្លីមកម្ពុជា។
លោកបានបន្តទៀតថា សមាហរណកម្ម និងការរួមរស់ដោយ សុខសន្តិភាព ជាគំរូដ៏ល្អមួយសម្រាប់បណ្តាប្រទេសដទៃទៀតនៅក្នុងតំបន់ យកគំរូតាម។ លោកបានសង្កត់ធ្ងន់ថា រដ្ឋាភិបាលកម្ពុជាបានយកចិត្តទុកដាក់ក្នុងការពង្រឹង និងពង្រីកនូវការអត់ឱនចំពោះផ្នែកសាសនា នេះបង្ហាញយ៉ាងច្បាស់នូវភាពវិជ្ជមាន និងជាកត្តាមួយក្នុងចំណោមកត្តាផ្សេងៗ ដែលបញ្ជាក់ថា កម្ពុជាជាប្រទេសមានលក្ខណៈពិសេសក្នុងចំណោមប្រទេស ផ្សេងៗ នៅលើសកលលោក។
លោកបានបន្ថែមថា ប្រទេសកម្ពុជាបានយកចិត្តទុកដាក់បំផុតចំពោះការរួមរស់ដោយ សុខសន្តិភាព និងភាពសុខដុមរមនានៃអន្តរជំនឿ ហើយលោកបានស្នើសុំឲ្យសហគមន៍ឥស្លាម ទាំងអស់ត្រូវ ចូលរួមចំណែកបន្ថែមទៀតដល់ការអភិវឌ្ឍន៍ សេដ្ឋកិច្ច របស់ប្រទេសកម្ពុជាឲ្យមានការរីកចម្រើន៕
Source: Kampuchea Thmey Daily
0 Comments