ពានរង្វាន់លីគកំពូលប្រទេសម៉ាឡេស៊ី (Malaysia Super League) រដូវកាលឆ្នាំ២០១៨ នឹងបន្តការប្រកួតសប្ដាហ៍ទី១៣ របស់ខ្លួននៅចុងសប្ដាហ៍នេះ ស្របពេលក្រុមដែលកីឡាកររបស់កម្ពុជា ១រូបកំពុងប្រកបអាជីពនៅទីនោះ Teregganu FA របស់ ធារី ចន្ថាប៊ីន កំពុងត្រូវការពិន្ទុបន្ថែមដើម្បី កាន់តែកៀកតំបន់ប្រជែងកំពូលតារាងផងដែរ។
កម្មវិធីប្រកួតសរុបប្រចាំសប្ដាហ៍ទី១៣ នេះមាននៅថ្ងៃសុក្រ ទី១ ខែមិថុនា ក្រុម Kedah ប៉ះក្រុម Melaka United ខណៈក្រុម Selangor ជួបក្រុម Kelantan នៅម៉ោង៨យប់ដូចគ្នា។ នៅថ្ងៃសៅរ៍ ទី២ខែមិថុនាវិញ ក្រុម Johor ប៉ះក្រុម Perak ខណៈក្រុម Kuala Lumpur ទទួលក្រុម Teranggananu របស់ ធារី ចន្ថាប៊ីន និងក្រុម PKNP ជួបក្រុម Pahang FA។ នៅថ្ងៃអាទិត្យ ទី៣ ខែមិថុនា ក្រុម Negeri Sambilan ជួបក្រុម PKNS នៅវេលាម៉ោង៨យប់ទាំងអស់។
លីគកំពូលម៉ាឡេស៊ី ឆ្លងកាត់១២ប្រកួតមកនេះក្រុមTerengganu របស់ ធារី ចន្ថាប៊ីន នៅតែត្រូវការពិន្ទុបន្ថែមដើម្បីប្រជែងកំពូលតារាងជាមួយក្រុមខ្លាំងJorhor និងក្រុម Pahang FA ជាក្រុមចាស់របស់ ចាន់ វឌ្ឍនាកា ក្រុម Perak និងក្រុម PKNS ជាដើម។ ចំណែកក្រុម Negeri Sembilan អតីតក្រុមរបស់ ប្រាក់ មុន្នីឧត្តម ក៏ត្រូវការពិន្ទុដែរដើម្បីគេឱ្យផុតពីតំបន់ដែលត្រូវកាត់ចេញឱ្យទៅលេងពានរង្វាន់លីគលំដាប់ទី២ របស់ម៉ាឡេស៊ី។
ពានរង្វាន់លីគកំពូលម៉ាឡេស៊ី មានក្រុមសរុបចំនួន១២ក្រុមដោយតម្រូវឲ្យក្រុមទាំងអស់ប៉ះគ្នាចំនួន២លើក (២ជុំ) ហើយក្រុមដែលមានពិន្ទុច្រើនជាងគេនៅចប់រដូវកាលនឹងឈ្នះជើងឯកនឹងទទួលកៅអីឡើងទៅលេងក្នុងពានរង្វាន់ AFC Champion League 2019 ផងដែរ។ តាមគ្រោងការប្រកួតនឹងបញ្ចប់នៅអំឡុងខែកញ្ញា ឆ្នាំ២០១៨ ខាងមុខ មុនក្រុមជម្រើសជាតិរបស់ប្រទេសនេះត្រៀមប្រកួតក្នុងពានរង្វាន់ AFF Suzuki Cup 2018។
សូមបញ្ជាក់ថា កម្ពុជា មានកីឡាករឆ្នើមៗចំនួន៤រូបចេញទៅប្រកបអាជីពនៅពានរង្វាន់លីគកំពូលប្រទេសម៉ាឡេស៊ី នៅដើមរដូវកាលឆ្នាំ២០១៨ នេះដោយក្នុងនោះមានកែវ សុខផេង លេងនៅក្លិប PKNP FC កីឡាករ ចាន់ វឌ្ឍនាកា Panhag FA និងកីឡាករ ធារី ចន្ថាប៊ីន ទៅកាន់ក្លិបTerengganu FC និងកីឡាករ ប្រាក់ មុន្នីឧត្តម លេងនៅក្លិបNegeri Sembilan។ ក្នុងចំណោមអ្នកទាំង៤មានតែកីឡាករ កែវ សុខផេង ប៉ុណ្ណោះ ដែលរកគ្រាប់បាល់ឲ្យក្រុមបានមុនគេ។ ប៉ុន្តែពេលនេះ កែវ សុខផេង ប្រាក់ មុន្នីឧត្តម និង ចាន់ វឌ្ឍនាកា ត្រូវបានក្លិបដកចេញពីបញ្ជីក្នុងក្រុម។ លក្ខណៈពិសេសរបស់កីឡាករទាំង៤នេះ គឺទទួលបានប្រាក់បៀវត្សខ្ទង់ពាន់រហូតដល់ខ្ទង់ម៉ឺនដុល្លារអាមេរិក ព្រមទាំងមានផ្ទះស្នាក់នៅមួយ ឡានជិះ១គ្រឿង និងមានប្រាក់រង្វាន់ផ្សេងៗទៀតផងដែរ៕
Source: Kampuchea Thmey Daily
0 Comments