បន្ទាយមានជ័យ ៖ ផ្លូវចាក់បេតុង១ខ្សែនិងធ្វើការជួសជុលសម្រួលផ្លូវក្រាលកម្ទេចថ្មនិងក្រួសនៅក្នុងភូមិខ្លាកូនចាស់ស្ថិតក្នុងសង្កាត់កំពង់ស្វាយ ក្រុងសីរីសោភ័ណ ខេត្តបន្ទាយមានជ័យជាច្រើនខ្សែ និង នៅបន្តធ្វើសម្រាប់រដូវវស្សានេះ ក៏ដូចនៅរដូវប្រាំងបន្តទៀតផងដែរ។
នៅព្រឹក ថ្ងៃទី២៦ ខែឧសភា ឆ្នាំ២០១៨នេះលោកសួន បវរ អភិបាលខេត្តបន្ទាយមានជ័យបានប្រាប់អ្នកយកព័ត៌មានឲ្យដឹងថា រដ្ឋបាលខេត្តបានសម្រេចទម្លាក់ថវិកាគុណប្រយោជន៍ខេត្តយកមកអភិវឌ្ឍន៍ហេដ្ឋារចនាសម្ព័ន្ធនានានៅថ្នាក់ខេត្ត ស្រុកក្រុងឃុំសង្កាត់យ៉ាងសស្រាក់សស្រាំក្នុងនោះសង្កាត់កំពង់ស្វាយទទួលបានគម្រោងកសាងផ្លូវបេតុង និង ជួសជុលផ្លូវជាច្រើនខ្សែប្រព័ន្ធលូផងដែរ។
លោកសួន បវ បានបញ្ជាក់ឲ្យដឹងទៀតថា ក្នុងនោះកាលពីក្រោយបោះឆ្នោតឃុំសង្កាត់ថ្ងៃទី៤មិថុនាឆ្នាំ២០១៨ កន្លងមក ថវិកាគុណប្រយោជន៍ខេត្តបានយកមកកសាងផ្លូវបេតុង១ខ្សែប្រវែង១.០០០ម៉ែត្រ និងទទឹង៧ម នៅចំណុចបំបែកផ្លូវជាតិលេខ៥៦ ទៅសាលាសង្កាត់ ទៅវត្តខ្លាកូនចាស់ក្នុងភូមិខ្លាកូនចាស់និងសាលាបឋមសិក្សាប៉ោយសូភីក្នុងភូមិ២។
ហើយឥឡូងនេះ បានផ្តល់ថវិកាគម្រោងផ្លូវបេតុង២ខ្សែទៀត មានប្រវែង១ខ្សែៗ ១.០០០ម៉ែត្រគុណ៧ម៉ែត្រនិងលូ១.០០០កង់។ ផ្លូវបេតុងនោះ ១ខ្សែចេញពីបំបែកផ្លូវជាតិលេខ៥៦ ទៅមណ្ឌលសុខភាពកំពង់ស្វាយ១ ក្នុងភូមិខ្លាកូនចាស់និង១ខ្សែទៀតចេញពីបំបែកផ្លូវជាតិលេខ៥៦ដែរ ទៅស្នាក់ការគណបក្សប្រជាជនកម្ពុជាសង្កាត់និងទៅជើងភ្នំខ្លាកូនចាស់។
ក្នុងនោះ លោកហ៊ឹល រ៉ាយ៉ា អភិបាលក្រុងសិរីសោភ័ណនិងមន្ត្រីជំនាញ ក្រុមការងារ សប្បុរសជនពាក់ព័ន្ធបាននឹងកំពុងជួសជុល សម្រួលផ្លូវលំក្រាលថ្មមិច ក្រាលគ្រួស ក្រាលដីក្នុងខ្សែខ្លី វែងសរុបជាង៣០ខ្សែផ្សេងទៀតផង ហើយនៅពេលដ៏ខ្លីខាងមុខ ថវិកាគុណប្រយោជន៍ខេត្ត ក្រៅពីដាក់បង្គោលភ្លើងគោមបំភ្លឺតាមផ្លូវសំខាន់ៗមួយចំនួន ក៏នឹងស្ថាបនាផ្លូវលេខ៤ជាផ្លូវបេតុងវែងជាងមុន១ខ្សែពីបំបែកផ្លូវជាតិលេខ៦កាត់ភូមិកំពង់ស្វាយ ភូមិសូភីមកដល់ភូមិ២ផងដែរ។
ចំណែកពលរដ្ឋទទួលផល ក៏ដូចលោកអាន់ វុត្ថា បុគ្គលិកមណ្ឌលសុខភាពកំពង់ស្វាយ១ បានប្រាប់អ្នកយកព័ត៌មានឲ្យដឹងថា មុននេះ ផ្លូវនានា រួមទាំងផ្លូវចូលមណ្ឌលសុខភាពកំពង់ស្វាយ១នេះ មានស្រួល មានលំបាក ក្នុងនោះមានជង្ហុក ថ្លុកទឹក ភក់ធំៗ ដែលបង្កការលំបាកដល់ពលរដ្ឋ ក៏ដូចជាអ្នកជំងឺ ឬ សាធារណជនមកទទួលសេវានៅមណ្ឌលសុខភាពផងដែរ ប៉ុន្តែឥឡូវនេះ ផ្លូវនានា ពិសេសផ្លូវនេះ បានក្រាលបេតុងល្អស្អាត ងាយស្រួលធ្វើដំណើរហើយ។ លោកនិងពលរដ្ឋសូមថ្លែងអំណរគុណដល់អាជ្ញាធរដែលយកចិត្តទុកដាក់និងជួយស្ថាបនាផ្លូវទាំងអស់នេះ ហើយក៏សំណូមអាជ្ញាធរនិងជំនាញបន្តជួយកសាងផ្លូវ ដាក់ប្រព័ន្ធលូ ហើយធ្វើឲ្យត្រូវស្តង់ដារ គុណភាពនិងបច្ចេកទេសបន្ថែមនៅផ្លូវផ្សេងបន្តទៀត៕
Source: Kampuchea Thmey Daily
0 Comments