កំពង់ចាម៖ គ្រោះធម្មជាតិបង្កដោយខ្យល់កន្ត្រាក់ កាលពីរសៀលថ្ងៃទី២៦ ខែឧសភា ឆ្នាំ២០១៨ បានធ្វើអោយលំនៅឋានរបស់ប្រជាពលរដ្ឋចំនួន ៤៩៦ ខ្នង នៅស្រុកបាធាយ ខេត្តកំពង់ចាម បានរលំ និងជនរងគ្រោះមួយចំនួនបានរងរបួសធ្ងន់ និងស្រាល។
លោក សំ ណាល់ អធិការនគរបាលស្រុកបាធាយ បានអោយដឹងថា នៅព្រឹកថ្ងៃទី២៧ ខែឧសភា ឆ្នាំ២០១៨ ឯកឧត្តម នាយឧត្តមសេនីយ៍ សន្តិបណ្ឌិតអគ្គស្នងការនគរបាលជាតិ និងឯកឧត្តម កួច ចំរើន អភិបាលនៃគណៈអភិបាលខេត្តកំពង់ចាម ព្រមទាំងលោកឧត្តមសេនីយ៍ទោ ឯម កុសល ស្នងការនគរបាលខេត្ត ចាត់តាំង និងដឹកនាំកម្លាំងផ្ទាល់សរុបចំនួន ២០៤ នាក់ ក្នុងនោះមាន (កម្លាំងនគរបាលអន្តរាគមន៍ខេត្ត ចំនួន ៨០ នាក់, ស្រុកបាធាយ ៧៤ នាក់,ស្រុកជើងព្រៃ ចំនួន ៣០ នាក់ និងស្រុកព្រៃឈរ ចំនួន ២០ នាក់) បានចុះទៅកន្លែងកើតហេតុជួយរុះរើ-ជួសជុល និងសាងសង់ផ្ទះជម្រកបណ្ដោះអាសន្នជូនដល់ប្រជាពលរដ្ឋនៅឃុំសណ្តែក និងឃុំត្រប់ ក្នុងស្រុកបាធាយ ដែលជួបគ្រោះមហន្តរាយខ្យល់កន្ត្រាក់ ដែលបណ្តាលអោយខូចខាតផ្ទះសម្បែងសរុបចំនួន ៤៩៦ ខ្នង (ធ្ងន់ ៣១ ខ្នង)។ ក្នុងនោះនៅឃុំសណ្តែកមានចំនួន ៣៨៥ ខ្នង (ធ្ងន់ ២០ ខ្នង របួសមនុស្ស ចំនួន ០៣ នាក់ ធ្ងន់ម្នាក់) និងនៅឃុំត្រប់ចំនួន ១១១ ខ្នង (ធ្ងន់ ១១ ខ្នង)។
លោក សំ ណាល់ អធិការនគរបាលស្រុកបាធាយបានបញ្ជាក់ថា នៅពេលរសៀលថ្ងៃទី២៧ ខែឧសភា ឆ្នាំ២០១៨ នេះ ឯកឧត្តម គួច ចំរើន អភិបាលនៃគណៈអភិបាលខេត្ត និងសហការី បាននាំយកអំណោយរបស់កាកបាទក្រហមកម្ពុជា សាខាខេត្តកំពង់ចាម ទៅជួយឧបត្ថម្ភដល់ប្រជាពលរដ្ឋដែលជួបគ្រោះមហន្តរាយទាំង ៤៩៦ គ្រូសារ ដើម្បីជួយសម្រួលជីវភាពរស់នៅរបស់ពួកគាត់ពេលជួបគ្រោះមហន្តរាយ។
ទន្ទឹមនោះ លោកឧត្តមសេនីយ៍ទោ ឯម កុសល ស្នងការនគរបាលខេត្តកំពង់ចាម និងសហការីបាននាំយកថវិកា និងភេសជ្ជៈសួរសុខទុក្ខបងប្អូនរងគ្រោះនៅមន្ទីរពេទ្យបន្តទៀត និងបានចាត់តាំងកម្លាំងការពារសន្តិសុខ សុវត្ថិភាព និងសណ្តាប់ធ្នាប់ជូនដល់ប្រជាពលរដ្ឋជួបគ្រោះមហន្តរាយទាំងអស់នោះ រហូតដល់ពួកគាត់មានជីវភាពរស់នៅដូចធម្មតាវិញ៕
Source: Kampuchea Thmey Daily
0 Comments