ក្រុមបាល់ទាត់ព្រះខ័នរាជស្វាយរៀង និងណាហ្គាវើល សុទ្ធតែរកបានជ័យជម្នះដូចគ្នា តែបឹងកេត ស្មើជាមួយអគ្គីសនីកម្ពុជា ក្នុងសប្ដាហ៍ទី៧ នៃពានរង្វាន់លីគកំពូលកម្ពុជា (Metfone Cambodian League 2018) ដែលរៀបចំពីសំណាក់គណៈកម្មការប្រកួតបាល់ទាត់ជាតិ (CNCC) សេនាធិការរបស់សហព័ន្ធកីឡាបាល់ទាត់កម្ពុជា នៅថ្ងៃសៅរ៍ ទី២៦ខែឧសភា ឆ្នាំ២០១៨។
ក្រុមព្រះខ័នរាជស្វាយរៀង បានប្រកួតឈ្នះលើក្រុមសូលទីឡូអង្គរ ២ទល់១លើទីលានកីឡដ្ឋានកងយោធពលខេមរភូមិន្ទ (ស្តាត់ចាស)។ កីឡាករជនជាតិនីហ្សរីយ៉ា បានរកគ្រាប់បាល់ឲ្យក្រុមសូលទីឡូអង្គរ នាំមុខមុន១គ្រាប់ នៅនាទី៣២ តែក្រុមព្រះខ័នរាជស្វាយរៀង បានវាយបកបាន២គ្រាប់វិញដោយថ្វីជើងកីឡាករជនជាតិអាហ្វ្រិកខាងត្បូង Booysen Shane នៅនាទី៦៣ ខណៈគ្រាប់បាល់ទី២រកបានដោយកីឡាករTrevin Caesar នៅនាទី៦៤។
ចំណែកម្ចាស់ផ្ទះក្រុមអគ្គីសនីកម្ពុជា បានប្រកួតស្មើគ្នាជាមួយក្រុមបឹងកេត ១ទល់១ លើទីលានអគ្គីសនីកម្ពុជា ម្តុំទួលសង្កែ។ កីឡាករ យ៉ន មេសា បានរកគ្រាប់បាល់ឲ្យម្ចាស់ផ្ទះនៅនាទីទី១២ ខណៈកីឡាករនីហ្សេរីយ៉ា Julius Oiboh របស់បឹងកេត បានរកគ្រាប់បាល់តាមស្មើវិញនៅនាទី៦៥។
ចំណែកក្រុមម្ចាស់ផ្ទះក្រសួងការពារជាតិ វិញបានប្រកួតចាញ់ក្រុមណាហ្គាវើល ២ទល់០ នៅកីឡដ្ឋានស្តាត។ កីឡាករនីហ្សេរីយ៉ា George Bisan រកបានគ្រាប់បាល់ឲ្យក្រុមណាហ្គាវើល ទទួលបានជ័យជម្នះ២គ្រាប់ម្នាក់ឯងគឺនៅនាទី៦៣ និង៨០។
ចំណែកកម្មវិធីប្រកួតបន្ទាន់នៅសប្ដាហ៍ទី៧ នេះនឹងធ្វើឡើងនៅថ្ងៃអាទិត្យ ទី២៧ ខែឧសភា នេះជាបន្តដោយក្រុមភ្នំពេញក្រោន ប៉ះ អាស៊ីអឺរ៉ុប នៅម៉ោង៦ល្ងាចលើទីលានកីឡដ្ឋាន RSN និងក្រុមអគ្គស្នងការដ្ឋាននគរបាលជាតិ ជួបក្រុមវិសាខា នៅម៉ោង៣រសៀលលើទីលានកីឡដ្ឋាន AEU Park។ ចំណែគនៅថ្ងៃអង្គារ ទី២៩ ខែឧសភា ក្រុមអង្គរថាយហ្គឺរ ទទួលក្រុមវេស្ទើនភ្នំពេញ នៅវេលាម៉ោង៣និង៣០នាទីរសៀលលើទីលានកីឡដ្ឋានខេត្តសៀមរាប។
ពានរង្វាន់លីគកំពូលកម្ពុជា រដូវកាលនេះនឹងប្រើប្រាស់រូបមន្តប្រកួតសន្សំពិន្ទុវិលជុំចំនួន២ជើងមាន២២សប្ដាហ៍ ដើម្បីស្វែងរកក្រុមខ្លាំងដែលមានពិន្ទុច្រើនជាងគេដណ្តើមជើងឯកប្រចាំឆ្នាំ។ ការប្រកួតចាប់ផ្តើមពីថ្ងៃទី៣ខែមីនា ដល់ថ្ងៃទី៣០ខែកញ្ញា ឆ្នាំ២០១៨ ដែលមានសមាជិកចំនួន១២ក្រុម។ ក្រុមជើងឯកនឹងទទួលបានកៅអីទៅចូលរួមប្រកួតក្នុងពានរង្វាន់ AFC Cup 2019, ពានរង្វាន់ Mekong Club Championship និងពានរង្វាន់ Singapore Cup ជាដើម៕
Source: Kampuchea Thmey Daily
0 Comments