ភ្នំពេញ ៖ បុរសម្នាក់បានស្លាប់ភ្លាមៗនៅនឹងកន្លែងកើតហេតុបន្ទាប់ពីជិះម៉ូតូធុនធំស៊េរីទំនើបវ៉ារថយន្ដមួយគ្រឿងនៅពីមុខខ្លួនពេលកំពុងវ៉ាជែងនោះ ស្រាប់តែមានរថយន្ដបើកមកពីមុខបុកម៉ូតូជនរងគ្រោះពេញបណ្ដាលឲ្យស្លាប់ភ្លាមៗ ហើយកៀបអូសម៉ូតូទៅមុខជិត១០ម៉ែត្រ កាលវេលាម៉ោង៤និង៣០នាទីទៀបភ្លឺព្រឹកថ្ងៃទី២៦ខែឧសភាឆ្នាំ២០១៨នៅមុខឃ្លាំងលក់ទិញ រថយន្ត ហេងសុខម៉េង តាមបណ្តោយផ្លូវ២០០៤ស្ថិតភូមិិត្រពាំងល្វាសង្កាត់កាកាប១ខណ្ឌពោធិ៍សែនជ័យ។
សពជនរងគ្រោះឈ្មោះ វ៉ាន់ រ៉ាដេត ភេទប្រុស អាយុ២៧ឆ្នាំ មុខរបរកម្មកររោងចក្រស្នាក់នៅម្តុំផ្សារបឹងឈូកសង្កាត់គោកឃ្លាង ខណ្ឌសែនសុខ មានទីកន្លែងកំណើតនៅភូមិ២១ សង្កាត់បឹងកក់២ខណ្ឌទួលគោគ។ រថយន្តបង្កម៉ាកហ៊ីយ៉ាន់ដាយ ពណ៌ស ពាក់ស្លាកលេខភ្នំពេញ3D-8661 បើកបរក្នុងទិសដៅពីជើងទៅត្បូង។ ម៉ូតូជនរងគ្រោះម៉ាកហុងដាFZ ពណ៌ខ្មៅ ពាក់ស្លាកលេខភ្នំពេញ1CA-8398បើកបរក្នុងទិសដៅពីត្បូងទៅជើងបញ្ច្រាសគ្នា។
តាមប្រភពព័ត៌មាន ពីកន្លែងកើតហេតុ បានឲ្យដឹងថា នៅមុនពេលកើតហេតុគេឃើញម៉ូតូជនរងគ្រោះ បើកបរលឿនក្នុងទិសដៅពីត្បូងទៅជើង លុះបើកមកដល់ចំណុចកើតហេតុ ស្រាប់តែ មានរថយន្តមួយគ្រឿង ម៉ាកហ៊ីយ៉ាន់ដាយ ពណ៌សជា រថយន្តដឹកជ្រូក តែនៅពេលគ្រោះថ្នាក់ រថយន្តខាងលើ មិនមាន ដឹកជ្រូកឡើយគ្រាន់តែជារថយន្ដសម្រាប់ដឹកជ្រូកហើយបើកក្នុងល្បឿនយ៉ាងលឿនដែរ ក្នុងទិសដៅបញ្ច្រាសទិសគ្នា បន្ទាប់មកជនរងគ្រោះបានបើកវ៉ារថយន្តមួយគ្រឿងទៀតក្នុងទិសដៅស្របគ្នា នៅពេលនោះស្រាប់តែរថយន្តបង្កបានបើកបុកម៉ូតូជនរងគ្រោះពីមុខពេញទំហឹងបណ្តាលឲ្យអូសម៉ូតូជាង៥ម៉ែត្រ ហើយជនរងគ្រោះខ្ទាតបោកនឹងថ្នល់បណ្តាលឲ្យបែកមុខហូរឈាមដក់កន្លែងកើតហេតុស្លាប់ភ្លាមៗមួយរំពេច។ ចំណែកតៃកុងរថយន្តបង្កពេលគ្រោះថ្នាក់ភ្លាមៗបានចុះពីលើរថយន្តហើយគេចខ្លួនបាត់ស្រមោល។
ក្រោយពេលកើតហេតុ ផ្នែកជំនាញចរាចរខណ្ឌពោធិ៍សែនជ័យ បានប្រគល់ភារកិច្ចនេះទៅឲ្យជំនាញចរាចរណ៍រាជធានីភ្នំពេញ ដើម្បីមកវាស់វែងនិងយកម៉ូតូនិងរថយន្ត ទាំង២គ្រឿងទៅរក្សាទុកដើម្បីរង់ចាំធ្វើការដោះស្រាយគ្នានៅពេលក្រោយ ហើយសពត្រូវបានសមត្ថកិច្ចធើ្វលិខិតប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី៕
Source: Kampuchea Thmey Daily
0 Comments