ភ្នំពេញ៖ ៤ ខែដើមឆ្នាំ ២០១៨ ថៃបាននាំទំនិញចូលមកកម្ពុជា មានទំហំទឹកប្រាក់ចំនួន ២១៣៣.៨០ លានដុល្លារអាមេរិក ក្នុងនោះកម្ពុជានាំទំនិញចេញទៅកាន់ប្រទេសថៃឡង់ដ៍វិញ មានចំនួនតែ ៣៤១.៧១ លានដុល្លារប៉ុណ្ណោះ បើធៀបនឹងរយៈពេលដូចគ្នាក្នុងឆ្នាំ ២០១៧ ទំហំពាណិជ្ជកម្មរវាងប្រទេសទាំងពីរមានការកើនឡើងចំនួន ២២.៥៦ ភាគរយ។
លោកស្រី ជីរ៉ាណាន់ វង្សមង្គល តំណាងពាណិជ្ជកម្មថៃ ប្រចាំខេត្តសៀមរាប បានប្រាប់ឲ្យដឹងនៅក្នុងសន្និសីទសារព័ត៌មាន នាព្រឹកថ្ងៃទី២៦ ខែឧសភា ឆ្នាំ២០១៨ ស្តីពីការរៀបចំ ”ពិព័រណ៍ពាណិជ្ជកម្មថៃ ឆ្នាំ ២០១៨ Thailand Product Expo 2018 “ ដែលគ្រោងនឹងធ្វើឡើងរយៈពេល៤ថ្ងៃ ចាប់ពីថ្ងៃទី ៧-១០ ខែមិថុនា ឆ្នាំ ២០១៧ ខាងមុខនេះ នៅមជ្ឈមណ្ឌលកោះពេជ្រ រាជធានីភ្នំពេញ ដោយមានក្រុមហ៊ុនចូលរួមចំនួន ២០០ ក្រុមហ៊ុន និងមានស្តង់សរុបចំនួន ២៥០ ស្តង់។
លោកស្រីបានបន្តថា មុខទំនិញជាច្រើនប្រភេទដែលនឹងយកមកដាក់តាំងបង្ហាញនៅក្នុងពិព័រណ៍ពាណិជ្ជកម្មនាពេលនោះ រួមមានដូចជា ប្រភេទទំនិញអាហារ និងភេសជ្ជៈ សំលៀកបំពាក់ និងវាយនភណ្ឌ គ្រឿងសំអាង និងទំនិញសុខភាពសម្ផស្ស សំភារៈប្រើប្រាស់ក្នុងផ្ទះ និងសម្ភារៈផ្ទះបាយ វត្ថុអនុស្សាវរីយ៍ និងតុបតែងផ្ទះ សម្ភារៈធ្វើពីស្បែក និងស្បែកជើង សម្ភារៈអគ្គីសនី និងអេឡិចត្រូនិក គ្រឿងបន្លាស់រថយន្ត និងម៉ូតូ សម្ភារៈតុបតែងផ្ទះ ទំនិញ OTOP របស់ប្រទេសថៃ សម្ភារៈសំណង់ និងទំនិញផ្សេងៗជាច្រើនទៀត។
លោកស្រីក៏បានបញ្ជាក់បន្ថែមថា គោលបំណងក្នុងការរៀបចំ ”ពិព័រណ៍ពាណិជ្ជកម្មថៃ ២០១៨ គឺដើម្បីផ្សព្វផ្សាយផលិតផលរបស់ថៃ ដែលជាផលិតផលមានគុណភាពល្អ តម្លៃសមរម្យ និងដើម្បីជាការអរគុណដល់អតិថិជនដែលគាំទ្រទំនិញថៃ ឲ្យមានឱកាសបានទិញទំនិញពីម្ចាស់រោងចក្រដោយផ្ទាល់ក្នុងតម្លៃសមរម្យ។ ម្យ៉ាងទៀត ដើម្បីរឹតចំណងមិត្តភាពរវាងប្រទេស និងប្រជាជនទាំងពីរកម្ពុជា ថៃ ឲ្យកាន់តែល្អប្រសើរថែមទៀត៕
Source: Kampuchea Thmey Daily
0 Comments